O MATIUS 2 - MA JOU AI BUKU O ABARI MA OA

Yososawaro o wange ma Hiwariha

¹ O Yesus womakil̄au o Betlehem makotaka o Yudea mabereraka; ma Koano Herodes ai öraha wopareta. Oraha gënanga yamuruono naga o wange mahiwariha, yososawaroyatailako o murumu o dihangoka yoböa o Yerusalem makotaino.

² Onanga yoleha yögeto-getongo, ”Kiaka waika o ngohaka gënanga, womakil̄auoka la wodadi o Yahudi manyawa manga koano? Ngomi miamäke aimurumu o dihangoka iböa o wange mahiwaroko, deʼ ngomi miaino la miwi huba Unanga.”

³ Ma Koano Herodes woihene o hali gënanga, ünanga duru iwitodokana, kogenangoli o Yerusalem manyawa mata-mata.

⁴ Unanga wähuloko mata-mata o imam manga häeke deʼ o Yahudi manyawa manga guru-guru agama yaino imatoomu. Deʼ unawäleha onangika, ”O Koano ma Jou Madutu winihijä jaji kiaka aha woma kil̄au?”

⁵ Onanga yohaluhu, ”O Betlehem makotaka o Yudea mabereraka. Hababu manabi wotulihi hoko nënanga,

⁶ ’Ngona Betlehem, o Yehuda mabereraka, o Yehuda makota yairi-irikika mahi dogoronaka, hakali-kali ngona duru no etekua. Karana ngonaino aha woböa womatëngo o tutuda, aha wätuda ahi umati o Israeloka.’ ”

⁷ De wamäkeoka o hitararono gënanga, o Herodes wä ahoko yososawaro yatailako o murumu o dihangoka o wange mahiwariha gënanga, kawapongono. Deʼ unanga wä leha onangika, kahuruono mamurumu gënanga muläenge yamäke.

⁸ Iböto gënanga una wähuloko önanga o Betlehemika deʼ wobehehongo, ”Nioiki, niwi lingiri o ngohaka gënanga nihi dodiai. Deʼ nako ngini niwi mäkeoka Unanga, nihihi ngahu ngohino, hupaya ngohi ö toiki tï huba Unanga.”

^9-10 Deʼ onanga yoiki. Onanga yamäkeoli mamurumu o dihangoka, yamö mäke-mäke ihira o wange mahiwaroko. Onanga duru yomörene yamäke o murumu gënanga! O murumu gënanga yähihira, deʼ ima togumu yatotäna o ngohaka gënanga ai ngï mal̄oku il̄e.

¹¹ Onanga yowohama o tau gënanga magoronaika deʼ iwi mäke o ngohaka gënanga de ngoi ayo, o ngo Maria. Onanga yatilabuku deʼ iwi huba o ngohaka gënanga, deʼ yahelenga manga arata mangï, deʼ ihihuba unangika o gurasi, o manyanyi, deʼ o mur.

¹² Ma Jou Madutu wahitiari önanga, o nänere magoronaka, hupaya uha imakilioro o Herodesika. Hoʼ onanga yolio yanonu o ngëkomo mahomoa.

Imahi ditoko o Mesirika

¹³ Ipaha de yososawaro yotötailako o murumu o dihangoka yolio, o Yusuf wonänere ma Jou Ai malaekat womahi matoko. O malaekat gënanga wïtemo, ”O Herodes womau wïlingiri o ngohaka gënanga, la wïtoma Unanga. Karana gënanga nomomiki, nïao o ngohaka gënanga de ngoi ayo, nimahiditoko o Mesirika. Nigogere dokengoka hiädono Ngohi tinï temoli nginika.”

¹⁴ O Yusuf womomiki, deʼ o hutu gënanga dika ünanga wïao o ngohaka gënanga de ngoi ayo imahi ditoko o Mesirika.

¹⁵ Onanga yogogere dokengoka hiädono o Herodes wohonenge. Hoko genangala idadi hokä ainabi wohingahu ma Jou Ai demo hoko nënanga, ”Ngohi tïahoko Ahi Ngohaka o Mesirino.”

O ngoha-ngohaka yätoma

¹⁶ O Herodes wanäko yososawaro yatailako o murumu o dihangoka gënanga iwitipu, una duru wongamo. Deʼ unanga wohi pareta, mata-mata o ngoha-ngohaka manga umuru o taongo hinoto de hikauku yätoma o Betlehem makotaka deʼ madate-datekino. Gënanga imatero de yososawaro manga hitararono, mangale maöraha o murumu o dihangoka gënanga yamäke.

¹⁷ Hoko genangala idadi okia ma Nabi Yermia wotemoka, gënanga,

¹⁸ ”O Rama mabereraka yoihene o ilingi, o dodora de o gari mailingi. O ngo Rahel mägari amingoha-ngohaka; i mi laru moluku muna hababu önanga moi okaua.”

O Mesir de ima kilioro yolio

¹⁹ O Herodes wohonenge ipahaika, o Yusuf ka o Mesirokahi, ma Jou Ai malaekat womatëngo womahimatokoli unangika o nänere magoronaka.

²⁰ O malaekat gënanga wotemo, ”Yato yomau iwi toma-toma ngohaka gënanga wohonengoka. Karana gënanga nomomiki, nal̄ë o ngohaka gënanga de ngoi ayo, deʼ näao nima kilioro nilio o Israelika.”

²¹ O Yusuf womomiki, deʼ wïao o ngohaka gënanga de ngoi ayo, imakilioro yolio o Israelika.

²² Mä ipaha o Yusuf woihene, o Herodes aingohaka airomanga o Arkelaus, wïtagalioka aiama wodadi o koano o Yudea mabereraka. Hö o Yusuf wohawana woiki genangika. O nänere magoronaka o Yusuf wamäke o hidumutu ma Jouino, una woiki o Galilea madaeraika.

²³ Genangoka una wogogere o kotaka maromanga o Nazaret. De hoko gënanga idadi hokä okia o nabi-nabi yotemoka: ”Una aha iwihetongo o Nazaret manyawa.”