O LUKAS 13 - MA JOU AI BUKU O ABARI MA OA

Nako niamal̄aua o baradoha done nibinaha

¹ O öraha gënanga o nyawa iwïade-ade o Yesusika, yakorona o Galilea manyawa yamuruono naga o Pilatus wätoma, maöraha önanga ihihuba manga huhuba ma Jou Madutuika.

² Watötakihiri o ade-ade gënanga, o Yesus wato, ”Karana o Galilea manyawa yätoma hokogënanga, ngini niatobote gënanga manyonyata igoungu önanga iholoi yobaradoha de mata-mata o Galilea manyawa mahomoa?

³ Hakali-kali kowali! Mä niohohininga: Nako ngini nitobaua o baradoha kanidiaiohi, ngini mata-mata aha nihonenge, hokä onangoli.

⁴ Sarakiali de yangimoi de yatufange yohone-honenge o Siloamoka, maöraha o candi gënanga yätapal̄u önanga? Ngini niatobote gënanga ihidumutu önanga iholoi i lamoko manga baradoha de mata-mata o nyawa mahomoa yogögogere o Yerusalemoka?

⁵ Hakali-kali kowali! Mamoiohi Ngohi totemo: Nako ngini nitobaua, o baradoha kanidiaiohi, ngini mata-mata aha nihonenge hokä onangoli.”

O hitotero o ara mautu ihöhohokua

⁶ Iböto gënanga o Yesus wohi ade-adeö o hitotero nënanga, ”Naga womatëngo aiara mautu aiangguru madumuleoka. O wange moiuku ünanga woiki womä lingiri o ara mahohoko mautuika gënanga, mä gahumu moiö de wamäkeua.

⁷ Hoʼ, ünanga wïtemo o dumule wogöa-göanika, ’Namäke, o taongo hange iböto ngohi taino talingiri o ara mahohoko mautuoka nënanga, mä kamoi ö de tamäkeua. Natol̄angoka dika o ara mautu gënanga! Enanga duga-duga yamata o tonaka mahaki!ʼ

⁸ Mä o dumule wogöa-göana gënanga wohaluhu, ’Mal̄aikala ënanga iwango o taongo moiohi nënanga, Tuanga. Ngohi aha tapasolo matonaka ikilolitino deʼ tahouru matonaka.

⁹ Mudukua ënanga done ihohoko o taongo nanga himangoka. Mä nako kowali kaidadi Tuanga nähuloko yatol̄anga.’ ”

O Yesus womihi togumu momatëngo mohugu-hugu o Yahudioka manga Puji mawangeoka

¹⁰ Mamoiuku o Yahudioka manga Puji mawangeoka, o Yesus wodotoko o pupuji matau moioka.

¹¹ Genangoka naga o ngoheka momatëngo o taongo ngimoi de tufange iböto mopanyake, karana naga o womaha madorou ami dirioka. O ngoheka gënanga mohugu deʼ hakali-kali makunua momaoko moma totiail̄e.

¹² Maöraha o Yesus womimäke, womiahoko de womitemo munangika, ”Ayo, tongona anipanyake itogumoka!”

¹³ Daha o Yesus wakelenga Ai giama munanguku gënanga, deʼ o öraha gënanga dika münanga moma oko moma totiail̄e daha mipuji ma Jou Madutu.

¹⁴ O pupuji matau mabaluhu gënanga wongamo, hababu o Yesus wahitogumu o nyawa o Yahudioka manga Puji mawangeoka, karana gënanga ünanga wätemo o nyawa yowöe-wöeika, ”Naga o wange butanga la homanarama; niböa o wange butangaino la inihi togumu, uha o Puji mawangeoka!”

¹⁵ Ma Jou wohaluhu, ”Nielu-eluku ngini nënanga! O Puji mawangeoka o nyawa mata-mata ihihupu manga hapi ekola manga keledai makurungaka deʼ yao ihihupu la ihiokere.

¹⁶ Aa, o öraha nënanga nengoka naga o ngoheka momatëngo o Abraham aidifauku, o taongo ngimoi de tufange iböto o Ibilihi imi likoika. Yadodoa homünanga yakunua imïhohe ami liliko gënanga o Puji mawangeoka?”

