O MAZMUR 35 - MA JOU AI BUKU O ABARI MA OA

O niniata wogahoko o roriwo

¹ O Daud ai Mazmur. Jou, nä lawani o nyawa ihi lawa-lawani ngohi, nä parangi o nyawa ihi poparangi ngohi.

² Nomä l̄ë Ani babarihi deʼ Ani dadatoko, deʼ noma oko nohï riwo.

³ Nomä goraka ani tutuduku deʼ ani kuama mangale nälawani o nyawa ihi goginiki ngohi. Nahetongo ngohino Ngona nohihi hohalamati.

⁴ Mal̄aika o nyawa yomau ihitö toma-toma ngohi yahohihanga deʼ yahi mal̄eke. Mal̄aikala o nyawa ima totoomu ihi lawani ngohi imadohuku de yobingu.

⁵ Mal̄aikala önanga yäduhu ma Jou Ai malaekati hokä o gandum ma afa o hidal̄oko ihibarihi.

⁶ Mal̄aikala önanga yakinïki ma Jou Ai malaekat o ngekomo mahohuhutu deʼ mabobaakoroka.

⁷ Parasuma önanga ihi akana o modoi mangale ngohi ekola yohaiti o baiti mangale ihi tagoko.

⁸ Mal̄aikala önanga yätapal̄u o binaha koima nako-nakoua. Mal̄aikala önanga yätagoko manga dadatoko mahirete magoronaka daha yäotaka deʼ yobinaha.

⁹ Done ngohi touli-ulili karana ma Jou, ahi hininga imorene hababu Unanga wohihihalamati.

¹⁰ De ahi hininga magahumu ngohi totemo, ”Jou, Ngona koiwa honi hitero! Ngona nälapahi yobole-bole yokua-kuatino yomömihikini deʼ yohöhangihara yahikokaukuino.”

¹¹ Yohöhakihi itotorou ima okoihi lawani Ngohi, deʼ yokalaki ngohi todiai o hali kotanako-nakoua.

¹² Ahi oa önanga yabalahi deo dorou; ngohi ihi lutu ahi ngonganono itoaka magoronaka.

¹³ Maöraha önanga yopanyake, ngohi ahi hininga ihuha deʼ kotohi ol̄o-ol̄omua; ngohi tomä niata ahi häeke tohitudukuku,

¹⁴ hokä tiniata ahi dodoto womatengo ekola ahi hobata womatengo. Ngohi tomarukuku tägari önanga, hokä ngohi tohaharu mangale ngohi ayo mahirete.

¹⁵ Mä maöraha ngohi tohuha, önanga yosanangi, deʼ imatoomu ihi lawani ngohi. Onanga imä dagi imasega-sega mangale ihi hikauku ngohi.

¹⁶ Onanga ima togu-togumua iwi hohedu womatengo wolugu-lugu, deʼ ihi pulono ngohi de manga dohata.

¹⁷ Hiädono muruonoka, ya Jou, hiädono muruonoka Ngona duga-duga kanohi pulo-pulono dika? Nohihihalamati ngohi de toönanga manga gogohara, nohirehene ahi nyawa de hagala o singa gënanga.

¹⁸ Done ngohi aha tosyukur Ngonaika Ani umati manga hidogoronaka, deʼ tohigiriri Ani romanga toönanga manga gamake magoronaka.

¹⁹ Uha nohigumal̄a ngohi ima higogule o nyawa ihihö haturu ngohi de koiwa mahababu, Uha nohigumal̄a ngohi ihihi ulili o nyawa ihï doha-dohata ngohi dema titi okia-kiaua.

²⁰ Toönanga manga ade-ade koiwa mabole önanga ihidailako o tengeluku o nyawa yowango ima kaao irorahaika.

²¹ Onanga ima pöa-pöaka ngohino deʼ yotemo önanga yamakeoka ahi manarama.

²² Mä Ngona, Jou, namakeoka; uha noma rirïdi, ya Jou, uha nokurutika dede ngohi.

²³ Noma oko Nö riwo ahi perekara, ya ahi Jou Madutu deʼ ahi Jou, nohiriwo ngohi!

²⁴ Nohihiboa ngohi, hababu Ngona noadili, ya Jou ahi Jou Madutu, uha nä mal̄aika ahi haturu ihihi uli-ulili.

²⁵ Uha nä mal̄aika önanga yotemo manga hininga magoronaka, ”Syukur, ngone hahohihangoka ai jiwa. Tongone nanga nahihu hohi aikoka!”

²⁶ Mal̄aika o nyawa yososanangi yamake ahi hangihara yobingu deʼ yamake o mal̄eke. Mal̄aikala o nyawa ihïdode edenge ngohino yähikauku deʼ yahi mal̄eke.

²⁷ Tanu o nyawa yoigo-igo ihi make ngohi tatiai youlili deʼ yomorene. Tanu önanga yogogilio yotemo, ”Igoungu ma Jou womulia! Unanga wöigo Ai gilaongo manga halamati!”

²⁸ Done ngohi aha tohi ngahu-ngahu Ani adili, deʼ toni higiriri Ngona o wange magurutu.