O MAZMUR 115 - MA JOU AI BUKU O ABARI MA OA

O higiriri mangale ma Jou Duru wokokuaha

¹ Kongomiua, ya Jou, kongomiua, hababu Ngona nosatia deʼ kahirahi Nomi dora.

² Yadodoaho hagala o hoana deo berera kokiani yotemo, ”Kiani toönanga manga Jou Madutu?”

³ Tongone nanga Jou Madutu naga o horogaka, Unanga wadiai okia Wö mau-mau.

⁴ Toönanga manga gomanga o gurasi deʼ o haaka, o nyawa magiama yadodiai.

⁵ Enanga dema uruoka, mä itemo yakunua, dema lakoka, mä imahimake yakunua.

⁶ Enanga dema ngaukoka, mä i ihene yakunua dema ngunungoka, mä iame yakunua.

⁷ Enanga dema giamoka, mä ipal̄anga yakunua, de mal̄okuoka, mä imädagi yakunua, deʼ koiwa o ilingi ihö hupu-hupu mangomahiha.

⁸ Tanu hoko gënanga manga nasib hagala o nyawa yododiai, deʼ mata-mata o nyawa yangaku-ngaku enangika.

⁹ Hei Israel, nima hinganono ma Jouika, Una ganga winï riwo deʼ winï goana ngini.

¹⁰ Hei hagala imam, nima hinganono ma Jouika, Una ganga winï riwo de winï goana ngini.

¹¹ Hei mata-mata o nyawa niwï modo-modongo, nima hinganono ma Jouika, Una ganga winï riwo deʼ winï goana ngini.

¹² Ma Jou womä hininga ngoneino deʼ aha wona hibarakati ngone, Unanga aha wahi barakati o Israeloka deʼ mata-mata o imam o Harun aidifauku.

¹³ Unanga aha wahi barakati o nyawa iwï modo-modongo, kayaoa manga hohumujuru, kayaoa manga ago-agomo.

¹⁴ Tanu ma Jou wini hidöaka o ngohaka mangöe, nginiika deʼ nia difauku.

¹⁵ Tanu ngini ma Jou winihi barakati o dihanga deʼ o dunia madodadi!

¹⁶ O dihanga ganga katoma Jou dika, maʼ o dunia Wohidöaka o nyawaika.

¹⁷ Ma Jou iwi higiririua o nyawa mahonenge, o nyawa youti-utioka o ngï ihohomoauku.

¹⁸ Mä ngone howango-wango hosyukur Unangika, o öraha nënanga deʼ kahiado-adonika. Niwi higiriri ma Jou!