O MATIUS 24 - MA JOU AI BUKU O ABARI MA OA

O Yesus wohiade-ade mangale ma Jou ai Tau aha ikilianga

¹ Maöraha o Yesus wamal̄a ma Jou ai Tau, iwinöninïki yaino Unangino deʼ iwihidumutu ma Jou ai Tau gënanga.

² O Yesus wätemo onangika, ”Mode ngini niamäke mata-mata gënanga? La nianäko, o tau mahelewo nënanga kamoiö de koiwa, aha ima teke kalapeuku to ëna mangïoka. Mata-mata aha irubaiha.”

O huha deʼ o aniaya

³ Ipaha o Yesus woiki o Zaitun ma Doporonika, deʼ wogogeruku magogiriaka, iwinöninïki yaino la imateke ade-ade dede Unanga hokä biaha dika. ”Nomihi ngahu ngomino muruonoka mata-mata gënanga aha idadi,” önanga iwitemo o Yesusika. ”O nonako-nonako okia, ihidumutu Bapa aniböa deʼ o öraha mabaha?”

⁴ O Yesus wäbaluhu, ”Nimä göana, uha hiädono ngini inïtipu.

⁵ Hababu mangangöe o nyawa aha yoböa yapäke Ahi romanga deʼ yotemo, ’Ngohi nënanga ma Koano Wohihohalamati!’ Onanga aha yätipu manga ngöe o nyawa.

⁶ Ngini aha niihene imateke parangi mailingi, deʼ o parangi ma abari, mä uha nihawana. Hababu o hali gënanga kokiani idadi, mä genanga mamangarati owahi o kiamati maorahoka.

⁷ O hoana moi aha yäparangi yälawani o hoana mahomoaika, deʼ o negara moi yängika yälawani o negara mahomoaika. Kiaka dika aha idadi o habirokata deʼ o ohu.

⁸ Mata-mata gënanga aha madodihiraka imuläenge, hokä o ngoheka momatëngo mamäo mahiri maöraha amingohaka imau imakil̄au.

⁹ Ipaha ngini inïtagoko deʼ inihilapahi la inïhangihara deʼ inïtoma. O dunia mata-mataika aha inïdohata ngini karana ngini Nihinöninïki.

¹⁰ O öraha gënanga manga ngöe o nyawa aha yosetia okaua manga agamaika deʼ imakitipu la ibötohi yosetia de imako dohata moi de moi.

¹¹ Manga ngöe o nabi-nabi madutua yoböaino imahimatoko yätipu manga ngöe o nyawa.

¹² O dorou aha itagi ihora hokogënanga magiria hiädono manga ngöe o nyawa yakunokaua imakodora.

¹³ Mä o nyawa yototongohono hiädono mabaha, aha yahihalamati.

¹⁴ Deʼ o Abari ma Oa mangale sarakia ma Jou Madutu wopareta aha ihingahu o dunia mata-mataika, hupaya mata-mata o nyawa yoihene gënanga. Iböto de gënanga dahaö o kiamati i böa.”

O dorou yahiwö wede-wedere

¹⁵ ”Ngini aha niamäke ’O dorou yahiwö wede-wedere’, hokä ma Nabi Daniel wohidodemoka, womaokoino o ngï madebi-debinoka. (O dulihi nënanga madumutu yobasa-basaika: Nia tailako okia mamangarati!)

¹⁶ O öraha gënanga o nyawa o nagona o Yudea madaeraka kokiani yopiringana il̄oku-l̄okuil̄e.

¹⁷ O nyawa nagona naga o tau makatu mal̄okuoka uha youti yomau yal̄ë manga kia naga manga tau magoronaka.

¹⁸ O nyawa nagona o dumuleoka uha yolio yomau yal̄ë manga juba.

¹⁹ Duru hoborohono o wange gënanga mangale o ngongoheka o ngohaka ihi ao-aohi manga röehoka, deʼ o ayo-ayo kayahühuhuohi manga ngohaka!

²⁰ Nimä nia-niata hupaya uha hiädono ngini kokiani nioara o awa-awana maorahoka ekola o Yahudioka manga Puji mawangeoka!

²¹ O wange hö boborohono gënanga ahao naga o huha ma amoko hokä komaiwahi idadi ka dema dero o dunia idadi hiädono o örahanënanga deʼ aha komaiwaka idadi.

²² Nako hokä ma Jou Madutu watipokoua maöraha; done kamoi ö de o nyawa yohalamatiua. Mä karana Ai umati, ma Jou Madutu watipoko o huha maöraha gënanga.

²³ O öraha gënanga nako naga ima tëngo-tëngo inïtemo nginika, ’Niwï lega, ma Koano Wohihohalamati gënanga nengoka naga!ʼ ekola ’Unanga gangoka naga!ʼ – uha ningaku unangika gënanga.

²⁴ Hababu yaino imahi dumutu ihihohalamati madutua deʼ o nabi-nabi madutua. Onanga aha yakarajanga o manarama biaha-biahaua, deʼ i hëra-hëranga la yätipu, nako yakunu ma Jou Madutu aiumati ö.

²⁵ Hoʼ niohohininga! Ngohi tinihi ngahuoka nginika ihira de o hali gënanga idadi.

²⁶ Nako o nyawa inïtemo nginika, ’Niwïlega, ünanga naga doka o tonaka ikokakahaka!ʼ – uha ngini nioiki genangika. Ekola nako inï temo nginika, ’Niwïlega, ünanga womangiunika o kamari nënanga magoronaka!ʼ – uha ningaku.

