O MAZMUR 2 - MA JOU AI BUKU O ABARI MA OA

O koano ma Jou Madutu Ai ngongiriki

¹ Yadodoaho o hoana deo berera manyawa yodiai o huru-hara deʼ o hoana deo berera manyawa yödatoro ipö parahaja?

² O kokoano o duniaka kamamoil̄e yomomiki deʼ yokö kokuaha imateke fakati iwi lawani ma Jou deʼ ma koano woma ngiri-ngiriki.

³ Yokokuaha gënanga yotemo, ”Niaino ngone hatobiki toönanga manga kuaha deʼ hohidailako homaoko mahirete!”

⁴ Ai popareta makuruhino o horogaka ma Jou woiete, deʼ wölegaikaua toönanga manga datoro.

⁵ Daha önanga Wä dodorohu de Ai dohata, deʼ wä todokana de Ai gangamo.

⁶ Wato, ”O Sion Ahi doporonoka itö tebi-tebini Tï tedeoka ma koano toma ngiri-ngiriki.”

⁷ Ma koano wato, ”Ngohi tomau tohingahu okianaga wohi totatapuoka ma Jou. Ngohino wato, ’Ngohi Ahingohaka o nauru, o wange nënanga Ngohi todadi ani Ama.

⁸ Nogahoko, done mata-mata o hoana deo berera Toni hidöaka ngonaika, deʼ o dunia yamode-modekika Tadiai idadi tongona.

⁹ Onanga aha nätobiki deo diki-diki o behi deʼ nawedere hokä o bohoko o tonaka.’ ”

¹⁰ Hoʼ nia tailako nihidodiai, hei kokoano, nio noa nia hiningaika hei nikokuaha o duniaka!

¹¹ Nipuji ma Jouika de nia dodato,

¹² nihuba Ai himangoka de kanima hidahaharuku, uha hiädono ma Jou idadi iwi tohata deʼ ngini kaitodokanino Winï binaha, hababu itodokanino Ai dohata itoka-tokara. Youtumu o nyawa ima hö hohongo ma Jouika!