O LUKAS 20 - MA JOU AI BUKU O ABARI MA OA

O loleha mangale o Yesus aihaku

¹ O wange moiuku, o Yesus wodotoko magogiriaka deʼ wohingahu o Abari ma Oa ma Jou Madutuino o nyawa yowöe-wöeika ma Jou ai Tau magoronaka. O imam-imam manga häeke, o agama maguru-guru, de o Yahudioka manga tutuda, yoböa

² deʼ iwitemo o Yesusika, ”Beika nomihingahu ngomino okia idadi matiti Ngona nodiai nënanga mata-mata? O nagona inihidöaka o haku gënanga Ngonaika?”

³ O Yesus wohaluhu, ”Ngohi toigo toleha. Beika nihingahu Ngohino,

⁴ o Yohanis woohiki de o nagona manga haku? Ma Jou Madutu ekola o nyawa?”

⁵ Onanga yomuläenge imakitibanga, ”Nako ngone hato, ’De ma Jou Madutu aihaku,’ Unanga aha wotemo, ’Nako hokogënanga, yadodoa ho ngini niwingakua unangika?ʼ

⁶ Mä nako ngone hato, ’De o nyawa mangahaku,’ o nyawa manga ngöe aha inakaweli ngone de o helewo, hababu önanga yongaku o Yohanis ganga o nabi moi.”

⁷ Hoʼ onanga yohaluhu, ”Ngomi mihiorikua.”

⁸ O Yesus wätemo onangika, ”Nako hokogënanga Ngohiö aha tahetongua nginika de o nagona manga haku Ngohi tadiai mata-mata nënanga.”

O hitotero yomomanarama o angguru madumule

⁹ O Yesus woade-ade o nyawaika gënanga, o hitotero moioli, ”Naga womatëngo wödatomo aiangguru madumule, o dumule moi. Unanga wohihewa o dumule gënanga yomomanaramika yamuruono naga daha wosobo o berera mahomoaika deʼ kaidekana dokengoka wogogere.

¹⁰ Maöraha yadonoka yopagele o angguru mahohoko, madumule madutu gënanga wahidingoto iwïlöleleani, yomomanaramika gënanga la yatarima ai hidoku. Mä yomomanarama gënanga yägohara yolöleleani gënanga deʼ yähuloko önanga yolio de manga giama ihomoa.

¹¹ De o dumule madutu gënanga wahidingotoli mahomoa womatëngo iwïlöleleani; mä wolö leleani genangö yomomanarama iwigoharoli deʼ iwihikauku, daha iwihuloko wolio de aigiama ihomoa.

¹² Ipaha o dumule madutu gënanga wihidingotoli wolöleleani mahangeoka. Mä yomomanarama gënanga iwigoharoli deʼ iwiumo o dumule gënanga maporetika.

¹³ Mabaha o dumule madutu gënanga wato, ’Ngohi kokiani okiaoli todiai? Ngohi aha tihidingoto ahingohaka mahirete tïdora-dora. Maraioka ünanga aha önanga iwihoromati!ʼ

¹⁴ Mä maöraha yomomanarama o dumule gënanga iwimäke madumule madutu gënanga aingohaka, önanga imaketemo, ’Nënanga una mapuhaka madutu. Niaino ngone hïtoma ünanga, la ngone hamäke aipuhaka.’

¹⁵ De önanga iwililiara ünanga o dumule gënanga ma poretika daha iwitoma.” De o Yesus woleha, ”Aa, nako madumule madutu gënanga wolioli, ünanga aha okia wodiai yomomanaramika gënanga?

¹⁶ Maraioka ünanga aha waino deʼ wätoma yomomanarama gënanga, daha o dumule gënanga wohilapahi yomomanarama mahomoaika.” Yoihene gënanga, o nyawa yowöe-wöe iwitemo o Yesusika, ”Ha kali-kali kowali!”

¹⁷ O Yesus wäpulono önanga de wotemo, ”Nako hokogënanga, okia mamangarati Ma Jou Ai Demo ma Buku mademo nënanga? ’O helewo yapäke-päkeua o tau yododiai, idadioka o helewo yairi-irikika.’

¹⁸ O nyawa mata-mata yotifa-tifa o helewouku gënanga aha yowedere; deʼ o nagona yätapal̄u o helewo gënanga aha yäkiroiti yodadi o kafo.”

O soungu mabobangu maloleha

¹⁹ O agama maguru-guru deʼ o imam-imam mangahäeke ihiöriki o hitotero gënanga o Yesus wahidungutu onangika. Karana gënanga önanga yöigo Unanga iwitagoko o örahagënanga dika, mä onanga yämodongo o nyawa yowöe-wöe.

²⁰ Ho önanga yolingiri o öraha maoa. Onanga yähewa o nyawa la imadiai hokä o nyawa manga hininga itebini, deʼ o nyawa geönanga yähuloko iwibudi o Yesus de o loleha-loleha hupaya önanga yakunu iwihilapahi Unanga magubernur aihaku deʼ aikuahaika.

