O MAZMUR 37 - MA JOU AI BUKU O ABARI MA OA

Okia naga ida dadi o nyawa madorouika deʼ o nyawa maoaika

¹ O Daudino. Uha nihawatere karana o nyawa madorou, uha nia dohata o nyawa yododiai o howono.

² Hababu önanga itaiti yohihanga hokä o momo, deʼ yomaai hokä idö dato-datomo maijo-ijo.

³ Niwi ngaku ma Jouika, deʼ nia diai o oa-oa, nigogere o bereraka gënanga deʼ nimadiai yososatia.

⁴ Nolingiri ani utumu ma Jouoka, Unanga aha wohitotomo ani hininga mamau.

⁵ Nohidöaka ani ngango ma Jouika, noma hinganono Unangika, Unanga aha wonï riwo.

⁶ Unanga aha wohinyata ani satia hokä o dararono, deʼ ani hininga madebini hokä o wange-wange.

⁷ Nidamä ma Jou de ani hininga madö dumuloa, Notamä de ani sabari hiädono Unanga okianaga Wadiai. Uha nohawatere karana o nyawa manga wowango ihasili, ekola yadodiai o tengeluku.

⁸ Uha ini tohata deʼ ani hininga yohauku, gënanga duga-duga inigao o bodito.

⁹ Hababu o nyawa yododiai o dorou aha yohihanga, mä o nyawa ima hingano-nganono ma Jouika aha yapuhaka o tonaka gënanga.

¹⁰ O nyawa madorou aha yohihanga itaiti, nako iwi lingiri, ünanga koiwiwaka.

¹¹ O nyawa manga hininga itotipokouku aha yapuhaka o tonaka gënanga, deʼ yamao isanangi ihasili ma amoko dema boboloi.

¹² O nyawa madorou yodatoro itotorou o nyawa maoaika, deʼ iwi pulono de manga dohata.

¹³ Mä ma Jou wagogiete o nyawa madorou, hababu Unanga wohiöriki ai wange mabaha o nyawa gënanga itigioka.

¹⁴ O nyawa madorou yarahuku manga oworo deʼ manga toimi ihi meta, layä toma o nyawa mihikini deʼ yohö hangihara, lawä toaka o nyawa yowango yaoa-oa.

¹⁵ Mä o nyawa madorou aha manga oworo mahirete yähakara, toönanga manga toimi mal̄eha aha itobiki.

¹⁶ O baranga mahuhutulu tö nyawa maoa maija iholoi detö nyawa madorou manga kiahonanga dema boboloi.

¹⁷ Hababu o nyawa madorou manga kuaha aha ma Jou watobiki, mä o nyawa maoa Wä hohongino.

¹⁸ Ma Jou wögoana o nyawa manga wowango itebi-tebini, toönanga manga puhaka hirahi kahiado-adonika.

¹⁹ Maöraha yahidehotoönanga aha koyo hangiharaua, maöraha o habirokata önanga aha okiaua yokuranga.

²⁰ Mä o nyawa madorou aha yobinaha, ma Jou Ai haturu aha yohihanga hokä o bunga o tonaka malua-luasoka, önanga aha yohihanga o nofo magoronaka.

²¹ O nyawa madorou yobau deʼ kohigilioua, mä o nyawa maoa ihidöaka de manga hininga imura.

²² O nyawa ma Jou wahibö barakati aha yapuhaka o tonaka gënanga, mä o nyawa Wahi lololai aha yäduhu.

²³ Ma Jou wätuda o ngekomika kokiani yanonu, Unanga wohikekete o nyawa manga wowango ai hininga yadae-daene Unangika.

²⁴ Nako iwi otaka, ünanga aha ai nabo ilago-agomua, hababu ma Jou wasö ai giama.

²⁵ Ngohi katomä göikahi hiädono ihi perekioka, komaiwa tamake o nyawa maoa ma Jou wämal̄aika, ekola aingohaka de ai danongo yodadi o nyawa yogaho-gahoko.

²⁶ Unanga salalu wahibau deʼ wahidöaka, deʼ ai ngoha-ngohaka yodadi o barakati unangika.

²⁷ Nia mal̄a itotorou, niadiai maoa-oa, done kahiado-adonika nia difauku yögogere o tonaka gënanga.

²⁸ Hababu ma Jou wöigo o manarama maoa-oa deʼ iadili, o nyawa yososatia Unangika Wämal̄aikaua moiua yäpaliara. Unanga wähohongo önanga kahiado-adonika, mä o nyawa madorou manga difauku aha yäbinaha.

²⁹ O nyawa manga wowango itebi-tebini aha yapuhaka o tonaka gënanga, deʼ yögogere kahiado-adonika.

³⁰ O nyawa maoa wotemo-temo de ai barija, ünanga salalu worikoto ai demo-demo magoronaka.

³¹ Ai Jou Madutu Ai tita wagogono ai hininga magoronaka, de ünanga kowö rehenua.

³² O nyawa maoa iwihi dahe-dahe o nyawa madorou, yolingiri o öraha mangale iwi toma.

³³ Mä ma Jou wïmal̄aikaua ünanga wotifa o haturu manga giamika, ekola iwi hukumu maöraha yalingiri wahowono ekola watiai.

³⁴ Noma hinganono ma Jouika deʼ nohingounu Ai pareta, done Unanga woni goraka ngona mangale napuhaka o tonaka gënanga; ngona aha namake o nyawa madorou yahohihanga.

³⁵ Ngohi tämakeoka o nyawa madorou wöigo wotemo wohi hohomoa; ünanga hokä o gota mautu maboburere deʼ imahi ngutuku ilukuku.

³⁶ Maöraha ngohi takaino ünanga koiwiwaka, ünanga tïlingiri mä tïmakeua.

³⁷ Nia tailako nihidodiai o nyawa maoa deʼ manga hininga iriko-rikoto; o nyawa yöigo-igo o dame manga himangika yaoa.

³⁸ Mä o baradoha manyawa aha yäbinaha; toönanga manga difauku aha yähohihanga.

³⁹ Ma Jou wahihalamati o nyawa manga wowango itebi-tebini deʼ wähohongo önanga maöraha yahidehoto.

⁴⁰ Unanga wäriwo deʼ wahihalamati, deʼ wahirehene deo nyawa madorou, hababu önanga ima hohongo Unangika.