O MAZMUR 82 - MA JOU AI BUKU O ABARI MA OA

Ma Jou Madutu o Koano womo Mulia

¹ O Asaf ai Mazmur. Ma Jou Madutu watuda o gikiri yolago-agomo manga doomu o horogaka, daha Unanga wohidöaka maputuhu.

² ”Ibötohi nia tailako o perekara nirusi-rusi deʼ uha nia hiboa o nyawa madorou.

³ Nia riwo o ngohaka o gohihi deʼ o nyawa yobole-bole, nihidöaka o adili o nyawa mihikinika deʼ yoho hangiharaika.

⁴ Nia hibebasi o nyawa yobole-bole deʼ okiaua yakunu, nia hirehene önanga o nyawa madorou manga giamino.

⁵ Ngini okia-kiaua nihiöriki, nibodo deʼ o ngekomo nia ngohu, karna ngini, o masyarakat madatoro itiai okaua.

⁶ Ngohi totemo ngini ganga o gikiri, ngini mata-mata ma Jou Madutu Duru Wokö Kurutil̄e Ai ngoha-ngohaka.

⁷ Mä ngini aha nihonenge hokä o nyawa, hokä o nyawa yolago-agomo magetongo, nginiö aha nihonenge.”

⁸ Noboa ya Jou Madutu, nohi hakimi o dunia, hababu mata-mata o hoana deo berera ganga Tongona.