O MAZMUR 53 - MA JOU AI BUKU O ABARI MA OA

O nyawa manga dorou

¹ Mangale yonyä nyanyi manga tutuda. Imoteke malugo: o Mahalat. O Daud ai dodotoko manyanyi.

² O nyawa bodo yotemo manga hiningaka, ”Ma Jou Madutu koiwiwa.” Toönanga manga manarama itorou deʼ haemono; koiwa naga maoa-oa yodiai.

³ O horohaino ma Jou wä pulono o umati o nyawa, mangale wä lingiri o nyawa yososawaro iwi huba-huba Unanga.

⁴ Mä mata-mata o nyawa yamotekokaua o pareta madiai deʼ manga kalakuanga itorou, kaima tengo makoiwa o oa-oa yodiai.

⁵ Ma Jou wato, Imamaokaua hagala o nyawa madorou gënanga? Onanga yowango de yäora Ahi umati, deʼ komaiwa imä niata Ngohino.”

⁶ O nyawa madorou aha duru yohawana, ena hioko koiwa naga hömodo-modongo, hababu ma Jou Madutu wohi barihi manga kobongo o nyawa ini higogilolitino ngini; önanga ma Jou Madutu watilaka, done ngini aha nia hohihanga önanga.

⁷ O Sion ma Doporonino tanu iboa o halamati o Israel manyawaika. Done o Yakub aidifauku aha yomorene, nako ma Jou wa hidiai oli Ai umati hokä mahira oli.