O MATIUS 15 - MA JOU AI BUKU O ABARI MA OA

O ete de o tohora manga adati de manga biaha

¹ O Farisi manyawa o doomu moi de o agama maguru yamuruono naga o Yerusalemino, yaino o Yesusino. Onanga yoleha Unangika,

² ”Yadodoaho ininöninïki yatilakuru nanga ete de nanga tohora manga adati? Maöraha aha yol̄omo, önanga yaihorua manga giamaimoteke o datoro!”

³ O Yesus wohaluhu, ”Deʼ yadodoaho nginiö niatilakuru ma Jou Madutu aipareta, duga-duga karana niamoteke niaete de nia tohora mangaadati?

⁴ Hababu ma Jou Madutu wotemo, ’Nia horomati niaama de niaayo,’ deʼ ’O nagona hönanga yätetemo manga ama deʼ mangaayo, kokiani önanga yähukumu hiädono yohonenge.’

⁵ Mä ngini nidotoko; nako o nyawa yä temo manga dimonika, ’Okia kokiani ngohi tahidöaka ahiama deʼ ngohiayoika, ngohi tohihubaka ma Jou Madutuika,’

⁶ ho o nyawa gënanga wihipatutokaua, wähoromati aiama deʼ ngoiayo. Hoʼ, karana niaete de niatohora manga adati, ngini niolegaikaua ma Jou Madutu aidemo.

⁷ Ngini o nyawa nielu-eluku! Itiai hokä ma Nabi Yesaya mahirahi de wohingahuoka mangale ngini, hokonënanga,

⁸ ’Ma Jou Madutu hoko nënanga wotemo: O nyawa geönanga ihihoromati Ngohi duga-duga kamanga demo, mä manga hininga ikurutika de de Ngohi.

⁹ Parahaja önanga Ngohi ihihuba, hababu yodotoko o nyawa manga datoro hokä gënanga To ngohi ahi datoro.’ ”

O hali kiaka o nyawa yäpeseke

¹⁰ Ipaha o Yesus wä ahoko o nyawa yowöe-wöe deʼ wätemo onangika, ”Niihene hupaya nimangarati!

¹¹ Okianaga iwohama nanga uruoko, gënanga yäpesekua o nyawa; duga-duga okianaga i hupu-hupu nanga uruiha, gënanga doka yadiai idadi o nyawa yopeseke.”

¹² Deʼ iwinöninïki o Yesus yaino deʼ yotemo o Yesusika, ”Nohi öriki Bapa o Farisi manyawa gënanga manga hininga ikuranga, yoihene Bapa notemo hokogënanga?”

¹³ O Yesus wohaluhu, ”Okianaga idato-datomo nako Ahi Ama o horogaka Unangua wodatomo, aha irahuku.

¹⁴ Ngarouha nialegaika o Farisi manyawa gënanga. Ona gënanga o tutuda yopilo-piloko; de nako o nyawa yopilo-piloko yätuda o nyawa yopilo-piloko, aha yahinoto ö yäotaka o gotiuku.”

¹⁵ O Petrus wotemo, ”Bapa nomi hitararonohi o hitotero gënanga ngomino!”

¹⁶ O Yesus wohaluhu onangika, ”Nginiö mani mangarati owahi?

¹⁷ Nia näkoua ngini, okianaga iwohama nangauruoko iuti nanga mamatauku, deʼ ipaha ihupuoli?

¹⁸ Mä okianaga ihupu nanga uruiha, ma ahali nangahiningail̄e; deʼ genanga yadiai o nyawa yopeseke.

¹⁹ Hababu nanga hiningail̄e ipuda o dibanga madodorou, idadi o hababu o nyawa yotoma, yohowono, o nahihu madorou, yotohiki, o hakihi i elu-eluku deʼ o fitana.

²⁰ Gënangadau hönanga idadi o hababu o nyawa yopeseke, mä hol̄omo deʼ nanga giama haihorua i dadiua o hababu o nyawa yopeseke.”

O Kanaan mangoheka momatëngo amingongaku

²¹ Ipaha gënanga o Yesus wamal̄a o ngï gënanga deʼ o daera yatigi-tigino o Tirus deʼ o Sidon makota genangika o Yesus woiki.

²² Ma daeraino gënanga o Kanaan mangoheka momatëngo, maino o Yesusino de mopöa-pöaka, ”Daud ai Ngohaka, nohïdora ngohi! Ngohi ora owomaha madorou imï ngohamika. Duru kahagiria.”

