O MAZMUR 112 - MA JOU AI BUKU O ABARI MA OA

O nyawa maoa manga utumu

¹ Niwi higiriri ma Jou! Woutumu o nyawa wïmodo-modongo, ma Jou Ai pareta wöigo.

² Ai ngoha-ngohaka yokuaha o bereraka nënanga, o nyawa maoa manga difauku aha yahi barakati.

³ Ai tau madol̄a aha yokaya deʼ okiaua yokuranga, deʼ ünanga aha wohalamati okiaua wokuranga kahiado-adonika.

⁴ O dararono itararono o huhutu magoronaka mangale o nyawa manga hininga iriko-rikoto, mangale o nyawa yoadi-adili, yotodora deʼ yotahayangi.

⁵ Youtumu o nyawa manga hininga dema hayangi deʼ yöigo yahibau inoli manga hininga irikoto hagala manga hidailako magoronaka.

⁶ O nyawa maoa aha wohasili, ünanga aha iwi hohininga kahiado-adonika.

⁷ Unanga kowo hawanua watarima o abari itotorou, ai hininga ibitumu karana wïngaku ma Jouika.

⁸ Unanga wohawaterua ekola wohawana, karana wongaku de madiai ai haturu aha yohihanga.

⁹ Unanga wohikodoku ai arata, deʼ wohidöaka o hadaka o mihikini ma nyawaika; ünanga salalu wodiai maoa-oa, hababu gënanga ünanga wokuaha deʼ iwi horomati.

¹⁰ O nyawa madorou iwi make deʼ yätohata; önanga manga ingiri iboriti karana iwi dohata. Daha önanga yobinaha; toönanga manga ngonganono ihihanga kahiado-adonika.