O LUKAS 19 - MA JOU AI BUKU O ABARI MA OA

O Yesus de o Zakheus

¹ Maöraha o Yesus womahi ädono o Yerikho mabereraika, Unanga wotagi gila-gila watilakuru o berera gënanga.

² O bereraka gënanga naga womatëngo o soungu wogaho-gahoko manga häeke wokaya-kaya. Ai romanga o Zakheus.

³ Unanga woigo wïmäke o Yesus o naguna gënanga, mäkarana o nyawa yowöeholi deʼ unanga mahirete wopoluluku, hoünanga wakunua wïmäke o Yesus.

⁴ Hoʼ, ünanga womapopäta wärorebe o nyawa mangangöe, daha wadöa o gota o utu moi, hupaya yakunu wïmäke o Yesus kiaka mahutuohi aha wakaino genangino.

⁵ Maöraha o Yesus wadono o gota gënanga, ünanga womä lega womamataga daha wotemo, ”Zakheus, nouti itaiti! Hababu Ngohi kokiani totulu anitauika o wange nënanga.”

⁶ O Zakheus womatai-taiti wouti deʼ wïbuhuku o Yesus de aimörene.

⁷ O nyawa mata-mata yamäke o hali gënanga muläenge yokurubungu. Onanga yotemo, ”Hedeke! Unanga woiki wotamu o nyawa madorou manga tauika!”

⁸ Ipaha aitauoka, o Zakheus womaoko deʼ wotemo o Yesusika, ”Jou, ahiarata mahononga aha ngohi tahihadaka o mihikini manyawaika; deʼ o nagona dika tärusioka, aha ngohi tofangu tohigilio onangika higali maiata!”

⁹ Daha o Yesus wato, ”O wange nënanga ngona deʼ mata-mata anitau madol̄a ma Jou Madutu winihihalamati deʼ winihidöaka o ngango mahungi, hababu ngonaö o Abraham aidifauku.

¹⁰ O Nyawa manga Ngohaka waino la wälingiri deʼ wahihalamati o nyawa yohihihanga o ngëkomo.”

O hitotero o tiwi gurasi

¹¹ Magogiria o nyawa kayo ihe-ihenohi o Yesus woade-ade, Unanga wohiade-ade moi o hitotero. Hababu, o öraha gënanga Unanga naga watigiikaka o Yerusalemika, deʼ o nyawa yatobote ma Jou Madutu de majapatioka aha wopareta hokä o Koano o duniaka.

¹² O Yesus wato, ”Naga womatëngo o kokoano manga ngohaka woiki o berera magogurutika la iwitede wodadi o koano, ipaha wolioli.

¹³ Wosobouahi, ünanga wä ahoko iwïlöleleani yangimoi, daha wahidöaka onangika o tiwi o gurasi o nyawa moi o gahumu moi. ’Ngohi toikohi ho nimahukunu de o tiwi nënanga,’ ünanga wätemo onangika.

¹⁴ Mä aiberera manyawa gënanga iwïdohata unangika. Hoʼ, ünanga de wosoboka, önanga ihidingoto manga huhuloko la ihingahu, ’Ngomi mioluku o nyawa nënanga wodadi mia koano.’

¹⁵ Mä o koano mangohaka gënanga iwitede wodadi o koano, ipaha wolioli aibereraika. De majapati ünanga wäahoko iwïlöleleani iwïhimanga la wohiöriki okia moi mautumu önanga yamäkeoka.

¹⁶ Wolöleleani madodihiraka waino deʼ wotemo, ’Tuanga, o tiwi o gurasi o gahumu moi Tuanga nohihidöa-döakoka gënanga, tadadioka ngimoi.’

¹⁷ ’Irahai,’ matuanga gënanga wato, ’ngona yolöleleani maoa! Karana o hali mahohumujuroka ngona yakunu honi ngaku, ngohi aha tonigoraka o kota ngimoi mapopareta.’

¹⁸ Wolöleleani mahinotoka waino deʼ wotemo, ’Tuanga, o tiwi o gurasi o gahumu moi nohi döa-döakoka gënanga, tadadioka motoa.’

¹⁹ Wolöleleaniika gënanga ma koano gënanga wïtemo, ’Ngona aha nodadi o kota motoa mapopareta.’

²⁰ Wolöleleani mahomoa waino deʼ wotemo, ’Tuanga, nënanga anitiwi Tuanga; ngohi tagogono o lesooka.

²¹ Ngohi tonï modongo Tuanga, hababu Tuanga o nyawa nototogowini. Tuanga nal̄ë okia naga koto ngonaua, deʼ Tuanga nal̄ë o hasili o ngï kiaka nodato-datomua.’

²² Makoano gënanga wïtemo unangika, ’Ngona yolöleleani madorou! Imadäene de anidemo-demo mahirete ngohi aha tonihukumu ngona. Ngona nohiöriki ngohi o nyawa yototogowini; ngohi tal̄ëokia naga kotongohiua, deʼ tal̄ë mahasili o ngï kiaka todato-datomua.

²³ Nako hokogënanga yadodoa ho ngona nohingohamua o tiwi gënanga o bangika hupaya o öraha kia ngohi tolioli ngohi yakunu tatarima ahitiwi dema bunga?ʼ

²⁴ Ipaha ma koano gënanga wätemo o nyawa imaoko-okoino genangoka, ’Nia l̄ë o tiwi gënanga unangoka deʼ nihidöaka wolöleleanika wamömäke-mäke o tiwi o gurasi ngimoi gënanga.’

