O MAZMUR 50 - MA JOU AI BUKU O ABARI MA OA

O pupuji madutu

¹ O Asaf ai Mazmur. Ma Jou, o Jou Madutu Duru Woko Kuaha, wotemo-temo; Unanga wopoaka o dunia yamode-modekika o wange mahiwaroko hiädono o wange madumuniha.

² O Sion de waino, o kota duru ihohailoa, ma Jou Madutu wotagi ai himangika de ai cahaya.

³ Tongone nanga Jou Madutu woboa deʼ woma riridua, Unanga iwi hihira o uku ial̄e-al̄eme, deʼ iwi higiloliti o rato homodo-modongo.

⁴ Unanga wa ahoko o dihanga deʼ o dunia mangale ihakihi Unanga wätailako Ai umati yatiai ekola yahowono.

⁵ Wato, ”Tatoomu Ahi umati mata-mata yalikoka o jaji dede Ngohi deʼ ihi kekekete de o huba yatoa-toaka.”

⁶ O dihanga ihi ngahu ma Jou Madutu wätailako Ai umati yatiai ekola yahowono, deʼ Unanga mahirete manga hakimi.

⁷ ”Ni ihene, Ahi umati, Ngohi tomau totemo-temo, Israel, Ngohi tomau tohakihi nginika; Ngohi nënanga ma Jou Madutu, nia Jou Madutu.

⁸ Koigoungua karana nia huhuba Ngohi tinï kalaki; nia huhuba itö tuhu-tuhuku salalu naga Ahi himangoka.

⁹ Ngohi toparaluua o hapi nia kurungaka, ekola o kabingi nia aiwani o gigini dematikaka;

¹⁰ hababu mata-mata o aiwani o honganoka ganga to Ngohi, deʼ o aiwani o gigini ol̄oku mabuturungoka dema ribu-ribuhu.

¹¹ Mata-mata o totaleo ol̄okuoka kato Ngohioli, deʼ hagala o dodadi iwö wango-wango o tonaka ikokakahaka.

¹² Nako Ngohi ihi hahini, iparaluua Tahetongo nginika, hababu o dunia de madol̄a gënanga to Ngohi.

¹³ Ngohi ta ol̄omua o hapi manauru ma akeme, ta okerua o kabingi manauru ma awunu.

¹⁴ Nihi huba o syukur mahuhuba ma Jou Madutuika, nia jaji nia ganapu ma Jou Woko Kurutil̄eika.

¹⁵ Nipöaka Ngohino maöraha ini hidehoto, Ngohi aha tinihibebasi ngini, deʼ ngini aha nihihigiriri Ngohi.”

¹⁶ Mä o nyawa madorouika ma Jou wätemo, ”Ngona ani hakua nahetongo Ahi tita, deʼ notemo-temo mangale Ahi jaji.

¹⁷ Hababu ngona noluku natarima Ahi hidaaere, deʼ natila hagala Ahi pareta.

¹⁸ Nako nïmake womatengo wotohi-tohiki, ngona ninïki ünanga, deʼ ngona nimateke dodiawo de hagala o nyawa yohuda-hudali.

¹⁹ Ngona salalu nahetongo itotorou, deʼ salalu noma hidiai deo tengeluku.

²⁰ Ngona kahokogenangika näfitana ani riadodoto deʼ nïtetemo ani dodoto madutu.

²¹ Genanga doka nadodiai, mä Ngohi katoma riridoka dika hoʼ napikiri Ngohi hokä ngona. Mä öraha nënanga Ngohi tonï ngelo ngona, deʼ mata-mata gënanga Tohidadi inyata ngonaika.

²² Nia tailako nihidodiai, ngini niwi woha-wohanga ma Jou Madutuika; nima goana uha hiädono ngini Tinï binaha, deʼ moiua ini hihalamati.

²³ O nyawa ihi huba-huba o syukur hokä ai huhuba, geünanga doka Ngohi wohi horomati; deʼ o nyawa ima sosadiaika manga ngekomo aha Tahimatoko o halamati Ngohioka deyaino.”