O MAZMUR 147 - MA JOU AI BUKU O ABARI MA OA

O higiriri mangale ma Jou Madutu Duru Wokokuahaika

¹ Niwihigiriri ma Jou! Hababu yaoa hïhigiriri Unanga, deʼ hosanangi mangale hohi nyanyi o higiriri mangale Unanga.

² Ma Jou aha wohigilio o Yerusalem hoi hira-hirali; o nyawa yototabuanga aha yä ao yolio.

³ Unanga wahitogumu o nyawa manga hininga itobi-tobiki, deʼ wapakiti toönanga manga nabo.

⁴ Unanga wohi tantu mangöe o murumu o gitawaka, deʼ moi-moi maromanga Wohidöaka.

⁵ I goungu wolamoko de duru hïmodongo tongone nanga Jou, Ai barija koiwa mabatingi.

⁶ Unanga wätikil̄e o nyawa yatö tuku-tuku, mä o nyawa madorou Wahikaweli o tonakuku.

⁷ Nihi nyanyi o higiriri mangale ma Jou, nihigogule o kecapi mangale tongone nanga Jou Madutu.

⁸ Ge Unanga wohihohe o lobi o dihangoka; Unanga wasadia o awana mangale o tonaka, deʼ wadiai o momo iwango o doporonoka.

⁹ Unanga wohidöaka o inomo o aiwanika, deʼ o wogono mangohakika o aho-ahoko.

¹⁰ Ma Jou Ai ngigo o kudaua ikökua-kuata; koyo poparangiua yobobarani.

¹¹ Ma Jou wosanangi o nyawa iwimö modo-modongika, o nyawa kahirahi yönganono Ai doraika.

¹² Nïhigiriri ma Jou, hei Yerusalem! Nïhigiriri ani Jou Madutu, hei Sion!

¹³ Hababu Unanga wakekete Ani ngorana ilö lago-agomo, deʼ wahibarakati inï gogogere.

¹⁴ Unanga wögoana ani daera hupaya kahirahi irirïdi, deʼ ngona ini punuhu de o gandum duru maoa-oa.

¹⁵ Unanga wohidöaka o pareta o duniaika, deʼ Ai demo dema japati yadiai.

¹⁶ Unanga wohiguti o domoata hokä o kapasi, deʼ wohibarihi o dumunitara hokä o kafo.

¹⁷ Unanga wohiguti o es hokä o helewo ma hohumujuru, koiwa naga yotongohono yöhimanga toena mamata.

¹⁸ Daha de Ai pareta o es gënanga iwaro; Unanga wawuwu o hidal̄oko, deo akere ihahuru.

¹⁹ Unanga wohiädono Ai behehongo Ai umatika, wohitotatapu deʼ Ai tita o umati Wairi-irikika.

²⁰ Unanga kowadiaiua o hoana deo berera mahomoaika, önanga koyanakoua Ai tita. Niwihigiriri ma Jou!