²⁵ Mä o nyawa gënanga yotemo, ’Tuanga, ünanga wamäkeoka ngimoi.’

²⁶ Ma koano gënanga wohaluhu, ’Nio hohininga: o nyawa dema enangoka, unangika aha iholoi iwöeoli iwihidöaka. Mä o nyawa manga kia-kiaua, okianaga unangoka aha yal̄ëoli unangoka.

²⁷ Deʼ o öraha nënanga niaaoino nengino ahi haturü-haturü gënanga yoolu-oluku ngohi todadi manga koano. Niä toma önanga mata-mata ahi himangoka!ʼ ”

O Yesus wowohama o Yerusalemika hokä o koano

²⁸ Ipaha o Yesus wotemoka mata-mata gënanga manga himangoka Unanga womäjobo wodumutu o Yerusalemika.

²⁹ Maöraha itigi-tigi yadono o Betfage deʼ o Betania maberera o Zaitun ma Doporonoka, Unanga wähuloko yahinoto iwinöninïki yoiki yohira.

³⁰ ”O kapongo nanga himangika genangika nioiki,” o Yesus wätemo onangika, ”öraha okia ngini niwohama dokengika, ngini aha nia mäke moi o keledai mangohaka ilikoika. O keledai gënanga komaiwahi o nyawa yöbarene. Niahohe o keledai gënanga deʼ niao nenangino.

³¹ Nako o nyawa inïleha nginika, ’Yadodoa hongini niahohe o keledai gënanga?ʼ niahetongo, ’Ma Jou wöparalu.’ ”

³² Yahinoto iwinöninïki gënanga yoiki, deʼ yamäkeika mata-mata imatero hokä waheto-hetongoka.

³³ Magogiriaka önanga yahohe o keledai mangohaka gënanga, madutu wätemo onangika, ”Yadodoa ho ngini niahohe o keledai gënanga?”

³⁴ Onanga yohaluhu, ”Ma Jou wöparalu.”

³⁵ Daha önanga yao o keledai mangohaka gënanga o Yesusika. Ipaha önanga ihinao manga juba o keledai gënanga maporetuku, deʼ o Yesus iwihidöa o keledaiil̄e.

³⁶ Magogiriaka o Yesus wakaino de wobarenuku o keledai gënanga, o nyawa manga ngöe manga juba ihihohe o ngekomika.

³⁷ Maöraha o Yesus ngade womahiädono o Yerusalemika, o Zaitun ma Doporonoka mangëkomo iuti-uti, mata-mata iwinöninïki yowöe-wöe gënanga yomuläenge yopöa-pöaka iwihigiriri ma Jou Madutu deʼ yotemo tarimakasi Unangika karana mata-mata i hëra-hëranga önanga yahakihioka.

³⁸ Onanga yopöaka, ”Iwihi barakati ma Koano woböa-böa de ma Jou airomanga! O lolä o horogaka, deʼ iwihigiriri ma Jou Madutu!”

³⁹ O nyawa yowöe-wöe manga hidogoronaka gënanga yamuruono naga o Farisi manyawa iwitemo o Yesusika, ”Bapa Guru, ininöninïki Bapa nähuloko imarïdi.”

⁴⁰ O Yesus wohaluhu, ”Ningaku! Nako önanga imarïdi, o helewo-o helewo nënanga aha ipöaka.”

O Yesus wögari o Yerusalem

⁴¹ Maöraha o Yesus kawotigimonga de o Yerusalem, deʼ wölega o berera gënanga, Unanga wögari.

⁴² Wato, ”Hiokö, hokokia maoa nako o wange nënanga ngona nohiöriki okia yakunu inïgao o dame! Mä orahanënanga ngona konamäkeua.

⁴³ Ngona aha namäo moi maöraha, kiaka anihaturü yodiai o dadatoko-dadatoko inihi gilolitino; önanga aha inihigiloliti deʼ inihidehoto de hagala o libuku.

⁴⁴ Onanga aha iniwedere ngona kamamoi de ani berera manyawa; deʼ koiwa moi o helewo aha önanga yamal̄aika imateke tapal̄uku marioka, hababu ngona nolegaikaua o öraha ma Jou Madutu woböa la wonihihalamati ngona!”

O Yesus wowohama ma Jou ai Tauika

⁴⁵ O Yesus wowohama ma Jou ai Tauika deʼ muläenge wäduhu imahohuku-hukunu genangoka.

⁴⁶ ”Ma Jou Ai Demo ma Buku magoronaka,” wätemo onangika, ïtulihi hokonënanga: Ma Jou Madutu wotemo, ’Ahi tau aha idadi o niniata mangï matau.’ Mä ngini niadiai yoora-ora manga igutu!”

⁴⁷ O wange higetongo o Yesus wodotoko ma Jou ai Tau magoronaka. O imam-imam manga häeke, deʼ o agama maguru-guru, de o Yahudioka mangatutuda, yomau iwitoma Unanga,

⁴⁸ mä yamäkeua mangëkomo la yadiai o hali gënanga, karana o nyawa mata-mata hoko genangika dika iwihigihene Unanga, deʼ yatauru manga hininga Ai demo-demoika.