O MATIUS 20 - MA JOU AI BUKU O ABARI MA OA

O hitotero mangale yomomanarama o angguru madumuleoka

¹ ”Nako maorahoka ma Jou Madutu wopareta, madodagi hokä o hitotero nënanga: Womatëngo o angguru madumule madutu, o ngorumino de wohupu wolingiri o nyawa la yomanarama aiangguru madumuleoka.

² Imake temo ünanga wömodeke wäbangu onangika o rupia ribuhu moi o wange moi, ünanga wähuloko önanga yomanarama aiangguru madumuleoka.

³ O takoro hiwo o ngorumino, o dumule madutu gënanga woikoli, deʼ wä mäke yamuruono naga yododoaua yogogeruku o paharoka.

⁴ Unanga wätemo onangika, ’Nioiki la ngini nimanarama ahiangguru madumuleoka. Ngohi aha tinï bangu nginika de niahewa niahininga yadäene.’

⁵ Onangö yoiki. O takoro ngimoi de hinoto o wange ikorona deʼ o takoro hange o bimaoaoli, o dumule madutu gënanga woikoli wohupu, deʼ wodiai kahokogenangoli.

⁶ Deʼ done ho o takoro motoa o bobimaoa, ünanga wohupuoli, deʼ wämäke kanagahi o nyawa manga manarama koiwa. Daha ünanga wäleha onangika, ’Yadodoa hongini o wangeil̄e kanihi gokoino nenangoka deʼ okiaua nidiai?ʼ

⁷ O nyawa ge önanga yohaluhu, ’Moiua imihi manarama ngomi.’ Madumule madutu gënanga wato, ’Nako hoko gënanga, nioiki ngini nimanarama ahi angguru madumuleoka.’

⁸ O wange o bimaoaoka, madumule madutu gënanga wïtemo ai mandorika, ’Nä ahoko yomomanarama gënanga deʼ nofangu mangahewa moi-moi, muläenge de yotototuru yowohama hiädono yoho hihira yowohama.’

⁹ Deʼ yomomanarama muläenge o takoro motoa o bimaoa yohira yaino. Onanga moi-moi yamäke o rupia o ribuhu moi.

¹⁰ Ipaha yainoli yomomanarama ka o ngorumino monga de wätemo wä hewa. Onanga ima pikiri önanga aha yamäke iholoi. Ena hioko onangö duga-duga wahi döaka kao rupia o ribuhu moi.

¹¹ Maöraha yotarima o tiwi gënanga önanga yokurubungu madumule madutuika:

¹² ’Yomomanarama yoböa mabobahaka gënanga yomanarama duga-duga o jam moi. Ho de ngomi mi manarama o wange amomoi o wange mahauku matimiuku, mä Tuanga näbangu manga hewa kaimaketero de ngomi!ʼ

¹³ O angguru madumule madutu gënanga wïbaluhu womatëngo manga hidogoronaka wato, ’Hobata, ngohi tahowonua ngonaika. Mode koigoungua ngona nömödeke notarima o hewa o rupia o ribuhu moi o wange moi mamanarama?

¹⁴ Hoʼ, nal̄ë ani hewa nënanga deʼ noiki. Ngohi igoungu toigo o nyawa yotototuruika yowohama tahidöaka manga hewa imake tero de ngohi tohidöaka ngonaika.

¹⁵ Mode nako tongohi ahi arata detakunua todiai imoteke ahimau? Eko ngona notaleana, nako ngohi ahihininga imura?ʼ ”

¹⁶ Deʼ o Yesus wotemoli, ”Kogenangoli o nyawa yotototuru aha yodadi madodihiraka, deʼ o nyawa madodihiraka aha yodadi yotototuru.”

