O MATIUS 16 - MA JOU AI BUKU O ABARI MA OA

O Farisi manyawa yogähoko o Yesus wodiai o nonako i hëra-hëranga

¹ Naga yamuruono naga o Farisi deʼ o Saduki manyawa yaino o Yesusino yomau iwïbudi. Onanga yogahoko Unanga wodiai o nonako ihëra-hëranga, la inyata igoungu Unanga ma Jou Madutuoka de waino.

² O Yesus wohaluhu, [”Nako o wange tigi-tigi i tumunu, ngini niato, ’Gitawa yaoa hababu madihanga itokara.’

³ Deʼ o ngorumino, ngini niato, ’O wange nënanga aha iawana, hababu o dihanga i tokara de yahöhohongo.’ Ngini niakunu de mahirahi nianäkoka o gitawa nako niatailako dihanga madodagi, enahioko o nonako-nonako o öraha nënanga, ngini nianäkoua okia aha idadi!”]

⁴ ”Duru itorou deʼ yotobalawani, o nyawa o örahanënanga. Ngini nigahoko Ngohi todiai o nonako ihëra-hëranga. O nonako ihëra-hëranga ka moi ö de aha koinihidöakua, sowaliua o nonako ihëra-hëranga ma Nabi Yunus.” De hokogënanga o Yesus wotemoka wämal̄aika de woma joboka.

O Farisi deʼ o Saduki manyawa manga ragi

⁵ O Yesus iwinöninïki imahi adonika o taaga mahonongaka, dahaö önanga yanäko yawohanga o roti imägao.

⁶ O Yesus wätemo onangika, ”Nimahidodiai mangale o Farisi deʼ o Saduki manyawa manga ragi.”

⁷ Yoihene o Yesus ai demo-demo gënanga, iwinöninïki yomuläenge imaketemo, ”Unanga wotemo hokogënanga karana ngone homägaoua o roti.”

⁸ O Yesus wanäko okia önanga ihiade-ade. Hoʼ Unanga wätemo, ”Yadodoa hongini nimakokeleha mangale niaroti koiwa? Ngini ikuranga ningaku!

⁹ Ngini nimangaratiowahi? Mode ngini niohiningaua, o roti motoa Ngohi tabëla-bëlaka de yaribuhu motoa yaol̄omo? O karaja muruono maboloi niatoomu?

¹⁰ Deʼ sarakiaoli de o roti tumidi, de yaribuhu iata yaol̄omo? O karaja muruono maboloi niatoomu?

¹¹ Yadodoaho hiädono ngini nimangaratiua, Ngohi toade-adeua dede ngini mangale o roti? Nimahidodiai mangale o Farisi deʼ o Saduki manyawa manga ragi.”

¹² Mabaha o Yesus iwinöninïki gënanga imangarati o Yesus wähuloko önanga imahidodiai mangale o ragi o rotiikaua ihipäke-päke, mä o Farisi deʼ o Saduki manyawa manga dodotokika.

O Petrus ai mangaku mangale o Yesus

¹³ O Yesus woiki o Kaisaria Filipi makota madaera madatekoka. Genangokadau imahiadonika o Yesus wäleha iwinöninïkika, ”Imoteke o nyawa yotemo, o Nyawa manga Ngohaka gënanga o naguna?”

¹⁴ Iwinöninïki yohaluhu, ”Naga utu yato o Yohanis Wo ohi-ohiki. Nagaoli yato o Elia. Mahomoali yato o Yermia, ekola moiani ma nabi.”

¹⁵ ”Mä imoteke ngini mahirete, Ngohi nënanga o naguna?”

¹⁶ O Simon Petrus wohaluhu, ”Bapa Ngona o Koano Wohihohalamati, ma Jou Madutu ai Ngohaka No Wango-wango.”

¹⁷ ”Noutumu duru ngona, Simon o Yona aingohaka!” o Yesus wato. ”Hababu o hali nënanga o nyawaua inihingahu ngonaika, duga-duga Ahi Ama o horogaka.

¹⁸ Hababu gënanga la nohiöriki, ngona ganga o Petrus, o nuha ikua-kuata. Deʼ o nuha nënanga mal̄okuoka Ngohi aha tohigoko Ahi gereja, yahihanga yakunua; ngarokö ohonenge makuaha.

¹⁹ Ngohi aha tohidöaka ngonaika ma Jou Madutu ai Dunia ma Hungi toëna makusi. Okia ngona nö duhunu o dunia mal̄okuoka, o horogakaö yöduhunu. Deʼ okia nato itiai o dunia mal̄okuoka, o horogaka ö yato i tiai.”

²⁰ Ipaha de gënanga o Yesus wahipoma-poma iwinöninïkika hupaya önanga kamoikaö de uha ihingahu, Unanga gënanga o Koano Wohihohalamati.

O Yesus wohi ade-ade mangale Ai hangihara deʼ Ai honenge

²¹ Muläenge o öraha gënanga, o Yesus wätemo wohi totiaika, iwinöninïkika, Unanga kokiani woiki o Yerusalemika deʼ wamäke mangöe o hangihara, o tutuda-tutudaino, o imam-imam manga häeke deʼ o agama maguru-guruino. Unanga aha iwitoma, mä o wange hange yabatingi Unanga aha iwihimomikoli.

²² Deʼ o Petrus wïtauru o Yesus aidatekino deʼ witaaere wato, ”Tanu ma Jou Madutu wohitingaka o hali gënanga Jou! Uha hiädono o hali gënanga idadi Ngonaika Jou!”

²³ O Yesus womälega ai poretoko deʼ wïtemo o Petrusika, ”Noiki nenangoka, No goda-goda! Ngona nohitätatoko Ngohi. Ani dibanga gënanga o nyawa madibanga; ma Jou Madutuua aidibanga!”

²⁴ Ipaha o Yesus wätemo iwinöninïkika, ”O nyawa yomau ihinïki Ngohi, kokiani yawohanga manga diri maparalu, yamoku manga salib deʼ higila-gila ihinïki Ngohi.

²⁵ Hababu o nyawa yomau yoriwo manga ngango, aha ihihanga manga Ngango. Mä o nagona ihidöaka manga ngango mangale Ngohi, aha yamäke manga ngango.

²⁶ Okia mautumu onangika nako ingodumu o dunia nënanga, idadi kato önanga, mä ihihanga manga ngango? Yakunu o ngango gënanga hitagali de okianaga moi?

²⁷ I tedekanokaua, o Nyawa manga Ngohaka kamamoi de Ai malaekat-malaekat aha yoböa de Ai Ama aikuaha. Ma orahoka gënanga, Unanga aha wabalaha o nyawa moi-o nyawa moi manga manarama.

²⁸ Nianäko! Ngini niahidogoronaka nengokanaga aha utu yohonengowahi, ihira de iwimäke o Nyawa manga Ngohaka woböa hokä o Koano.”