O MATIUS 5 - MA JOU AI BUKU O ABARI MA OA

O riwayati o doporonoka

¹ Maöraha o Yesus wämäke manga ngöe o nyawa gënanga, Unanga wodöa o doporonil̄e. De wogogerukuoka, iwinöninïki yaino Unangino,

² deʼ Unanga womuläenge wädotoko önanga:

O utumu madutu

³ ”Yo utumu o nyawa yamäo imä gakunua, deʼ duga-duga imahi gagao ma Jouika dika; önanga ganga ma Jou Madutu Ai umati!

⁴ Yo utumu o nyawa manga hininga ihuha; ma Jou Madutu aha wä laru önanga!

⁵ Yo utumu o nyawa manga hininga ipoluluku; ma Jou Madutu aha watotomo Ai jaji onangika!

⁶ Yo utumu o nyawa duru yohininga yadiai ma Jou Madutu Ai mau; ma Jou Madutu aha wahi döaka hiädono yäwedono!

⁷ Yo utumu o nyawa yä dora o nyawa mahomoa; ma Jou Madutu aha wä dora onangö!

⁸ Yo utumu o nyawa manga hininga itebini; ona aha iwi näko ma Jou Madutu.

⁹ Yo utumu o nyawa yo ao o dame o nyawaika; ma Jou Madutu aha woma ngaku önanga hokä Ai ngoha-ngohaka!

¹⁰ Yo utumu o nyawa o aniaya yamäke karana yodiai ma Jou Madutu aimau; önanga ganga ma Jou Madutu Ai umati!

¹¹ Ni utumu ngini, nako inï hohohedu, inïaniaya, deʼ o romanga madorou inïdiai mangale Ngohi.

¹² O nabi-nabi yowango ihiraka de ngini, yä aniayaoka hoko gënanga. Nimörene deʼ nigarago, hababu tingini niahëwa kahä amoko ma Jou wasadia ukuoka mangale ngini.”

O gahi mawaja deʼ o dararono

¹³ ”Ngini ganga o dunia magahi mawaja. Nako o gahi mawaja idadi iakere, yakunu igahioli? Koiwaka mafaidä, duga-duga yaumo deʼ o nyawa yadoko-doko.

¹⁴ Ngini ganga o dunia madararono. O kota ikokelengauku o doporonoka, hamäkeua yaiunu.

¹⁵ Koiwa naga o nyawa yawango manga hilo, deʼ yatamunuka mahilo gënanga de o rube. Mauna aha wa kelenga o hilo gënanga, o hilo mangï oka, hupaya o tau magoronaka manyawa yädararono.

¹⁶ Kogenangoli niadararono kokiani yädihiwara o nyawa manga himangoka, hupaya nia manarama-manarama maoa önanga yamäke, deʼ nia Ama o horogaka iwihi giriri.”

O dodötoko mangale o Yahudioka manga agama matita

¹⁷ ”Uha niato bote Ngohi nënanga taino tahohihanga o Musa ai tita deʼ o nabi-nabi manga dodötoko. Ngohi ta ino tahohihangua, mä tohidumutu toëna mamangarati magoungu.

¹⁸ Niohohininga! Hokokia madekana o dihanga deʼ o dunia kanagahi, kama dulihi moiö de ekola matitiki moi maiteteke o tita gënanga magoronaka maaha koieheua, nako mata-mata gënanga koidadiowahi!

¹⁹ Karana gënanga, o nagona hönanga moi dika yatilakuru, o pareta-pareta gënanga, ngaroka duru maiteteke, deʼ yädotoko o nyawa mahomoa yodiai hokogënanga, aha idadi duru yoeteke ma Jou Madutu Ai umati mahidogoronaka. De o nagonahönanga yamoteke o pareta-pareta gënanga, deʼ yädotoko o nyawa mahomoa hoko genangoli yodiai, aha idadi yolamoko ma Jou Madutu Ai umati mahi dogoronaka.

²⁰ Hoʼ, niohohininga: Ngini yakunua nidadi ma Jou Madutu Ai umati, nako nimahiholoiua o agama maguru-guru, deʼ o Farisi manyawa mangale niadiai ma Jou Madutu Ai mau!”

O nasihati mangale o gangamo

²¹ ”Ngini nianäko nangaete de nangatohoraka ngone hamäke o dodötoko hoko nënanga: Uha nitoma; o nagona hönanga yotoma, kokiani yätailako yahidero o hukumanga.

²² Mä oraha nënanga Ngohi tinïtemo nginika, o nagona hönanga yängamo o nyawa mahomoa, aha yätailako yahowono ekola yatiai; deʼ o nagona hönanga yädöana o nyawa mahomoa, aha yätailako yahowono ekola yatiai o Agama ma Juru Hakimi mahimangoka. Deʼ o nagona hönanga yätemo o nyawa mahomoaika, ’Fuma,’ ipatutu yäumo o naraka maukuika.

²³ Hababu gënanga, nako ngini niahidogoronaka womatëngo, magogiriaka wohihuba ai ngongike ma Jou Madutuika, deʼ womahininga naga o nyawa manga hininga yohiri unangika,

²⁴ kokiani ünanga wamal̄aikahi aihuba gënanga o huba mangï mahimangoka, deʼ woiki wïdameohi o nyawa gënanga. Iböto de gënanga, ünanga yakunu womakilioro deʼ wohihuba ai ngongike ma Jou Madutuika.

