O MATIUS 22 - MA JOU AI BUKU O ABARI MA OA

O hitotero mangale o kawingi marameanga

¹ O Yesus woade-adeoli o nyawa manga ngöeika de wapäke o hitotero,

² wato, ”Maöraha okia ma Jou Madutu wopareta, madodagi hokä o hitotero nënanga: Womatëngo ma koano, wodiai ai ngohaka o nauru aikawingi marameanga.

³ Ma koano gënanga wähuloko yolöleleani yoiki yängoho, yöhima-himanga o rameanga gënanga. Mä yöhima-himanga o rameanga gënanga yoluku yaino.

⁴ Ipaha ma koano gënanga wähulokoli yolöleleani mahomoali. Wätemo onangika: ’Nia hingahu yöhima-himanga o rameangika gënanga: O kawingi marameanga mainomo, mahiode, mahi okere, mata-mata itiai ukuoka. O hapi deʼ ahi hapi mangoha-ngohaka, iboburere yatöakoka. Mata-mata ibötukuoka. Nia ino niböa o kawingi marameangino!ʼ

⁵ Mä yöhima-himanga o kawingi marameangino gënanga koimalega ikaua. Onanga yoiki moi-moi manga manaramika, – womatëngo ai dumuleika, mahomoa yoiki ihi dailako manga usaha,

⁶ deʼ mahomoaoli, yätagoko iwïlö leleani ma koano gënanga, deʼ yägohara deʼ yätoma önanga.

⁷ Maöraha ma koano gënanga woihene o hali gënanga, ünanga duru wongamo. Unanga wohi dingoto ai tentara la yätoma, yotoma-toma gënanga deʼ yatuhuku manga kota.

⁸ Iböto de gënanga ma koano wäahoko iwïlö leleani, deʼ wätemo, ’O kawingi marameanga isadiaukuoka, mä kiani yaino-ino o kawingi marameangino i patutokaua yaino.

⁹ Ni oiki o öraha nënanga, o ngëkomo ma ago-agomika, deʼ niä ahoko yaino imawöe-wöeino o kawingi marameangino nënanga.’

¹⁰ De yolö leleani gënanga onangö yoiki. Onanga yoiki o ngëkomo ma ago-agomika deʼ yätoomu mata-mata o nyawa ima kokamäke genangokadau, o nyawa maoa de o nyawa madorou. Ho ma kawingi marameanga mangï iömanga de o nyawa yä aho-ahoko yaino o kawingi marameangino.

¹¹ Ipaha ma koano gënanga wowohama la wätailako o nyawa yaino-ino o kawingi marameangino. Ma koano wïmäke naga womatëngo o rameanga magoronaka gënanga, wapäkeua o kawingi marameanga mabaju.

¹² Deʼ ma koano woleha o nyawaika gënanga, ’Hobata, yadodoa hongona yakunu nowohama nenangino, de kona päkeua o kawingi marameanga mabaju?’ O nyawa gënanga wakunua okianaga wotemo.

¹³ Deʼ ma koano gënanga wätemo iwïlöleleanika, ’Nia liko ail̄ou deʼ aigiama o nyawa nënanga, deʼ niwiumo maporetika o ngï mahohuhutuika. Dokengoka aha naga o gari deʼ o hangihara.’ ”

¹⁴ Deʼ o Yesus wohibobaha o hitotero gënanga hokonënanga, ”Manga ngöe yäahoko, mä manga huhutulu dika yä iriki.”

O soungu mabobangu maloleha

¹⁵ Ipaha o Farisi manyawa yoiki imakatatoro mangale sarakia önanga yakunu yatagoko o Yesus aihowono de toona manga loleha-loleha.

¹⁶ Ho önanga yähuloko yanöninïki, yoiki o Yesusika, imatekerimoi de yamuruono naga o Herodes, ai doomuoka. Onanga gënanga yaika, de iwitemo o Yesusika, ”Bapa Guru, ngomi mia nako, ngona Bapa ani hininga irikoto. Bapa nodotoko nohi totararonika o nyawaika mangale ma Jou Madutu aimau, de nölegaikaua o nagona dika manga damäke. Hababu Bapa ngona no irikua de napulonua o nyawa.

¹⁷ Karana gënanga beika Bapa nahetongo ngomino: Imoteke nanga agama madatoro, yakunu o soungu hofangu ma Kaisarika ekola yakunua?”

¹⁸ O Yesus wanäko manga hininga madol̄a itotorou gënanga, hoʼ Unanga wätemo, ”Hei, o nyawa nielu-eluku! Yadodoa ho ngini nimau nialingi-lingiri Ahi howono?

¹⁹ Beika nihi dumutu Ngohino o tiwi okia ngini niapäke la nimahi fangu o soungu!” Deʼ onanga ihidöaka Unangika o tiwi haäka gahumu moi.

²⁰ O Yesus wäleha onangika, ”O tiwioka nënanga, tonagona manga dulada deʼ manga romanga?”

