O MAZMUR 86 - MA JOU AI BUKU O ABARI MA OA

O niniata wogahoko o roriwo

¹ O Daud ai niniata. Noihene ahi niniata, ya Jou, deʼ nohï baluhu ngohi, hababu ngohi tomihikini deʼ tobole.

² Nögoana ahi wowango, hababu Ngona nohï dora ngohi, nohihihalamati Ani gilaongo toni ngaku-ngaku Ngonaika.

³ Ngona ganga ahi Jou Madutu, nohï dora ngohi ya Jou, hababu o wange magurutu ngohi tomä niata Ngonaika.

⁴ Jou namorene Ani gilaongo ahi hininga, hababu Ngonaika tohi meta ahi hininga.

⁵ Ngona yaoa, ya Jou, deʼ nöigo nohi apongo, o nyawa imä nia-niata Ngonaika kahirahi Ngona nädora deo dora de maboboloi.

⁶ Natailako nohidodiai ahi niniata, ya Jou, noihene ahi böaka togahoko o roriwo.

⁷ Maöraha ihi hidehoto ngohi tomä niata Ngonaika, hababu Ngona nohï baluhu ngohi.

⁸ Ya Jou, koiwa naga o jou hokä Ngona, koiwa naga yadodiai Ngona nadodiai.

⁹ Mata-mata o hoana deo berera Nahidädadi aha yoboa, ya Jou, mangale ini huba Ngona deʼ ihigiriri Ani mulia.

¹⁰ Hababu Ngona noputurungu deʼ nodiai ihö hera-heranga, duga-duga Ngona ganga ma Jou Madutu.

¹¹ Nohï dotoko ngohino Ani mau, ya Jou, hupaya ngohi tanïki de ahi satia; nohi hidadi ngohi ahi wowango de ahi hininga magahumu.

¹² Ngohi tosyukur Ngonaika de ahi hininga itötotomo, ya Jou ahi Jou Madutu; ngohi tomau tohigiriri Ani kabaharanga kahi ädo-ädonika.

¹³ Hababu Ngona hirahi nohï dora ngohi deo dora magilamoko; o lungunu mapidahoka de Ngona nohi hilapahioka ahi nyawa.

¹⁴ Ya Jou Madutu, o nyawa yoede-edenge yomomiki imaoko il̄e ihi parangi ngohi, o duduono moi o nyawa yohohatera yomau ngohi ihi toma; önanga inihaduli okaua Ngona.

¹⁵ Mä Ngona, ya Jou, Jou Madutu nototodora deʼ notahayangi nosabari, ini omanga o dora deʼ o satia.

¹⁶ Nohi tailako nohidodiai deʼ nohidora ngohi nohihikuata deʼ nohihihalamati ngohi, hababu hokä ngohi ayo, ngohiö tini horomati Ngonaika.

¹⁷ Nohi hidöaka ngohi Ani oa manonako, ya Jou, hupaya o nyawa ihï doha-dohata ngohi idadi yä mal̄eke, nako önanga yamake Ngona nohï riwo deʼ nohi laru ngohi.