²⁵ Ade-ade naga o nyawa inïkalaki ngini o juru hakimika, nima kadameoka de una, nako nagahi o öraha, i hira de o juru hakimika niaädono. Nako kowali, o nyawa gënanga aha winïao, winihi lapahi o hakimika, de aha o hakimi inïao, inihilapahi o polisiika. Deʼ o polisi aha inihingohama ngini o buiika.

²⁶ Deʼ niohohininga: Maraioka aha niakunua nihupu o buioka gënanga, ihira de nia bobangu niamata nifangu.”

Mangale o howono

²⁷ ”Ngini nihi oriki naga o dodötoko hoko nënanga: Uha nihowono.

²⁸ Mä örahanënanga Ngohi tinïtemo nginika: o nagona hönanga imi pulono o ngoheka momatëngo de imïnahihu, o nyawa gënanga yohowonoka de o ngoheka gënanga manga hiningaka.

²⁹ Nako anilako maniraka idadi o hababu ngona nobaradoha, natubalenge deʼ naümo anilako gënanga! De ani röehe magahumu yaümo o narakaika, iholoi yaoa nako aniröehe o hidoku moi ihihanga.

³⁰ Nako anigiama maniraka idadi o hababu ngona nobaradoha, natobiki deʼ naümo anigiama gënanga! De ani röehe magahumu iwohama o narakaika, i holoi yaoa ani giama mahononga ihihanga.”

Mangale o ngongoluku

³¹ ”Nagaö o dodötoko hokonënanga: o naguna womi oluku ngoi hekata, kokiani womihi döaka o ngongoluku mahurata munangika.

³² Mä orahanënanga Ngohi tinïtemo nginika: o nagona hönanga yäoluku manga hekata, enahioko o ngoheka gënanga mohowonua, idadi hababu o ngoheka gënanga mohowono, nako ngoi hekata gënanga mokawingoli o nyawa mahomoaika. Deʼ o nagona hönanga yokawingi de o ngoheka imi olu-olukika gënanga, onangö kayo howono.”

Mangale o koboto

³³ ”Ngini nihiöriki, nangaete de nangatohoraka hamäke o dodötoko hoko nënanga: uha anijaji natilakuru. Okia nojajioka de makoboto ma Jou Madutu aihimangoka, kokiani ngona nadiai.

³⁴ Mä örahanënanga Ngohi tinïtemo nginika: hakali-kali uha nikoboto, kayaoa de o dihanga, hababu o dihanga gënanga ma Jou Madutu aikuruhi mangï,

³⁵ ekola de o dunia, hababu o dunia ganga Ai l̄ou mahohol̄e; ekola de o Yerusalem, hababu genangala o Koano yolago-agomo manga kota.

³⁶ Uhali nokoboto de anihäeke, hababu ngona mahirete nakunua nadiai anitadauru idadi iarehe ekola itaromo, ngaro kaoutu mangai moi.

³⁷ Nitemo dika ’Igoungu’ ekola ’Kowali’ – i holoi de gënanga o Ibilihioka de yaino.”

O nasihati mangale o balaha

³⁸ ”Ngini nihiöriki nagaö o dodötoko hokonënanga: o lako madagali o lako, o ingiri madagali o ingiri.

³⁹ Mä öraha nënanga Ngohi tinï temo nginika: o nyawa o dorou yodiai nginika, onangika uha nia janggutu nia balaha. Nako o nyawa yapöka nia gotoaka maniraka, mal̄aika la yapökaoli nia gotoaka mahigili.

⁴⁰ Deʼ nako o nyawa inï kalaki o hakimika deʼ yomau yal̄ë nia baju, nia juba maniahi döaka dika.

⁴¹ Nako womatëngo o popareta winï pakisa ai baranga nia moku, magurutika o kilo moi, nia moku magurutika o kilo hinoto.

⁴² Nako o nyawa yogahoko niakia naga, niahidöaka onangika. Deʼ uhaoli nioluku o nyawa yomau yobau okia naga nginino.”

Niä dora nia haturü

⁴³ ”Ngini nihiöriki nagaö o dodötoko hokonënanga: niädora niadodiawo deʼ niadohata niahaturü.

⁴⁴ Mä öraha nënanga Ngohi tinïtemo nginika: niädora niahaturü, deʼ niahihubayanga o nyawa inï o aniaya,

⁴⁵ hupaya ngini nidadi nia Ama o horogaka ai ngoha-ngohaka. Hababu ma Jou Madutu aiwange waböa, o nyawa maoaika deʼ o nyawa madorouikaö. Una wohi guti o awana, o nyawa o oa yadodiaika deʼ o nyawa o dorou yododiaikaö.

⁴⁶ Hababu nako ngini niädora duga-duga kao nyawa inïdora-doraoka dika, wohidodoa ma Jou Madutu kokiani wabalaha niamanarama gënanga? Mode koigoungua o soungu yogaho-gahoko maka hoko genangoli yodiai?

⁴⁷ Deʼ nako ngini nihi döaka o tabea duga-duga niadodiawoika dika, okia niaboloi? O nyawa iwinäko-näkoua ma Jou Madutu kahokogënanga yodiai!

⁴⁸ Nia Ama o horogaka wä dora o nyawa makuranga okia-kiaua. Ngini kokiani hoko genangoli.”