O MATIUS 27 - MA JOU AI BUKU O ABARI MA OA

O Yesus o Pilatus aihimangoka

¹ Duru o ngoru-ngorumino, mata-mata o imam manga häeke deʼ o Yahudioka manga tutuda yaputuhu la o Yesus iwitoma.

² Onanga aigiama yaliko de o rante, deʼ iwiao, deʼ iwihilapahi o Pilatusika, magubernur o Roma manga popareta.

O Yudas wohonenge

³ Maöraha o Yudas wososetia okaua gënanga wamäke o Yesus ai hukumanga yaputuhoka, ünanga womatoduba. Deʼ unanga wohigilio o tiwi haäka moruange gënanga o imam-imam manga häekika deʼ o Yahudioka manga tutudaika.

⁴ Unanga wotemo, ”Ngohi tobaradohaka tihininga dorouoka o nyawa Ai howono koiwa-iwaika, hiädono Unanga aihukumanga iwihohonenge!” Mä onanga iwï baluhu, ”Mihaduli okia ngomi? Gënanga anihidailako ngona!”

⁵ O Yudas wohikaweli o tiwi gënanga ma Jou ai Tau magoronaika, deʼ woiki de womaliko howohonengoka.

⁶ O imam-imam manga häeke watoomu o tiwigënanga deʼ wotemo, ”O tiwi nënanga o awunu matiwi. I moteke o agama matita, o tiwi nënanga yakunua ihingohama o huhuba mangïuku ma Jou Madutu ai Tauoka.”

⁷ Ho mata-mata imateke fakatioka, önanga yapäke o tiwi gënanga ihi ija o tonaka ihiromanga o Bohoko yo Dodiai manga Tonaka. O tonaka gënanga yapäke o nyawa maporetino manga jere.

⁸ Gënanga doka mahababu hiädono o wange nënanga o tonaka gënanga ihiromanga ”O Awunu ma Tonaka”.

⁹ De gënanga, idadi hokä okia ma Nabi Yermia wotemoka, enagënanga, ”Onanga yatarima o tiwi haäka moruange, enagënanga o ija o Israel manyawa yafofakatioka, hokä o bobangu unangika.

¹⁰ Deʼ o tiwi gënanga önanga yapäke la hiija o bohoko yododiai manga tonaka, hokä ma Jou wohi paretaka ngohino.”

O Pilatus watailako o Yesus aiparakara

¹¹ Maöraha o Yesus wïhimanga o Pilatus, o berera gënanga magubernur, o Pilatus wïleha, ”Boteka Ngona o Yahudi manyawa manga koano?” ”Hoko gënanga hokä ani demoka,” o Yesus wohaluhu.

¹² Mä maöraha o imam-imam manga häeke deʼ o Yahudioka manga tutuda, ihidöaka o galaki mangöe o Yesusika, Unanga kowohaluhua.

¹³ Hababu gënanga o Pilatus wïtemo Unangika, ”Boteka Ngona noihenua mata-mata, kiaka önanga inikalaki gënanga?”

¹⁴ Mä o Yesus kamahuhutulö de wohaluhua, hiädono magubernur gënanga duru wohëranga.

O Yesus aihukumanga yaputuhu iwihohonenge

¹⁵ O Paskah ma Rameanga magëtongo, mabiaha magubernur wälapahi imatëngo o bui manyawa imoteke o nyawa yowöe-wöe manga ngongiriki.

¹⁶ O öraha gënanga naga womatëngo o hukumanga manyawa iwiheto-hetongo. Ai romanga o Yesus Barabas.

¹⁷ Hoʼ, de o nyawa manga ngöe ima toomuino, o Pilatus wäleha onangika, ”O nagona ngini niamau ngohi tälapahi mangale ngini? O Yesus Barabas ekola o Yesus iwi hetongo o Kristus?”

¹⁸ O Pilatus wotemo hokogënanga hababu ünanga wanäko, o Yahudioka yokokuaha iwihilapahi o Yesus unangika karana önanga manga hininga iwï dohata.

¹⁹ Maöraha o Pilatus wogogerukuohi o adili matauoka, ngoi hekata mohidingoto o behehongo nënanga unangika, ”Uha ngona ganu o nyawa Ai howono koiwa-iwa gënanga aiparakara, hababu mangale karana Unanga, o wange nënanga ngohi tonänere, ahi nänere gënanga hoborohono.”

²⁰ Mä o imam-imam manga häeke deʼ o Yahudioka manga tutuda kahoko genangika yahi ngohama o demo itotorou o nyawa yowöe-wöeika gënanga la yogahoko o Pilatusika hupaya o Barabas iwilapahi deʼ o Yesus ai hukumanga iwi hohonenge.

²¹ Deʼ magubernur gënanga wälehaoli önanga, ”Yahinoto o nyawa ne önanga, o naguna ngini nimau ngohi tï lapahi mangale ngini?” ”Barabas,” önanga yohaluhu.

