O MAZMUR 48 - MA JOU AI BUKU O ABARI MA OA

O Sion ma Jou Madutu Ai Kota

¹ O Mazmur o Korah ai ahaluku.

² Igoungu nokurutil̄e Jou deʼ duru ka ini higogiriri tongone nanga Jou Madutu Ai Kotaka, o doporono o doporono itebi-tebinoka.

³ O Sion, ma Jou Madutu Ai Doporono itubuil̄e mahailoa ma Koano Woko Kurutil̄e ai kota o dunia ingodumu yodumorene.

⁴ Ma Jou Madutu wogogere Ai kadato magoronaka, i nyata Unanga mahirete ma hohohongo.

⁵ Nia make, o kokoano ima toomu, önanga yoboa yomau yoparangi.

⁶ Mä de yamake o doporono gënanga, önanga yoheranga; önanga yoburakituku deʼ yopiringana imahiko korikokaua.

⁷ Dokengoka önanga yohahara yohawana deʼ kamanga hiri, hokä o ngoheka momau ami ngohaka ima hiadono,

⁸ hokä o kapa iwedere o taufani magoronaka.

⁹ Hokä ngone hoihe-ihene, o oraha nënanga ngone hamake, ma Jou Duru Wokokuaha ai kotaka. O kota gënanga ganga tongone nanga Jou Madutu Ai kota, Unanga wöriwo kahiado-adonika.

¹⁰ Ani tau magoronaka ngomi mia tötakihiri Ani dora ya Jou Madutu.

¹¹ Ani romanga kaya heto-hetongo deʼ ihi gogiriri o dunia yamode-modekika, ngona nopareta de ma adili.

¹² Mal̄aikala o Sion deʼ o Yehuda makawaha youlili yomore-morene, karana Ngona nähukumu toönanga manga lawani.

¹³ Nia kiloliti o Sion, nio giloliti ënanga, deʼ nia etongo macandi.

¹⁴ Nia tailako nihidodiai mabebeno o mehele, nia tailako o tentara manga ngï, hupaya ngini yakunu nihi jarita nia ngohaka de nia danongika:

¹⁵ ”Unanga ma Jou Madutu, tongone nanga Jou Madutu kahiado-adonika, Unanga aha wonä tuda ngone hiadono ikakali.”