O MAZMUR 88 - MA JOU AI BUKU O ABARI MA OA

O niniata wogahoko o roriwo

¹ O nyanyi. O Korah ai ahaluku manga Mazmur. Mangale yonyä nyanyi manga tutuda. Imoteke: o Mahalat Leanot malugo. O Heman o Ezrahi manyawa ai dodotoko, manyanyi.

² Ya Jou, Jou Madutu nohi hihalamati ngohi, o wange-wange ngohi toma hiböaka Ngonaika, o hutu-hutu ngohi tonï himanga Ngona.

³ Tanu ahi niata yadono Ngonaika, nohi gihene ahi böaka.

⁴ Ngohi ihi tapal̄u o huha mangöe; o honenge o ngorana mahimangoka yainoka.

⁵ Ngohi hokä o nyawa aha youti o lungunu mabaituku, o nyawa koiwa-iwaka manga kuata.

⁶ Ngohi ihi mal̄aika o nyawa yohone-honenge manga hidogoronaka, hokä o nyawa yätoma-toma, ima rubaiha o lungunoka, hokä o byawa duru Näwoha-wohangoka, o nyawa ko Näriwo-riwo okaua.

⁷ Ngona nohihikaweli ngohi o baiti maluku-lukuku, o lungunu mabaiti maluku-lukuku deʼ mahohuhutu.

⁸ Ani dohata ihi tuku ngohi dema dubuho, ngohi towede-wederuku ihi tapal̄u Ani muruka.

⁹ Ahi dodiawo Nohihitingaka magurutika, deʼ nadiai önanga ihi emono de ngohi. Ngohi ihihigilolitino deʼ takunua tohupu,

¹⁰ ahi lako irafi karana tohangihara. O wange ihi getongo ngohi toma hiböaka Ngonaika, Jou, deʼ toma niata de ahi giama itoakika.

¹¹ Boteka Ngona nodiai ihöhera-heranga mangale o nyawa yohone-honenge? Boteka önanga yomomiki deʼ ini higiriri Ngona?

¹² Boteka Ani dora ihingahu o lungunu magoronaka, deʼ Ani setia o binaha mangïoka?

¹³ Nagaka ihiöriki Nadiai ihera-heranga o huhutu magoronaka, ekola Ani oa o nyawa yäwoha-wohanga manga bereraka?

¹⁴ Mä ngohi togahoko Ani roriwo, ya Jou, o ngorumino ihigetongo ahi niniata tohidoa Ngonail̄e.

¹⁵ Ya Jou, yadodoaho Ngona nohi umo ngohi? Yadodoaho ngohino Ani biono kanohiniporo?

¹⁶ Kahi alu-aluhohi ngohi tohangihara deʼ o honenge kaihi kokeleu, ngohi tokangela tatagongo Ani hukumanga.

¹⁷ Ani dohata hömodo-modongo ihi wedere ngohi; Ani bobaha hömodo-modongo ihi binaha ngohi.

¹⁸ O wange magurutu Ani dohata hokä o nguihi ihi kilolitino ngohi, okiaino honanga ihi higilolitino ngohi.

¹⁹ Ahi dodiawo itötigi-tigi Nohihitingaka magurutika, igogogere o huhutu ihi dodiawo ngohi.