¹⁷ O Yesus aibobaluhu gënanga yadiai o Yesus iwilawa-lawani duru yämal̄eke; mä o nyawa mahomoa mata-mata yosanangi yamäke hagala ihëra-hëranga o Yesus wadodiai.

O hitotero o sasawi mamui

¹⁸ O Yesus woleha, ”Ma orahoka ma Jou Madutu wopareta, kasarakia madodagi? De okia yakunu Ngohi tohitero?

¹⁹ Madodagi hokä o hitotero nënanga. Womatëngo wal̄ë o sasawi mamui gahumu moi daha wadatomo aidumuleoka. O mui gënanga iwango daha idadi o gota mautu, deʼ o totaleo imädiai maigutu o gota gënanga ma jaga-jagaika.”

O hitotero o ragi

²⁰ Mamoioli o Yesus woleha, ”Nako ma Jou Madutu wopareta, de okia yakunu tohitero madodagi?

²¹ Madodagi hokä o ragi o ngoheka momatëngo mal̄ë de mohiruae de o tarigu o litere moruata, hiädono mata-mata ihëro.”

O ngorana i popeneto

²² O dodagi magoronaka o Yerusalemika, o Yesus wakaino o kota-kota deʼ o kapo-kapongino de wodotoko.

²³ De naga o nyawa iwi leha Unangika, ”Bapa, boteka duga-duga kamanga huhutulu dika o nyawa aha yahihalamati?”

²⁴ O Yesus wohaluhu, ”Nima hidailako la niwohama nianonu o ngorana ipopeneto. Hababu, niohininga! O nyawa manga ngöe ima hidailako yowohama mä yamäkeua.

²⁵ Ma orahoka o tau madutu womomiki deʼ wabeno aingorana, ngini nimaokoino maporetoka deʼ muläenge nitolo-tolo daha nitemo, ’Tuanga o ngorana nomibelenga!ʼ Ma Tuanga gënanga aha wohaluhu, ’Ngohi tinï näkoua ngini okiaino!ʼ

²⁶ Ngini aha nihaluhu, ’Ngomi miokere deʼ miol̄omoka dede ngona Tuanga, deʼ Tuanga nodotokoka mia kota mangekomokaö!ʼ

²⁷ Mä ma Tuanga gënanga aha wotemoli, ’Ngohi tinï näkoua ngini okiaino. Nioiki nenangoka, ngini nidodiai o dorou!ʼ

²⁸ Ma orahoka ngini niamäke o Abraham, o Ishak deʼ o Yakub de o nabi mata-mata yomore-morene ma Jou Madutu ai Dunia ma Hungioka, ngini aha niari deʼ niatagongo o huha de o hangihara, karana ngini mahirete inïduhu nihupu.

²⁹ O nyawa manga ngöe aha yoböa o wange mahiwariha, deʼ o wange madumunoko, o koremiel̄e deʼ o koreharauku, deʼ aha yomore-morene ma Jou Madutu ai Dunia ma Hungioka.

³⁰ Igou-goungu, naga o nyawa yotototuru aha yodadi madodihiraka, deʼ naga o nyawa madodihiraka aha yodadi yototo turu.”

O Yesus aidora o Yerusalemika

³¹ O öraha gënanga dika, naga o Farisi manyawa yamuruono naga yoböa o Yesusino deʼ yato, ”Uha nenangoka nogogere! Noiki o ngï mahomoaika, hababu o Herodes womau wonitoma.”

³² O Yesus wohaluhu, ”Nioiki niwihingahu o nyawa ai fofaidäuaika gënanga, ’O wange nënanga deʼ yarehe Ngohi taduhu o womaha madorou deʼ Tahi togumu o nyawa yopopanyake, mä o wange mahangeoka, Ngohi aha tohidodogumu Ahi manarama.’

³³ Ngarokö hoko gënanga Ngohi kokiani tohigila-gila dika Ahi dodagi o wange nënanga, yarehe deