O MAZMUR 79 - MA JOU AI BUKU O ABARI MA OA

O niniata wogahoko o hoana deo berera ihi bebasi

¹ O Asaf ai Mazmur. Ya Jou Madutu, o hoana deo berera ini nako-nakoua Ngona yögogeroka Ani puhaka matonaka. Onanga yapesekoka Ani Tau, o Yerusalem yadiaioka kamagilianga.

² Manga maiyeti Ani gilaongo önanga yamal̄aika idadi o totaleo o gitawaka mainomo. Nahohininga manga mayeti önanga yödogumal̄aika idadi o aiwani ihühuhuku mainomo.

³ O Yerusalem makota yamode-modekika toönanga manga awunu ikopoa hokä o akere; moiua yälungunu önanga.

⁴ Ngomi midadi manga hohedu mangï o hoana deo berera mima kokadatekuku, önanga imïgogiete deʼ imihohedu ngomi.

⁵ Ya Jou, bote kahiädo-ädonika Ngona nongamo, deʼ Ani dohata ihiru-hiru hokä o uku?

⁶ Nakopoa Ani gangamo o hoana deo bererauku ini nako-nakoua Ngona, deʼ o popareta-poparetauku inihö horomatiua Ngonaika.

⁷ Hababu önanga yäbinahaka Ani umati, deʼ yawede-wederuku toönanga manga gogere mangï.

⁸ Uha nomï hukumu ngomi karana mia ete de mia tohora manga baradoha. Itai-taiti Nomï dora ngomi, hababu ngomi mia nganono itoaka.

⁹ Nomï riwo ngomi ya Jou Madutu, Nomi hohohalamati ngomi, Na apongo tongomi mia baradoha deʼ Nomi hibebasi ngomi mangale Ani horomati mahirete.

¹⁰ Uha nähigumal̄a o hoana deo berera mahomoa imi leha mangale ngomi, ”Kiaka waika toönanga manga Jou Madutu?” Mal̄aikala ngomi mia make mabalahi o hoana deo bereraika yatö toma-toma o gogilaongo.

¹¹ Noihene yätumu-tumunguku manga gururihi; tanu hagala o nyawa ihitö tantuoka yohonenge yähigumal̄a yowango karana Ani kuaha.

¹² Ya Jou, nabalahi o hoana deo berera gënanga ilape tumiduku karana mata-mata toönanga manga hikauku Ngonaika.

¹³ De ngomi Ani umati, o duba Nogö goa-goana, aha misyukur Ngonaika kahi ädo-ädonika, deʼ minihigiriri Ngona mia ngohaka de mia danonguku.