O Yesus wohi ade-ade mahi gali mahangeoka mangale Ai honenge

¹⁷ Maöraha o Yesus wotagi wödumutu o Yerusalemika, o ngëkomo mahoanoka Unanga wä ahoko iwinöninïki yangimoi de yahinoto imatoomu, moi-moiua mahomoa. Deʼ o Yesus wätemo onangika,

¹⁸ ”Ni ihene! Ngone o örahanënanga nanga dumutu o Yerusalemika. Dokengoka o Nyawa manga Ngohaka aha iwi hilapahi o imam-imam manga häekika, deʼ o agama maguru-guruika. Deʼ Unanga aha iwihukumu iwihohonenge,

¹⁹ ipaha iwihi lapahi o Yahudi manyawaikaua. Onanga aha iwihohedu, iwihangihara, deʼ iwisalib. Mä o wange hangeoka, Unanga aha iwihimomikoli.”

O Yakobus deʼ o Yohanis manga ayo ami gogahoko

²⁰ Ipaha o Zebedeus ngoi hekata de ami ngoha-ngohaka yaino o Yesusino. O Yesus aihimangoka muna momarukuku la mogahoko okia naga moi.

²¹ ”Ayo nomau okia?” o Yesus womi leha. O ayo gënanga mohaluhu, ”Ngohi tönahihu ahingohaka yahinoto nënanga yogogere anihigili deʼ aninirakoka Bapa, nako ma orahoka Bapa nodadi o Koano.”

²² ”Ngini nianäkoua okianaga ngini nigahoko,” o Yesus wätemo onangika. ”O hangihara magalahi kokiani genangoko to ngokere, kani akunu ngini nio ngokere?” Onanga yohaluhu, ”Kami akunu.”

²³ O Yesus wätemo, ”Igoungu nginiö aha kanio ngokere Ahi galahioko. Mä mangale o nagona aha yogogere ahihigili deʼ Ahi nirakoka, gënanga Ngohiua Ahi kuaha tohigogere. O ngï-o ngï gënanga yögogere, o nyawa nagona Ahi Ama wohigogeroka.”

²⁴ De yangimoi iwinöninïki mahomoa yoihene o hali gënanga önanga yängamo mariadodoto yahinoto gënanga.

²⁵ Hababu gënanga o Yesus wäahoko önanga mata-mata de wätemo, ”Ngini nihiöriki o kawaha o negara magoronaka matutuda iwinäko-näkoua ma Jou Madutu, önanga yahikauku manga kawaha. De o gikiri yo ago-agomo yätuku manga kawaha.

²⁶ Mä ngini yakunua hoko gënanga, o nagona yomau yodadi yolamoko niahidogoronaka, kokiani yodadi yolöleleani nginika.

²⁷ Deʼ o nagona yomau yodadi yohohihira, kokiani yodadi niagilaongo.

²⁸ Hokä o Nyawa manga Ngohakoli; Unanga woböa wonahihuua iwï leleani, mä Unanga wäleleani, deʼ wohi döaka ai nyawa, la o nyawa manga ngöe wätuhuhu.”

O Yesus wahi togumu yopilo-piloko yahinoto

²⁹ Maöraha önanga yamal̄a o Yerikho makota, o nyawa manga ngöe iwinïki o Yesus.

³⁰ Yahinoto yopilo-piloko yogogeruku o ngëkomo madatekoka. Onanga yoihene o Yesus wakaino, önanga yopöaka, ”Daud ai Ngohaka, nomï dora ngomi!”

³¹ O nyawa manga ngöe genangoka yängamo önanga deʼ yähuloko, önanga imarïdi. Mä onanga yopöaka iholoi ikuatil̄e, ”Jou o Daud ai Ngohaka, nomï dora ngomi.”

³² Deʼ o Yesus womatogumu deʼ wäahoko önanga, de wäleha, ”Ngini okia nionahihu Todiai nginika?”

³³ Onanga yohaluhu, ”Tuanga, ngomi mionahihu mimahiöriki!”

³⁴ O Yesus wädora önanga, deʼ wapal̄anga manga lako. O öraha gënanga dika önanga yakunu imahiöriki. Deʼ onanga iwinïki o Yesus.