O MAZMUR 16 - MA JOU AI BUKU O ABARI MA OA

O niniata iomanga de o ngongaku

¹ O Daud ai Mazmur. Nohï goana ngohi, ya Jou Madutu, hababu Ngonaika ngohi toma hohongo.

² Ngohi totemo, ”Ngona ahi Jou, tongohi ahi utumu, koiwa naga yoholoi de Ngona!”

³ Tä horomati o nyawa yotebi-tebini o bereraka nënanga; ahi morene ena genangala togogere komamoi dede önanga.

⁴ Mal̄aika o nyawa yahuba-huba o gikiri manga hininga mahuha kai dogo-dogo. Ngohi toluku tohidöaka o huhuba hagala o gikirika, maboboloi toluku tahetongo toönanga manga romanga.

⁵ Jou, Ngonaika katongohi; Ngona nohihi döaka hagala topö paralu, ahi nasib naga Ani giama mahoatoka.

⁶ Igoungu ihailoa Ani ngongike ngohino, duru yasanangi ahi hininga!

⁷ Ngohi tihigiriri ma Jou wohi nonasihati; maöraha o hutu-hutu ahi hininga madobote ihi hidotoko ngohi.

⁸ Ngohi salalu tomä hininga ma Jouika; Unanga naga ahi datekoka, done ngohi koto giwiua.

⁹ Hababu gënanga ahi hininga imorene, deʼahi jiwa iulili, deʼ ahi röehe ima hibatongo ihi dodiai.

¹⁰ Hababu Ngona nohi mal̄aikaua ngohi tohonenge; o nyawa Nä dora-dora Nä mal̄aikaua yobinaha.

¹¹ Nohi hidumutu ngohino o ngekomo madumutu o wowango; Ngonaka ngohi tamake o morene dema boboloi deʼ o utumu kahiado-adonika.