O MAZMUR 110 - MA JOU AI BUKU O ABARI MA OA

Ma Jou deʼ ma koano Wi iri-iriki

¹ O Daud ai Mazmur. Ma Jou wïtemo ahi tuangika, ”Nogogeruku Ahi nirakoka, hiädono hagala ani haturu Tadiai imaponu ngonaika.”

² O Sion de waino ma Jou aha wödogo iwoata ani popareta; näkuaha hagala ani haturu!

³ Mawangeoka noboa de ani kuaha, o doporono itebi-tebinoka, ani kawaha yotagi mahimangiha de manga hininga mahuka. Hokä o dumunitara o ngoru-ngorumino, o gogoduru yoboa ngonaino.

⁴ Dema koboto ma Jou wojajioka, Unanga aha kowataurokaua. ”Ngona o imam kahiado-adonika hokä o Melkisedek.”

⁵ Ma Jou naga ani nirakoka, nako Unanga wongamo, o kokoano wähohihanga.

⁶ Unanga aha wähukumu o hoana deo berera, hiädono manga mayeti ihi kokabarihika. Unanga aha wä binaha yokokuaha o dunia yamode-modekika.

⁷ Ma koano aha wokere o akere o ngairino o ngekomo madatekoka, de wokuatoka, ünanga aha woutumu.