O MAZMUR 116 - MA JOU AI BUKU O ABARI MA OA

Iwi hirehene deo bodito o honenge

¹ Ngohi katï hohininga ma Jou hababu Unanga wohihi gihene ngohi deʼ watailako wohi dodiai ahi gogahoko.

² Unanga wohi gihene ahi böaka, tohi geto-getongo ngohi toma hiböaka Unangika.

³ Ngohi ihi koka modongo deo bodito o honenge; o honenge maborohono ihi horokumuku, yadiai ngohi ahi hininga ihuha deʼ tohawana.

⁴ Done ngohi toma hiböaka ma Jouika, ”Ya Jou, ngohi togahoko, nohi hihalamati ngohi!”

⁵ Ma Jou gënanga wotodora deʼ woadili; tongone nanga Jou Madutu wo omanga deo dora deo hayangi.

⁶ Ma Jou wäpaliara o nyawa biaha; maöraha ngohi tomä gakunokaua ngohi wohi hihalamati.

⁷ Tohi rïdi ahi hininga, hababu ma Jou yaoa ngohino.

⁸ Ma Jou wohi hirehenoka ngohi deo honenge; wohi laru ngohi deʼ wohi gumal̄aua ihi otaka.

⁹ Done ngohi yakunu tajame o ngango o duniaka nënanga, ma Jou Ai gogoana magoronaka.

¹⁰ Ngohi kahirahi tongaku, ngaroko ngohi totemo, ”Ngohi duru ihi tapal̄uku.”

¹¹ Ahi bingu magoronaka ngohi totemo, ”Ka womatengo ma yakunua tïngaku.”

¹² Okia aha tihidöaka ma Jouika la tabalahi Ai oa mangale ngohi?

¹³ Ngohi aha toao o huhuba o angguru mangale ma Jou la tosyukur mangale Ai roriwo.

¹⁴ Ngohi aha tohi ganapu ahi jaji Unangika yongodumu o umati manga himangoka.

¹⁵ Ma Jou duru wïhayangi womatengo wïdora-dora ai honenge.

¹⁶ Ngohi nënanga ani gilaongo, ya Jou, hokä ngohi ayo, ngohi mahoromati Ngonaika ngona nohi hilapahioka ngohi o bui ino.

¹⁷ Ngohi aha toao o syukur mahuhuba Ngonaika, inoli tohidöakil̄e ahi niniata Ngonaika.

¹⁸ Ngohi aha tohi ganapu ahi jaji ma Jouika, yongodumu o umati manga himangoka.

¹⁹ Ima totoomu ma Jou Ai Tau ma looaka, o Yerusalem makota mahidogoronaka. Niwi higiriri ma Jou!