O MAZMUR 47 - MA JOU AI BUKU O ABARI MA OA

Ma Jou Madutu Woko Kuaha Woko Kurutil̄e

¹ O Korah ai ahali manga Mazmur. Mangale yonyä nyanyi manga tutuda.

² Nipopoka de nia morene, hei hagala o hoana deo berera ma nyawa! Niwi higiriri ma Jou Madutu de niulili de nihagaga!

³ Hababu ma Jou Duru Woko Kurutil̄e ganga himodo-modongo, ma Koano Womo Mulia wokuaha o dunia yamode-modekika.

⁴ Unanga wona hidöaka ngone hautumu hagala o hoana deo berera, wadiai ngone hakuaha hagala o hoana deo berera.

⁵ Unanga wona ngiriki tongone nanga tonaka puhaka, wohiamo-amoko o hoana deo berera Wä dora-dora.

⁶ Ma Jou Madutu wodoaka Ai popareta makuruhiil̄e iwi higiniki o ulili de o hagaga deʼ o guguli mailingi.

⁷ Nihi nyanyi o higiriri ma Jou Madutuika, nihi nyanyi o higiriri tongone nanga koanoika!

⁸ Ma Jou Madutu ganga o dunia yamode-modekika ma koano, Unanga niwi higiriri deo nyanyi nia ilingi ialu-aluhu!

⁹ Ma Jou Madutu wogogeruku ai popareta makuruhi itebi-tebini mal̄okuoka; Unanga wapareta hagala o hoana deo berera.

¹⁰ Hagala o hoana deo berera manga tutuda imatoomu yodadi kamoi hokä ma Jou Madutu Ai umati o Abraham wohi gogiriri. Hababu ma Jou Madutu ganga o Koano de hagala o koano, Unanga duru wokurutil̄e deʼ womulia.