²³ O Yesus womïbaluhua mangoheka gënanga. Hoʼ iwinöninïki o Yesus yaino Unangino deʼ yogahoko, ”Bapa, nomi huloko mangoheka gënanga moiki. Münanga duga-duga mogïgigoro dika nanga poretino!”

²⁴ O Yesus womïbaluhu, ”Ngohi ihihuloko duga-duga o Israel manyawaika, maboboloi önanga yohihihangika.”

²⁵ O ngoheka gënanga maino deʼ matilabukuku o Yesus ai himangoka deʼ motemo, ”Tuanga, nohï riwo.”

²⁶ O Yesus womïbaluhu, ”Itorou o ngoha-ngohaka manga inomo hal̄ë deʼ hodotumo o kahoika.”

²⁷ ”Igoungu, Tuanga,” o ngoheka gënanga mohaluhu, ”mä o kaho maka yaol̄omo o inomo mahou-hou, itifa-tifauku madutu ai mejaka.”

²⁸ Deʼ o Yesus womitemo, ”Ayo, igoungu aningongaku iamoko! Mal̄aika la idadi hokä okia ngona nönahihu!” Ka o öraha gënanga dika de ngomi ora gënanga motogumu.

O Yesus wahitogumu mangangöe o nyawa yopopanyake

²⁹ O Yesus wamal̄a o ngï gënanga, deʼ wotagi wotowongi o Galilea ma Taaga madatekino. Ipaha Unanga wodöa o doporonil̄e deʼ wogogeruku genangoka.

³⁰ Manga ngöe o nyawa yaino Unangino, o nyawa manga l̄ou ihone-honengoka, yopiloko, yolugu, yomou, deʼ manga ngöeohi o panyake mahomoa. Onanga yakelengauku o nyawa yopopanyake gënanga o Yesus aihimangoka, deʼ o Yesus wahitogumu.

³¹ O nyawa manga ngöe genangokadau duru yohëranga, maöraha önanga yamäke o nyawa yomou yakunu yotemo, manga l̄ou ihone-honengoka yotagi itiaioka, yolugu-lugu imädagi, deʼ yopiloko imahiöriki. Deʼ onanga iwihigiriri o Israeloka manga Jou Madutu.

O Yesus wahiol̄omo o nyawa yaribuhu iata

³² Ipaha o Yesus iwinöninïki wä ahoko deʼ wätemo, ”Ngohi duru tädora o nyawa manga ngöe nënanga. O wange hange iböto, önanga dede Ngohi, deʼ o örahanënanga önanga manga inomo koiwa. Ngohi toluku hamal̄aika önanga yolio de manga mamata madol̄a koiwa, done önanga yokiditoko o ngëkomo mahoanika.”

³³ Ho iwinöninïki o Yesus iwileha Unangika, ”Kiaino ngone yakunu hamäke o inomo, mahoanoka nënanga la hahiol̄omo o nyawa manga ngöe nënanga?”

³⁴ ”Naga nginioka o roti muruono?” o Yesus wäleha onangika. ”Tumidi,” önanga yohaluhu, ”deʼ o nawoko mahohumujuru o ngai muruono naga.”

³⁵ De o Yesus wähuloko o nyawa mangangöe gënanga yogogeruku o tonakoka.

³⁶ Deʼ Unanga wal̄ë o roti tumidi deʼ o nawoko gënanga, ipaha wohi döaka o sukur ma Jou Madutuika. I böto de gënanga wabëla-bëlaka maroti deʼ manawoko gënanga de Ai giama, deʼ wohi döaka iwinöninïkika. Deʼ onanga ihikodoku o nyawa yowöe-wöeika gënanga.

³⁷ Mata-mata önanga yol̄omo hiädono yäpunuhu. De yol̄omoka iwinöninïki o Yesus yatoomu o inomo maboloi gënanga. Mata-mata naga o karaja tumidi iömanga.

³⁸ Manga ngöe yool̄o-ol̄omo o öraha gënanga o nau-nauru dika naga yaribuhu iata, yä etongowahi o ngo ngoheka deʼ o ngoha-ngohaka.

³⁹ I paha o Yesus wähuloko o nyawa mangangöe gënanga yolio. Unanga mahirete woharene o ngotiril̄e deʼ woiki o Magadan madaeraika.