O MAZMUR 32 - MA JOU AI BUKU O ABARI MA OA

O mangaku deʼ o apongo

¹ O Daud ai Mazmur. O dodotoko manyanyi. Youtumu o nyawa manga baradoha yahi apongo, deʼ manga howono yahimaafu.

² Youtumu o nyawa manga dorou ma Jou wadegetongua, deʼ yöigoua yotipu.

³ Hoko gënanga madekana ngohi tomangakua ahi baradoha, ngohi kato popanyake karana tokurutie o wange magurutu.

⁴ O hutu de o wange Ngona nohi tuku, Jou, ahi kuata imata hokä o wange mahauku yadudungu.

⁵ De ngohi tomangaku ahi baradoha Ngonaika, ahi howono koiwa naga taiu-iunu. Ngohi toma putuhu mangale tomangaku Ngonaika, deʼ Ngona nohihiapongo mata-mata ahi baradoha.

⁶ Hababu gënanga o nyawa moi-moi manga hininga itebi-tebini kokiani imä niata maöraha yamao yahidehoto, hiädono nako o huha manguihi iboa, ünanga iwi olua.

⁷ Ka Ngona ahi ngï tomangiunu, Nohihirehene deo hangihara. Done ngohi toulili tomorene, hababu Ngona nohi hihalamati.

⁸ Ma Jou wato, ”Ngohi aha Tonihidumutu o ngekomo kokiani ngona nanonu, ngona aha Tonituda deʼ Toninasihati.

⁹ Uha hokä o kuda ma akali koiwa-iwa, kokiani yapareta de o behi deʼ o gumini hupaya imahimoteke.”

¹⁰ O baradoha manyawa iwöe o hangihara yatapal̄u; mä o nyawa imahingano-nganono ma Jouika kahirahi Ai dora yahohongino.

¹¹ Hei hagala o nyawa nia wowango itebi-tebini, nimorene deʼ nima garago karana okianaga ma Jou wadodiaioka. Niulili nimorene, hei mata-mata o nyawa nia hininga itebi-tebini!