²¹ O nyawa yähewa-hewaka gënanga iwitemo o Yesusika, ”Bapa Guru, ngomi mihiöriki naheto-hetongoka deʼ nodoto-dotokoka gënanga mata-mata Bapa itiai. Ngomi mianäkoli Bapa nodotoko nohitotiaika yakorona ma Jou Madutu aimau mangale o nyawa, hababu Bapa nä pulonua manyawa.

²² Karana gënanga beika Bapa nahetongo ngomino, imoteke nanga agama madatoro, kayakunu o soungu hofangu ma Kaisarika ekola kowali?”

²³ Mä o Yesus wohiöriki mangahininga madorou. Karana gënanga Unanga wätemo,

²⁴ ”Beika nihihimatoko Ngohino o tiwi o haäka o gahumu moi. O dulada deʼ o romanga nënanga tonaguna?” ”Ma Kaisar,” önanga yohaluhu.

²⁵ ”Nako hokogënanga,” o Yesus wato onangika, ”nihi döaka ma Kaisarika, okia naga toma Kaisar deʼ ma Jou Madutuika, okia naga toma Jou Madutu.”

²⁶ O nyawa yowöe-wöe manga himangoka gënanga inyata önanga yakunua yamäke kaohowono moiö de o Yesusoka. Onanga duga-duga kaimari rïdoka dika deʼ yögiriri Ai bobaluhu gënanga.

Yohonengoka de yomomiki maloleha

²⁷ O Saduki manyawa manga doomuino yamuruono naga yaino o Yesusino. (Onanga ganga o doomu kiaka manga damäke o nyawa yohonengoka aha yomomikokaua.) Onanga iwileha o Yesusika,

²⁸ ”Bapa Guru, o Musa watulihi o tita nënanga mangale ngone: Nako womatëngo wohonenge deʼ unanga aingohaka koiwa, ai dodoto kokiani wokawingi de ngoi fäo hupaya wohone-honengoka gënanga iwihidöaka naga aidifauku.

²⁹ Idadioka naga yätumidi o riadodoto. Woria-riaka wokawingi, de koiwahi aingohaka ünanga wohonenge.

³⁰ Ipaha aidodoto wokawingi de airiaka ngoi fäo, mä unangö aingohaka koiwahi de wohonenge.

³¹ O hali hokogënanga idadioli de aidodoto mahangeoka deʼ gila-gila hiädono yätumidö.

³² Mabaha o ngoheka gënanga mohonenge.

³³ O nyawa yohone-honenge yomomikoli mawangeoka, o ngoheka gënanga tonagona manga hekata? Hababu yatumidö yokawingoka de muna.”

³⁴ O Yesus wohaluhu, ”O nyawa yowöwango-wango o öraha nënanga yokawingi,

³⁵ mä o nyawa yohone-honengoka de ipatutu yomomikoli, deʼ yowango o öraha aha iböboa-boa, önanga yokawingua.

³⁶ Madodagi önanga hokä o malaekat, deʼ yohonengua. Onanga ganga ma Jou Madutu aingoha-ngohaka, hababu önanga yohonengoka de yomomikoli.

³⁷ O Musa mahirete wohinyata madodiaika o nyawa yohone-honenge aha yomomikoli. Ai dulihi magoronaka yakorona o momo o gol̄owaka itoka-tokara gënanga ünanga wïhetongo ma Jou hokä ’o Abraham ai Jou Madutu, o Ishak ai Jou Madutu, deʼ o Yakub ai Jou Madutu’.

³⁸ Aa, ma Jou Madutu gënanga o nyawa yohone-honengua manga Jou Madutu! Unanga o nyawa yowango-wango manga Jou Madutu! Hababu mangale ma Jou Madutu, o nyawa mata-mata yowango.”

³⁹ Yamuruono naga o agama maguru yotemo, ”Bapa Guru ani bobaluhu duru yaoa.”

⁴⁰ Hababu gënanga önanga yomoroënokaua yoleha okia naga o Yesusika.

O Koano Wohihohalamati maloleha

⁴¹ O Yesus wäleha onangika, ”Sarakia yakunu yahetongo ma Koano Wohihohalamati o Daud aidifauku?

⁴² Enahioko o Daud mahirete wotemo o Mazmur mabuku magoronaka, ’Ma Jou wïtemo ahi Jouika: No gogeruku Ahi nirakoka,

⁴³ hiädono Ngohi tadiai Ani haturü-haturü ngonaika imakadunu.’

⁴⁴ Hoʼ nako o Daud wïhetongo ma Koano Wohihohalamati gënanga ’Ma Jou’, sarakia yakunu Unanga o Daud aidifauku?”

O hohininga hupaya imahi dodiai o agama maguru-guruika

⁴⁵ O nyawa manga ngöe yoihene magogiriaka o Yesus woade-ade, Unanga wätemo iwinöninïkika,

⁴⁶ ”Nimahidodiai o agama maguru-guruika. Onanga yöigo yotagi-tagi de manga juba magögurutuku, deʼ yöigo yähoromati o paharoka. Onanga yöigo o ngï mahohoromati o pupuji matauoka deʼ o rame-rameoka.

⁴⁷ Onanga yäelu-eluku o ngoheka bobao deʼ yäora manga tau. Deʼ mangale hitamunu mangadorou, önanga yohubayanga yakuru-kurutu! Manga hukumanga ahao itubuho!”