O MAZMUR 69 - MA JOU AI BUKU O ABARI MA OA

O niniata o dehehoto magoronaka

¹ Mangale yonyä nyanyi manga tutuda. Imoteke malugo: o Bunga Bakung o Daudino.

² Nohihihalamati ngohi, ya Jou Madutu, hababu o akere idoaka hiadono ahi tomaril̄e.

³ Ngohi tohodoa o peseke ilöluku-lukuku, koiwa naga o ngi toma hidodoko. Ngohi ihi lutu o akere maluku-lukuku, ihi hinahini o aere marikimi mamoku-moku.

⁴ Ngohi topoa-poaka hiädono ihi bole deʼ ahi ngomaha mayö dudungu. Ahi lako yahihi tödama ahi Jou Madutu Ai roriwo.

⁵ O nyawa ihï doha-dohata ngohi mahababu koiwa, iholoi yowoe de ahi tadauru ahi haekoka. O nyawa yokua-kuata yomau ihi binaha ngohi; önanga ihi parangi ngohi de o fitana. Ngohi ihi pakisa tohigilio o arata taora-ora inoua.

⁶ Ya Jou Madutu, Ngona nohioriki hagala ahi howono ahi baradoha tonï giunua Ngonaika.

⁷ Uha nohihigumal̄a ngohi tädotagao o mal̄eke hagala o nyawaika ima hingano-nganono Ngonaika, ya Jou, Jou Madutu Duru Noko Kuaha. Uha nohi higumal̄a ngohi tädotagao o demo itotorou hagala o nyawaika inihö huba-huba Ngona, ya o Israeloka manga Jou Madutu!

⁸ Hababu karana Ngona ngohi ihi hikauku, karana Ngona ngohi ihi hohedu.

⁹ Ngohi todadi hokä o nyawa mahomoaino ahi roriadodotika, hokä o nyawa maporetino ahi riakika de ahi dodotika.

¹⁰ Ahi hininga ihauku karana töhohininga Ani Tauika, o nyawa ini hikokauku manga hohedu Ngona yatapalu ahi diri.

¹¹ Ngohi toari de topuaha, mä önanga ihihikauku ngohi.

¹² Ngohi tapake o ngoere o karongo manonako toduka, mä önanga ihikalekono ngohi.

¹³ Ngohi idadi kamangauruoka o nyawa ima totoomu manga ngioka, deʼ yädalu-daluku manga nyanyi ganga mangale ngohi.

¹⁴ Mä ngohi tomä niata Ngonaika, ya Jou, ya Jou Madutu, nohï baluhu ngohi maöraha ma rorahaioka. Nohï riwo ngohi karana ma amoko Ani dora deʼ karana Ani satia.

¹⁵ Uha nohi mal̄aika ngohi ihi lutu o peseke magoronauku, nohi hihalamati ngohi hagala o nyawa ihï doha-dohata ngohi deʼ o akere maluku-lukuino.

¹⁶ Uha nohi mal̄aika ngohi ihihinahini o aere marikimi mamoku-moku, deʼ ihilutu o ngöto mabukuku ekola ihi lungunu o pidaha magoronauku.

¹⁷ Nohï baluhu ngohi, ya Jou, hababu Ngona yaoa deʼ kahirahi nohï dora. Tanu nömodeke nomaidulu ngohino, hababu iamoko Ani dora de Ani hayanga.

¹⁸ Uha nohi ngiunu Ani gilaongo nënanga, hababu ngohi tohuba, itaiti nohi riwo ngohi.

¹⁹ Noboa nohi hihalamati ngohi, nohihibebasi ngohi hagala ahi haturuino.

²⁰ Ngona nohiöriki sarakia ngohi ihï ngelo, ihihikauku deʼ ihi temo itorou, Ngona nämake ahi haturu mata-mata.

²¹ O hikauku yadiaioka ngohi ahi hininga itobiki, deʼ ngohi ahi nganono itoaka. Talingiri o hayanga deo dora, mä parasuma, talingiri o lolaru, mä tamakeua.

²² Idogoika ngohi ihi hidöaka o rasongo mangale ahi inomo; maöraha ahi kiriti madudungu, ngohi ihi hidöaka o suka mangale taokere.

²³ Mal̄aika toönanga manga jamuanga yadotagao o bodito, deʼ idadi o modoi toönanga manga tamu-tamuika.

²⁴ Mal̄aika toönanga manga lako idadi ipiloko deʼ manga porete salalu yabole.

²⁵ Nä dogopoa Ani dohata onanguku, mal̄aikala önanga yatapal̄u Ani muruka itoka-tokara.

²⁶ Mal̄aikala toönanga manga tau madoomu kairïdika, deʼ toönanga manga tau-tau moiua yogogere.

²⁷ Hababu önanga ya aniaya o nyawa Nä huku-hukumu, deʼ ihi ade-ade o nyawa Nahö hangihara.

²⁸ Mal̄aikala toönanga manga howono idogo-dogo iwöe; uha nadiai önanga yotiai.

²⁹ Mal̄aikala toönanga manga romanga iehe o nyawa yowango-wango manga bukuoka; deʼ yatulihua o nyawa manga hininga iriko-rikoto manga dulihoka.

³⁰ Mä ngohi ihi tuku deʼ tohiri, ngohi nohi goraka ya Jou Madutu, deʼ nohi hihalamati ngohi.

³¹ Done ngohi aha tihigiriri ma Jou Madutu deo nyanyi, Unanga tihi mulia deo syukur manyanyi.

³² Genanga iholoi isanangi ma Jouika deo huhuba o hapi, o huhuba o hapi manauru ma ago-agomo.

³³ Tamake gënanga, o nyawa yätuku-tuku yomorene, o nyawa iwi huba-huba ma Jou Madutu manga hininga iamoko.

³⁴ Hababu ma Jou wahi gihe-gihene o nyawa yomö mihikini; Unanga wähaduli Ai umati o bui magoronaka.

³⁵ Niwi higiriri ma Jou Madutu, hei o dibanga deʼ o dunia. O ngöto deʼ magoronaka mata-mata o dodadi.

³⁶ Unanga aha wohihalamati o Yerusalem deʼ wohi gokokali o Yehuda makota-kota. Ma Jou Ai umati aha yogogere dokengoka; o tonaka gënanga idadi toönanga madutu.

³⁷ Manga ngohaka de manga danongo aha yapuhaka, hagala o nyawa iwi hohininga ma Jou aha yögogere.