O MAZMUR 36 - MA JOU AI BUKU O ABARI MA OA

O nyawa manga dorou deʼ ma Jou Madutu Ai oa

¹ Mangale yonyä nyanyi manga tutuda. O Daud ma Jou Ai gilaongino.

O nyawa manga dorou

² O baradoha itemo-temo o nyawa madorou ai hininga magoronaka, ünanga hakali-kali kowï modongua ma Jou Madutuika.

³ Unanga womamao ai diri duru kai kuata, hiädono kowa maoua ai howono, deʼ kowö dohatua.

⁴ Ai demo-demo itorou deʼ iomanga o tengeluku, ünanga wodiaiokaua maoa-oa deʼ o sawaro.

⁵ Ai ngidu-ngiduoka ünanga wohidailako o dorou; ai manarama koiwa maoa-oa, madorou watilaua.

Ma Jou Madutu Ai oa

⁶ Jou, Ani dora magurutil̄e hokö dihanga, deʼ Ani satia yadono o lobi.

⁷ Ani oa itubuil̄e magurutil̄e imatero ol̄oku, deʼ Ani adili malukuuku imatero o ngöto; o nyawa deʼ o aiwani Nä paliara, ya Jou.

⁸ Hokokia maragane Ani dora, ya Jou Madutu, o nyawa imä hohongo Ani gahuhu mahohohongo magoronaka.

⁹ Onanga yosanangi deo inomo dema boloi Ani Tauoka, de haoke-okere Ani ngairino yamao isanangi.

¹⁰ Ngona hagala o dodadi manga wowango matiti, Ani dararono magoronaka ngomi mia make o dararono.

¹¹ Tanu Ngona kahirahi nä dora o nyawa ini nako-nako Ngona, deʼ nodiai o oa o nyawa manga hininga itebi-tebinika.

¹² Uha nohi dogumal̄aika ngohi ihï ngino o nyawa yoede-edenge, ekola o nyawa madorou ihi duhu.

¹³ Namake o nyawa o dorou yododiai yä otakoka, önanga yolulumomiki deʼ yakunokaua yomomikoli.