²⁷ Hababu o Nyawa manga Ngohaka ai böa hokä o leletongo maletongo ihi toimi o wange mahiwaroko hiädono o wange madumuniha.

²⁸ Kiaka naga o aiwani mahonenge, genangoka naga o totaleo o aiwani mahonenge iol̄o-ol̄omo.”

O Nyawa manga Ngohaka aiböa

²⁹ ”Ipahaika tedekanua o huha maöraha gënanga, o wange aha idadi ihuhutu, deʼ o mede itararonokaua. O murumu-o murumu aha o dihangoka de itifa, deʼ o kuaha-kuaha o gitawa maamokoka aha iburakituku.

³⁰ Ipaha de gënanga aha o Nyawa manga Ngohaka Ai nonako yamäke o dihangoka. O öraha gënanga mata-mata o hoana de manyawa o duniaka aha yoari. Onanga aha iwimäke o Nyawa manga Ngohaka woböa o lobi mal̄okuoka de Ai kuaha de Ai mulia ma amoko.

³¹ O trompet ma ago-agomo aha yawuwu deʼ o Nyawa manga Ngohaka aha wahuloko Ai malaekat-malaekat yätoomu Ai umati o dunia malibuku iatino, o dihanga mabaha moioka hiädono o dihanga mabaha mahomoa ikali.”

O dodötoko o ara magotaino

³² ”Nia l̄ë o dodötoko o ara ma gotaino. Nako ma jaga ma alu-aluhu ma ijo-ijo deʼ yabole, deʼ imuläenge itori, ngini nihi öriki ihiwara maöraha itigioka.

³³ Kogenangoli nako ngini niamäke o hali-hali gënanga idadi, ngini nihi öriki maöraha duru itigioka.

³⁴ La nihi öriki! O hali-hali gënanga aha idadi ihira de o nyawa yowango-wango o öraha nënanga mata-mata yokoki honengoka.

³⁵ O dihanga deʼ o dunia aha ihihanga, mä Ahi demo itatapu kahiado-adonika.”

Moiua ihi öriki mawange deʼ ma jam

³⁶ ”Moiua ihi öriki muruonoka mawange deʼ majam, o malaekat-malaekat o horogaka ihiörikua, ma Jou Madutu ai Ngohaka mä kowali, duga-duga Ahi Ama dika wohiöriki.

³⁷ Oraha okia o Nyawa manga Ngohaka dahaö woböa, madodagi hokä mahiraino o Nuh aiorahoka.

³⁸ Ma wange o nguihi ma ago-agomo iböa owahi, o nyawa yol̄omo de yokere deʼ yokawingi. Hoko gënanga gila-gila kai taurika, hiädono mawange o Nuh wowohama o kapa magoronaika.

³⁹ Maöraha o nguihi gënanga yäolu önanga mata-mata, dahaö önanga yamäo de yanäko okia aha idadi magogiriaka dede önanga. Hoko genangoli madodagi, nako o Nyawa manga Ngohaka woböa.

⁴⁰ O öraha gënanga, o nyawa yahinoto yokarajanga magogiriaka o dumuleoka: Womatëngo iwiao, deʼ woma tengoli aha iwimal̄aika.

⁴¹ O ngoheka yahinoto manga gandum yotutuku magogiriaka: Momatëngo aha imi ao, deʼ moma tengoli imi mal̄aika.

⁴² Hoʼ, nimä göa-göana, hababu ngini nianäkoua muruonoka nia Jou aha woböa.

⁴³ Niohohininga nënanga! Demo maade matau madutu nako wanako o takoro muruono o hutu-hutu yotohi-tohiki aha yoböa, ünanga aha woma iduua, hupaya yotohi-tohiki yongohamua ai tau magoronaika.

⁴⁴ Hababu gënanga, nginiö kokiani nima sadia nimä göana. Karana o Nyawa manga Ngohaka aha woböa maöraha ngini nia näko-näkoua.”

Wolö leleani wososetia deʼ wolö leleani woso setiaua

⁴⁵ O Yesus wotemoli, ”Nako hokogënanga, kiaka wolöleleani wososetia deʼ wososawaro? Ganga ünanga aituanga wïgöraka wodadi yolöleleani mahomoa manga häeke, hupaya o ngol̄omo maorahoka ünanga wahidöaka önanga yol̄omo.

⁴⁶ Done duru wamäo wosanangi wolöleleani gënanga maöraha okia aituanga woma idulu wolio, deʼ wïmäkeino ünanga magogiriaka aimanarama wadiai.

⁴⁷ Ningaku, matuanga gënanga aha wohi döaka wögöana aiarata mata-mata wolöleleanika gënanga.

⁴⁸ Mä nako wolöleleani gënanga itorou, aha wotemo aihiningaka.

⁴⁹ ’Ahi tuanga madekanohi dahaö wolio,’ hoʼ unanga womuläenge wägohara mahomoa yolöleleani, deʼ wol̄omo de wokere deʼ o nyawa yädalu-daluku.

⁵⁰ Ipaha aituanga ahaö womakilioro wolio mawange deʼ ma jam wanäko-näkoua.

⁵¹ Done wolöleleani gënanga aha aituanga wïgohara genangö yaika magogohara, deʼ wïumo yoelu-eluku manga ngï ika. Dokengoka önanga aha yoari deʼ yatagongo o hangihara.”