O MAZMUR 58 - MA JOU AI BUKU O ABARI MA OA

O niniata o gogahoko o balahi o nyawa madorouika

¹ Mangale yonyä nyanyi manga tutuda. Imoteke malugo: Uha nia binaha. O Mazmur o Daudino.

² Hei nikokuaha, iadili o putuhu nio gelenga? Ngini nia hininga irikoto maöraha ngini o nyawa nia juru hakimi?

³ Kowali, ngini nia tatoro o dorou, deʼ niadiai nia pakisa o bereraka nënanga.

⁴ O nyawa madorou yahowonoka o ngekomo kademadero o mamataokahi önanga yotipuoka kademadero imahi adonino.

⁵ Onanga de manga rasongo hokä o dodiha ibiha-biha, deʼ yajumu manga ngauku hokä o dodiha ibiha-biha yatotopongono.

⁶ Yoihe-ihenua o aiwani o gigini wopopaliara wososawaro ai ilingi, ekola womö matara wososawaro ai ilingi.

⁷ Ya Jou Madutu, natobiki toönanga manga ingiri, narahuku hagala o singa magö mahihipata gënanga, Jou.

⁸ Mal̄aikala önanga yohihanga hokä o akere ihaga, hokä o toimi madoto ipöpopohoka.

⁹ Mal̄aikala önanga hokä o tabule iwaro idadi o ngahiri, hokä o ngohaka magogil̄au yamakeowahi o dararono deʼ yohonenge.

¹⁰ Koimamao uahi, önanga yobinahaka, hokä o momo deo gota ma alu-aluhu kama ijo-ijohi deʼ koilago-agomuahi o hidaloko ihi hoho yamataka, hokä gënanga yadö dato-datomo madoolenge.

¹¹ Yamake o nyawa madorou yähukumu, o nyawa manga hininga iriko-rikoto yomorene, deʼ yaihoro manga l̄ou o nyawa madorou manga awunuku.

¹² O nyawa aha yotemo, ”Marai o nyawa maoa yamake o pahala, igoungu, naga ma Jou Madutu wohijö juruhakimi o duniaka.”