O MAZMUR 55 - MA JOU AI BUKU O ABARI MA OA

O niniata wogahoko iwi hirehene ai haturu

¹ Mangale yonyä nyanyi manga tutuda. Ihi ginïki de o kecapi. O Daud ai dodotoko manyanyi.

² Ya Jou Madutu noihene ahi niniata, ahi gahokino uha kanoma hiniporo.

³ Ngohi nohi tötailako deʼ ngohi nohï baluhu, ngohi towedere karana ahi huha.

⁴ Ahi hininga ihuha karana ahi haturu yomau ihi bodito deʼ o nyawa madorou manga hikauku. Hababu önanga yodiai o huha ahi wowango, deʼ ngohi ihï haturu de manga dohata.

⁵ Ahi hininga duru ihuha, o honenge hoboborohono ahi diri yahawa-hawana.

⁶ Ngohi katohä hahara deʼ tohawana, o borohono mamamao ihi hoko-hokotino.

⁷ Ah, nako ngohi de ahi gahuhu hokä o namodara, ngohi aha tohoho tomä lingiri o ngï isosanangi.

⁸ Ya, ngohi aha tohoho duru kahä gurutika, deʼ togogere o tonaka ikokakahaka.

⁹ Ngohi aha toma tai-taiti toma lingiri o hohohongo taufani deʼ o rato ihi koronaua.

¹⁰ Ya Jou, näkapusaka hagala ahi haturu, näruae toönanga manga ade-ade, hababu o kotaka tamake imateke pakisa deʼ o ributu deo gitidingi.

¹¹ O hutu deo wange önanga kayo kokiloliti, yodiai o dorou deʼ ihi titi o huru-hara.

¹² Okiaika honanga naga o manarama itotorou; o hikauku deʼ o tipu itagi kohagiria o paharoka.

¹³ Nako ahi haturu ngohi ihihohedu, ngohi takunohi toma tongohono. Nako ahi lawani ngohi ihi hikauku, ngohi takunohi tïngiunu.

¹⁴ Mä hababu ngona, ahi dodiawo, ahi hobata, ahi dodiawo itigi-tigino nosatiaokaua ngohino.

¹⁵ Kahuruono ngone homa dodiawo marahai, deʼ biaha hopuji homa tuo-tuono ma Jou Ai Tauoka.

¹⁶ Mal̄aikala ahi haturu itodokanino yohonenge deʼ kamanga ngango youti o nyawa yohö hone-honenge manga duniauku, hababu o dorou naga toönanga manga tauoka, toönanga manga hidö dogoronaka.

¹⁷ Mä ngohi toma hiboaka ma Jou Madutuika, ma Jou aha wohi hihalamati ngohi.

¹⁸ O hutu deo wange ngohi tomaridemo deʼ toari, deʼ Unanga woihene ahi ilingi.

¹⁹ Unanga ngohi wohihihalamati haturu manga parangino, yotuo-tuono ihi lawani ngohi.

²⁰ Ma Jou Madutu wopareta ikokakali aha ngohi wohigihene deʼ wähohihanga önanga. Hababu önanga yoluku yotoba, deʼ iwï modongua ma Jou Madutuika.

²¹ Ahi dodiawo mahira waparangi ai dodiawo, ünanga wohi pongono ai jaji.

²² Ai demo-demo ialuhu wobaja, mä ai hininga magoronaka naga o dohata. Ai ade-ade ma bole-bole, mäwahitohoko hokä o dia madoto-doto.

²³ Nohidöaka ani daiana ma Jouika, done Unanga aha woni tiki ngona; hababu o nyawa manga hininga irikoto Wä mal̄aikaua yähohihanga.

²⁴ Mä ngona, ya Jou Madutu, aha näumo önanga o baiti duru mal̄oluku-luku magoronauku. Yotipu-tipu deʼ o awunu yakokopoa aha koyadonua toönanga manga umuru mahononga. Mä ngohi tongaku Ngonaika.