O MAZMUR 20 - MA JOU AI BUKU O ABARI MA OA

O niniata wogahoko o utumu

¹ Mangale yonyä nyanyi manga tutuda. O Daud ai Mazmur.

² Tanu ma Jou wonï baluhu ngona maöraha ini hidehotuku, tanu o Yakub ai Jou Madutu Ai kuaha ini hohongo ngona!

³ Tanu Ai Tauoka de yaino wohi dingoto Ai bobatumu, deʼ o Sion ma Doporonino wohidöaka o roriwo.

⁴ Tanu Unanga wohininga mata-mata ani huba, deʼ wosanangi de hagala ani huhuba yatö tuhu-tuhuku.

⁵ Tanu Unanga woni hidöaka hagala noigo-igo, deʼ wadiai ani hidailako ihasili.

⁶ Done ngomi mimorene de miulili karana ani utumu, deʼ mitubo o paji-paji mangale miwi higiriri tongone nanga Jou Madutu. Tanu ma Jou wohi moteke hagala ani gogahoko.

⁷ O öraha nënanga ngohi tohioriki ma Jou wohidöaka outumu ma koanoika Wi iri-iriki. Ai horoga itebi-tebinoka de yaino ma Jou wïbaluhu; dema Jou Ai kuaha ünanga wamake o utumu ma amoko.

⁸ Naga o nyawa wönganono ai kereta ihi poparangi, nagaoli wönganono ai kuda. Mä ngone hönganono ma Jou Ai kuaha, tongone nanga Jou Madutu.

⁹ Onanga aha yopeleke deʼ yoruba, mä ngone aha homomiki deʼ ibitumu homa okoil̄e.

¹⁰ Ya Jou, nohidöaka o utumu ma koanoika, nomï baluhu maöraha ngomi mipöaka.