O MAZMUR 132 - MA JOU AI BUKU O ABARI MA OA

O higiriri ma Jou Ai Tauika

¹ O duduono ikokaramatika ma nyanyi. Ya Jou, nomä hininga o Daudika, de hagala ai huha de ai hangihara.

² Uha nawohanga ai horomati Ngonaika Jou, de ai jaji Ngonaika Duru Nokö Kua-kuata, o Yakub ai Jou Madutu.

^3-4 Wato, ”Ngohi kotoma hibatongua ahi tauoka ekola tomä iduahi ngidu-ngiduoka,

⁵ ihira de tasadia o tau mangale o Yakub ai Jou Madutu, ai gogere mangï mangale ma Jou Duru Woko Kua-kuata.”

⁶ O Betlehem mabereraka ngohi toihene mangale o Jaji ma Peti, daha yamake o Yaar matonaka ikokakahaka.

⁷ Niaino ngone hoiki ma Jou wogogogere mangï ika, de hïhuba Unanga Ai popareta makuruhi mahimangoka.

⁸ Noboa deʼ nogogere Ani Tauoka, ya Jou, kamamoi de o Jaji ma Peti, Ani kuaha ma nonako.

⁹ Tanu Ani umati youlili yomorene, deʼ Ani imam-imam salalu yowango yamoteke Ani mau.

¹⁰ Mangale o Daud Ani gilaongo, uha nï tila ma koano Ani gongiriki.

¹¹ Ma Jou wokobotoka o Daudika; Unanga aha kowohi pongonua Ai jaji. Wato, ”Ani ngohaka womatengo aha Towihi dadi wokoano mangale wopareta woni tagali ngona.

¹² Nako ani ngoha-ngohaka yosatia Ahi jajiika, deʼ ihingounu hagala Ahi pareta, done kahiado-adonika toönanga manga difauku ini tagali ngona hokä o koano.”

¹³ Hababu ma Jou wairikoka o Sion; Unanga wonahihu mangale Ai gogere mangï.

¹⁴ Wato, ”Nenangokadau Ahi gogere mangï kahiado-adonika, Ngohi tönahihu topareta o ngïoka nënanga.

¹⁵ Hagala ai paralu aha Tatotomo demaboboloi, ainyawa yomö mihikini Tahiol̄omo hiädono yä punuhu.

¹⁶ Manga imam-imam ihimatoko o halamati Ngohioka, ai umati aha yonyanyi deʼ youlili yomorene.

¹⁷ Nenangoka womatengo o Daud ai difauku Towihidadi wo koano; aipareta aha Takekete.

¹⁸ Ai popareta aha salalu ihalamati, mä ai haturu-haturu aha yahimal̄eke.”