O MAZMUR 143 - MA JOU AI BUKU O ABARI MA OA

O niniata togahoko o roriwo

¹ O Daud ai Mazmur. Ya Jou, noihene ahi niniata, natailako nohidodiai ahi gogahoko. Nohï baluhu ngohi mangale Ani satia, nohimoteke ahi niniata mangale Ani adili.

² Ngohi nënanga Ani gilaongo, uha nohihi juruhakimi, hababu o nyawa moiua naga manga howono koiwa Ani himangoka.

³ Ahi haturu ihi ginïkoka deʼ ihi utumoka, deʼ ngohi ihihingohama o bui mahohuhutu magoronaika; ngohi todadi hokä o nyawa yohonenge madekanoka.

⁴ Ngohi ahi nauru itobikoka, ahi hininga duru ibingu.

⁵ Töhininga hagala o wange ipaha-pahaka; tatibanga hagala Ani manarama, tatibanga taluku-lukuku Ani gao-gao.

⁶ Ngohi toma niata Ngonaika de ahi giama itoakika; hokä o tonaka madüdudungu, ahi jiwa duru inï nahihu.

⁷ Itaiti nohïbaluhu ya Jou, hababu ngohi ahi nganono itoakoka. Uha nohï ngiunu ngohi, hupaya ngohi uha hokä o nyawa youtioka o honenge mangïuku.

⁸ O ngorumino magetongo ngohi nohihidöaka o hohininga mangale Ani dora, hababu Ngonaika ngohi tomahinganono. Ngohi nohihidumutu o ngekomo kokiani tanönonu, hababu Ngonaika ngohi tomä niata.

⁹ Ngohi toboa tomau tomahohongo Ngonaika, ya Jou, ngohi nohihibebasi ahi haturuino.

¹⁰ Ngohi nohïdotoko tadiai Ani mau, hababu Ngona ahi Jou Madutu. Ngona ani hininga yaoa, de aha ngohi nohituda o ngekomo i rata-rataika.

¹¹ Ngohi nohihihalamati imamoteke de Ani jaji, ya Jou, mangale Ani oa, ngohi nohihibebasi ito tehehotino.

¹² Mangale Ani dora näbinaha hagala ahi haturu, näbinaha mata-mata ihi tötuku-tuku, hababu ngohi Ani gilaongo.