O MAZMUR 140 - MA JOU AI BUKU O ABARI MA OA

O niniata togahoko o gogoana

¹ Mangale yonyä nyanyi manga tutuda. O Daud ai Mazmur.

² Nohihilapahi ngohi o nyawa madorouino, ya Jou, nohï goana ngohi o nyawa ihidiai dema pakisa.

³ Onanga yatatoro o dorou manga hiningaka, deʼ o wange ihi getongo yodiai o ributu.

⁴ Toönanga manga akiri hokä o dodiha dema bihaka, toönanga manga demo-demo hokä o dodiha dema rasongoka.

⁵ Ya Jou, nohigogono ngohi o nyawa madorou manga kuahaino, nohï dora ngohi o nyawa ihidiai dema pakisa de manga dungutu ihihitifa ngohi.

⁶ O nyawa manga hininga ikökurutil̄e kaima ngiu-ngiunu o modoi ihi akana mangale ngohi deʼ manga homa yatataurika mangale ihi tagoko ngohi. Toönanga manga ngekomo magurutu ihi akana o modoi mangale ihi modoi ngohi.

⁷ Ya Jou, ngohi totemo: Ngona ahi Jou Madutu, natailako nohidodiai ahi gogahoko maniniata.

⁸ Jou, ahi Jou Madutu, nohihihohalamati nokua-kuata, Ngona nohï goanoka o parangi magoronaka.

⁹ Uha nohi moteke o nyawa madorou manga nahihu, ya Jou, uha nohigumal̄a toönanga manga datoro ihasili.

¹⁰ Uha nohigumal̄a ahi haturu youtumu; mal̄aikala o demo itotorou önanga yaheto-hetongo yatapal̄u toönanga manga diri mahirete ihi föfitana ngohi.

¹¹ Mal̄aikala önanga yäkorona o uku mangaboho, deʼ yäumo o honenge mapidahuku, hiädono önanga yakunokaua yohupu.

¹² Mal̄aikala o nyawa yapöpakisa yätapal̄u o bodito, uha nahigumal̄a yoföfitana yogogere o duniaka.

¹³ Ngohi tohiöriki Ngona nohidöaka o adili o nyawa yätuku-tukuika, deʼ nöriwo o mihikini manyawa manga perekara.

¹⁴ O nyawa manga wowango i riko-rikoto aha ini higiriri Ngona; önanga aha yogogere dede Ngona.