²² ”Nako hoko gënanga, okia kokiani ngohi todiai de o Yesus iwi heto-hetongo o Kristus?” o Pilatus woleha onangika. ”Unanga niwi salib!” mata-mata önanga yohaluhu.

²³ ”Mä okia Ai dorou?” o Pilatus woleha. Deʼ onanga yopöaka iholoi ikuatil̄eoli, ”Unanga niwi salib!”

²⁴ Ma baha o Pilatus woma näko, ünanga wakunokaua okia naga wodiai, deʼ o nyawa manga ngöe gënanga yakunu aha yongamo. Hoʼ unanga wal̄ë o akere, deʼ o nyawa yowöe-wöe manga himangoka gënanga ünanga aigiama waihoro deʼ wotemo, ”Ngohi toluku tomahi tagongo mabobaluhu, mangale o nyawa neünanga Ai honenge! Gënanga ngini nihi dailako!”

²⁵ Mata-mata o nyawa yowöe-wöe gënanga yohaluhu, ”Ia, ma l̄aikala ngomi deʼ tongomi miangoha-ngohaka miatagongo ma hukumanga mangale Ai honenge!”

²⁶ Deʼ o Pilatus wïlapahi o Barabas mangale önanga, deʼ wähuloko o nyawa iwigohara o Yesus; deʼ wihilapahi Unanga la iwi salib.

O tentaraka imahigogule o Yesus

²⁷ Ipaha o Pilatus aitentaraoka iwiao o Yesus yowohama magubernur aikadatoika, deʼ mata-mata o tentaraoka manga doomu imatoomu o Yesus iwikilolitino.

²⁸ Onanga yahuputu o Yesus aipakeanga, deʼ iwihipäke Unangika o juba magoguhurungu.

²⁹ Onanga yal̄ë o gota mararaga mahohihika, deʼ yadiai aimakota, deʼ ihi tamunuku o Yesus aihäekuku. Ipaha önanga iwihi jojö o diki-diki o gahumu moi aigiama manirakoka, deʼ yatilabuku ai himangoka, deʼ iwihohedu Unanga. ”Tabea o Yahudi ma Nyawa manga Koano!” önanga yotemo.

³⁰ Onanga iwiobiri, deʼ yal̄ë o diki-diki gënanga, deʼ yagohara aimumukuku de o diki-diki.

³¹ Iböto ima higoguleoka Unanga, önanga yahuputu o juba magoguhurungu gënanga, deʼ iwihi päkeoli Ai pakeanga mahirete. Ipaha Unanga iwihi hupu iwiao la iwi salib.

O Yesus iwi salib

³² O ngëkomo mahoanoka, önanga imaka mäke de womatëngo o Kirene manyawa airomanga o Simon. Onanga iwipakisa o nyawa gënanga wamoku o Yesus aisalib.

³³ Ipaha önanga imahiädono o ngï moi maromanga o Golgota, mamangarati ”O häeke ma Kabelanga ma Ngï”.

³⁴ Genangoka önanga iwihidöaka o Yesus iwihi okere o angguru higanuino okianaga mamali-mali. Mä o angguru gënanga o Yesus watailoka, Unanga woluku waokere.

³⁵ Ipaha önanga iwisalib, deʼ aipakeanga imäkokeregu imoteke o undi.

³⁶ Ipaha de gënanga önanga yogogeruku dokengoka iwï göana Unanga.

³⁷ Ai häeke mal̄okuil̄e önanga yonuneuku o dulihi, yakorona o galaki Unangika, enagënanga: ”Nenangala o Yesus, o Yahudi ma Nyawa manga Koano”.

³⁸ Ihi domoteke dede Unanga önanga yäsaliboli yahinoto yoora-ora deʼ yotoma-toma; womatëngo ainirakoka, deʼ womatengoli aihigiloka.

³⁹ O nyawa yakokaino genangino manga häeke yagiwi-giwi, deʼ iwihohedu o Yesus.

⁴⁰ Onanga yato, ”Ngona nomau nakilianga ma Jou Madutu ai Tau, deʼ o wange hange dika de nohigokokali! Nako Ngona ma Jou Madutu ai Ngohaka, o saliboka gënanga deno uti, deʼ nohihalamati Ani diri!”

⁴¹ Hogenangoli o imam-imam manga häeke deʼ o agama maguru-guru inoli o Yahudioka manga tutuda iwihohedu o Yesus. Onanga yotemo,

⁴² ”Unanga wahihalamati o nyawa mahomoa, enahioko Ai diri mahirete wakunua wohihalamati. Nako o Israeloka manga koano, kayaoa de öraha nënanga Ngona nouti o saliboka gënanga, dahao ngomi miningaku Ngona.

⁴³ Unanga wïngaku ma Jou Madutuika de womahetongo Unanga ma Jou Madutu ai Ngohaka. Aa, niaino ngone hïlega boteka ma Jou Madutu womau örahanënanga wihihalamati.”

⁴⁴ Yo ora-ora de yotoma-toma yä sosalib de Unanga gënanga kahoko genangoli i wi hohedu Unanga.