²¹ ”Toma Kaisar,” önanga yohaluhu. Ho o Yesus wätemo onangika, ”Nako hoko gënanga, nihidöaka ma Kaisarika okianaga toma Kaisar, deʼ ma Jou Madutuika, okia naga toma Jou Madutu.”

²² Maöraha önanga yoihene o Yesus wohitararono hokogënanga, önanga yohëranga. De önanga yoiki iwi mal̄aika o Yesus.

Yohonengoka de yomomiki maloleha

²³ O wange gënanga dika, o Saduki manyawa yamuruono naga yaika o Yesusika. Onanga ganga toona manga doomu madamäke, o nyawa yohonengoka aha yomomikokaua.

²⁴ ”Bapa Guru,” önanga iwitemo, ”O Musa wodotoko hokonënanga: Nako o nauru womatëngo wohonenge, deʼ aingohaka koiwa, aidodoto ekola ai riaka kokiani wokawingi de ngoi fäo, hupaya naga de manga difauku.

²⁵ Naga idadioka o riadodoto yätumidi, yogogere nengoka naga. Manga riaka wokawingi deʼ koiwahi ai ngohaka, ünanga wohonenge. Ho ngoi fäo womi mal̄aika la aidodoto womi kawingi.

²⁶ I paha ai dodoto gënanga wohonengoli, de koiwa ai ngohaka. O hali gënanga i dadioli de ai dodoto mahomoa, hiädono yatumidö yohonenge, deʼ moiua de manga ngohaka.

²⁷ Mabaha o ngoheka gënanga mahirete mohonenge.

²⁸ Aa, maöraha o nyawa yohone-honengoka de yomomikoli, o naguna ngoi hekata, o ngoheka gënanga? Hababu yatumidö yokawingoka dedemuna.”

²⁹ O Yesus wäbaluhu, ”Ngini duru niatibanga ihowono, hababu ngini nimangaratiua Ma Jou Ai Demo ma Buku mademo, de ma Jou Madutu aikuaha.

³⁰ Hababu o örahaokia o nyawa yohonengoka dahao yomomikoli, önanga yokawingokaua, duga-duga önanga aha yowango hokä o malaekat o horogaka.

³¹ Komaiwahi ngini niabasa okia ma Jou Madutu wotemoka mangale o nyawa yohonengoka de yomomikoli? Ma Jou Madutu wotemo,

³² ’Ngohi o Abraham ai Jou Madutu, o Ishak ai Jou Madutu, deʼ o Yakub ai Jou Madutu.’ Ma Jou Madutu gënanga, o nyawa yohone-honengua manga Jou Madutu. Unanga o nyawa yowango-wango manga Jou Madutu!”

³³ Maöraha o nyawa manga ngöe gënanga yoihene o Yesus wohi döaka mangale, önanga duru yokiriri mangale aidodötoko.

O pareta matiti

³⁴ Ma o Farisi manyawa yoihene o Yesus wäpaluhoka o Saduki manyawa de okia-kiakaua yakunu yotemo, önanga imatoomu.

³⁵ Womatëngo onangoka, genangala womatëngo o agama ma guru, wohi taili walingi-lingiri o Yesus wahowono, de o loleha moi.

³⁶ ”Bapa Guru,” wïtemo, ö pareta okia nanga agama magoronaka i dadi o pareta matiti?”

³⁷ O Yesus wïbaluhu, ”Nï dora ani Jou Madutu de ani hininga magahumu, de ani jiwa magahumu, deʼ ani akali ingodumu.

³⁸ Genangala o pareta matiti deʼ hohi-hohihira!

³⁹ O pareta mahinoto i matero de madodihiraka gënanga: Nädora ani dodiawo hokä ngona nödora anidiri mahirete.

⁴⁰ Ingodumu o agama matita o Musa wohi döa-döaka deʼ o nabi-nabi manga dodötoko, matiti o pareta hinotoka gënanga.”

O Koano Wohi hohalamati maloleha

⁴¹ Magogiriaka o Farisi manyawa kaima toomu inohi genangokadau, o Yesus wäleha onangika,

⁴² ”Okia ngini niadamäke mangale ma Koano Wohihohalamati? O nagona manga difauku ünanga?” ”O Daud aidifauku,” önanga yohaluhu.

⁴³ ”Nako hokogënanga,” o Yesus wäleha, ökia mahababu ma Jou Madutu ai Womaha ihi ngahu o Daudika la ma Koano Wohihohalamati wïhetongo ’Ma Jou’? Hababu o Daud wotemo,

⁴⁴ ’Ma Jou wïtemo ahi Jouika: nogogeruku ahinirakoka, hiädono ngohi tadiai anihaturü ngonaika imaponu.’

⁴⁵ Hoʼ nako o Daud wïhetongo ma Koano Wohi hohalamati gënanga ’Ma Jou’, sarakia yakunu ünanga o Daud aidifauku?”

⁴⁶ O nyawa moiö de yakunua iwïbaluhu o Yesus. Deʼ ka de o öraha gënanga, moiokaua naga yobarani yolehali okianaga Unangika.