O MAZMUR 42 - MA JOU AI BUKU O ABARI MA OA

O BUKU MAHINOTOKA: MAZMUR 42–72 O niniata o tabuanga matonakoka

¹ Mangale yonyä nyanyi manga tutada. O Korah ai ahali manga dodotoko ma nyanyi.

² Hokä o maijanga duru yonahihu o ngairi ma akere, hoko gënanga ahi jiwa duru inï hohininga Ngona, ya Jou.

³ Ngohi duru tihohininga ma Jou Madutu wowango-wango, muruonoka ngohi yakunu toiki topuji Ai Tauoka?

⁴ O hutu deo wange ngohi toari, ahi inomo duga-duga kao kongo. O wange magurutu ahi haturu yoleha, ”Kiaka ani Jou Madutu?”

⁵ Ahi hininga ihuha nako tomahininga kahuruonino, maöraha ngohi todumutu ma Jou Ai Tauika mima kutuono deo nyawa yowöe-wöe yododiai o rame. Ngohi totagi o duduono mahimangoka deo ulili deʼ o hagaga deo higiriri manyanyi.

⁶ Yadodoaho ahi hininga ihuha deʼ kato hawa-hawanika? Ngohi toma hinganono ma Jou Madutuika. Done ngohi aha tosyukuroli Unangika, ahi Jou Madutuika deʼ wohihi hohalamati.

^7-8 O tabuanga matonakoka nënanga ahi hininga iwede-wederuku, hababu gënanga ngohi tomä hininga ma Jouika. Ahi jiwa il̄ahini o hininga mahuha mabauhu magoronaka, ngohi ihi ohanoko o huru-hara manguihi; hokä o Yordan ma Ngairi magiwe ma akere maruruhu o Hermon mal̄oku deʼ o Mizar mal̄okuoka de yaino.

⁹ Tanu ma Jou wohimatoko Ai dora maöraha o wangeoka, hupaya o hutu-hutu ngohi yakunu tonyanyi, deʼ tomä niata ma Jou Madutuika ahi wowango matiti.

¹⁰ Ngohi totemo ma Jou Madutuika, ahi roriwo, ”Yadodoaho Ngona nohiwohanga ngohi? Yadodoaho ngohi kokiani kahokogenangika tohuha de tohangihara karana ihituku hagala ahi haturu?”

¹¹ Ahi hininga iwede-wederuku karana ahi haturu manga hohedu. Onanga kahokogenangika yoleha, ”Kiaka ani Jou Madutu?”

¹² Yadodoaho ahi hininga ihuha deʼ kato hawa-hawanika? Ngohi tomahi nganono ma Jou Madutuika. Done ngohi aha tosyukuroli Unangika, ahi Jou Madutuika deʼ wohihi hohalamati.