O Yesus wohonenge

⁴⁵ O wange i korona, madëkana o jam hange o Yerusalem maberera gënanga mata-mataika ihuhutu.

⁴⁶ O takoro hange o bimaoa, o Yesus wopöaka de Ai ilingi kahakuatil̄e, ”Eli, Eli, lama sabakhtani?” mamangarati, ”Ya Ahi Jou Madutu, ya Ahi Jou Madutu, yadodoa ho Ngona nohi mal̄aika Ngohi?”

⁴⁷ Yamuruono naga genangokadau yoihene o böaka gënanga, deʼ yotemo, ”Unanga wïahoko o Elia!”

⁴⁸ Womatëngo manga dodiawo woma tai-taiti woiki wol̄ë o bunga karang, deʼ watono o angguru magogiohikuku. Ipaha ünanga wohi hakarika o didipoika, deʼ wohi peke o Yesus aiuru makaika.

⁴⁹ Mä mahomoa yotemo yato, ”Hodamä, niaino ngone hïlega boteka o Elia waino wihihalamati Unanga!”

⁵⁰ Ipaha o Yesus wopöakoli de Ai ilingi kahakuatil̄e, deʼ wowomaha wohi bobaha.

⁵¹ O guba inünuneuku ma Jou ai Tauoka ikakihi ibëlaka hinoto daku de yauku. O dunia igiwi deʼ o l̄oku mahelewo ibëlaka.

⁵² O lungu-lungunu ihelenga, deʼ manga ngöe ma Jou Madutu aiumati yohone-honengoka yowangokali.

⁵³ Ipaha de o Yesus womomiki o honenge mahidogoronaka, önanga yohone-honengoka yohupu manga lungunino, deʼ önanga yowohama o Yerusalem makotaika. Deʼ dokengoka manga ngöe o nyawa yämäke önanga.

⁵⁴ O tentaraoka de manga doomu mahäeke iwïgöa-göana o Yesus önanga duru yohawana, maöraha yamäke o ohu de mata-mata idädadi gënanga. Onanga yotemo yato, ”I goungu, Unanga nënanga ma Jou Madutu ai Ngohaka!”

⁵⁵ Genangoka nagaoli manga ngöe o ngongoheka, magurutoka de yölega-lega. Onanga gënanga iwinïkoka o Yesus la iwïriwo o Yesus madero kao Galilea okahi.

⁵⁶ Manga hidogoronaka genangala o ngo Maria Magdalena, o ngo Maria o Yakobus ngoi ayo deʼ o Yusuf, deʼ o Zebedeus aingoha-ngohaka manga ayo.

O Yesus iwi lungunu

⁵⁷ O hutu gënanga woböaino womatëngo wokaya-kaya o Arimatea makotaino airomanga o Yusuf. Unangö o Yesus winöninïki.

⁵⁸ Unanga woiki o Pilatusika, deʼ wogahoko o Yesus aimayeti. Ho o Pilatus wohipareta hupaya o Yesus aimayeti ihidöaka unangika.

⁵⁹ Ho o Yusuf wal̄ë o mayeti gënanga, deʼ wohihawoino de o ngöere magare-garehe, o hutara mahungi.

⁶⁰ Deʼ o Yusuf wakelenga o Yesus aimayeti o lungunuku, o lungunu gënanga tö Yusuf mahirete, de o lungunu gënanga yadiai o doporono i hohelewoka. Iböto gënanga ünanga wödululu o helewo moi ma amo-amoko wohibeno o lungunu gënanga mangorana, deʼ o Yusuf womajoboka.

⁶¹ O ngo Maria Magdalena deʼ o ngo Maria mahomoahi yogogeruku genangokadau yöhimangika o lungunu gënanga.

Yogöa-göana o lungunu

⁶² Yarehino mawange, o Yahudioka manga Puji mawangeoka, o imam-imam manga häeke deʼ o Farisi manyawa yoiki kamamoi, o Pilatus iwï himanga

⁶³ deʼ yotemo, ”Tuanga, ngomi mio hininga maöraha wotipu-tipu gënanga kawoma ngangoikahi, Unanga wotemoka, ’Ipahaika o wange hange Ngohi aha tomomiki’.

⁶⁴ Karana gënanga, nähuloko o nyawa yögöana o lungunu gënanga ihidodiai, hiädono o wange hangeoka, hupaya iwinöninïki yakunua yatohiki Ai mayeti deʼ yahetongo o nyawaika, Unanga womomikoka, o honenge mahidogoronaka. Deʼ o tipu mabobaha nënanga aha i holoi itorou de madodihiraka.”

⁶⁵ ”Ngini dema ënanga niatentara yogöa-göana,” o Pilatus wätemo onangika, ”nioiki la niogöana o lungunu gënanga, kagenangö magogöana.”

⁶⁶ Ho önanga yoiki o lungunika de yasegeluku madadamunu o helewouku, deʼ yögöana mahimangoka, hupaya koiwa naga yaruae o lungunu gënanga.