O MAZMUR 46 - MA JOU AI BUKU O ABARI MA OA

Ma Jou Madutu dede ngone deʼ wonä riwo ngone

¹ O Korah ai ahali manga mazmur. Mangale yonyä nyanyi manga tutuda. De o Alamot ma lugo.

² Ma Jou Madutu ganga nanga hohohongo deʼ tongone nanga kuata; Unanga salalu woma sadia deʼ wakunu wonʼa riwo o hidehoto magoronaka,

³ Done ngone hohawanua, ngaroko o dunia igiwi, deʼ hagala ol̄oku yalutu o gahi matitiuku;

⁴ ngaroko o ngoto ingamo ikiniki deʼ imoku-moku deʼ hagala o doporono ihahara managale magogohara.

⁵ Naga o ngairi mahahuru yamorene ma Jou Madutu Ai Kota. Ma Jou Madutu Woko Kurutil̄e ai gogere mangi.

⁶ Ma Jou Madutu wogogere dokengoka, done o kota gënanga aha koi boditoua; Unanga aha wöriwo maöraha danangino ibatingi.

⁷ Ma Jou Madutu woma dotoreke, done o dunia iwede-wederuku; hagala o hoana manyawa yoburakituku, hagala o popareta i ruba.

⁸ Ma Jou Duru Woko kuaha dede ngone, o Yakub ai Jou Madutu wonä hohongo ngone.

⁹ Niaino, nio lega okia ma Jou wakö karajanga; hokokia ho dodokana Ai manarama o duniaka!

¹⁰ Unanga wohi bareti o parangi o dunia yamode-modekika, o toimi deʼ o kuama Wawedere, o dadatoko mahohululunu Watuhuku.

¹¹ Wato, ”Nibareti nima teke parangi; nihioriki, Ngohi nënanga ma Jou Madutu, Ngohi tokurutil̄e hagala o hoana deo berera manyawa mana hidogoronaka, tokurutil̄e o dunia yamode-modekika.”

¹² Ma Jou Duru Woko uaha dede ngone, o Yakub ai Jou Madutu wonä hohongo ngone.