O MAZMUR 10 - MA JOU AI BUKU O ABARI MA OA

O niniata wogahoko o adili

¹ Yadodoaho Ngona ani gurutika, ya Jou deʼ Noma ngiunu maöraha ngomi imi hidehoto?

² De manga edenge o nyawa madorou yätuku o mihikini manyawa; mal̄aika manga homa mahirete önanga yätagoko.

³ O nyawa madorou manga demo iwöe mangale manga nahihu itotorou, o nyawa yokokal̄il̄u iwi lolai deʼ iwi tila ma Jou.

⁴ O nyawa baradoha wïhaduliua ma Jou, karana ai edenge ünanga woma pikiri koiwiwa ma Jou Madutu.

⁵ O nyawa madorou wohasili hagala ai hidailoko magoronaka; ünanga wanakoua ekola womangaratiua ma Jou Ai tita deʼ wä legaikaua ai lawani mata-mata.

⁶ Ai hiningaka wato, ”Ngohi aha koto tifaua, deʼ ahi difauku hokä o nyawa yowango itotoroua.”

⁷ Unanga kowamal̄aua wololai, wogoru-goruku deʼ wotipu, ai demo-demo iomanga deo dohata mamamao deʼ o dorou.

^8-9 Unanga woma ngiunu o kapo-kapongika womau wätoma o nyawa manga howono koiwa-iwa. Hokä o singa wototama woma hidutulukino o rurubuoka wä totailako o nyawa ima ngaku-ngakunua. Unanga kawä buhukoka o mihikini manyawa o ngï irame-rameokaua, wätagoko deʼ wätatauru.

¹⁰ Unanga woma ponu-ponu, woma hidiai womau wätagoko; ünanga wätifa o nyawa dema pakisa.

¹¹ Ai hiningaka, ”Ma Jou Madutu wäwohangoka deʼkowä legaikaua; mangale kahokogenangika Unanga kowohi makeua!”

¹² Nomomiki, Jou, nä hukumu o nyawa madorou! Nähininga o nyawa yahi kokauku!

¹³ Yadodoaho o nyawa madorou kahokogenangika iwi hikauku ma Jou Madutu deʼ yapikiri ma Jou Madutu aha kowä hukumua?

¹⁴ Mä Ngona nä make; Ngona nätailako manga huha deʼ manga hangihara, deʼ salalu noma hidiai mangale nä riwo. O nyawa ima ngö ngaku-ngakunua ihidöaka manga diri Ngonaika, Ngona salalu näriwo o mihikini manyawa.

¹⁵ Natobiki o nyawa madorou deʼ yolawa-lawani manga kuaha; deyososetiana önanga Nä hukumu onanga karana manga manarama hiädono önanga yotoba.

¹⁶ Ma Jou wopareta mangale kahiado-adonika; hagala o hoana deo berera iwi nako-nakoua Unanga aha yohihanga Ai tonakoka.

¹⁷ Jou, Ngona noihene o nyawa huha manga niniata deʼ nohi kuata manga hininga.

¹⁸ O ngohaka o gohihi deʼ o nyawa yahikokauku Nöriwo manga perekara, hupaya moiua o nyawa yähawa-hawana önanga.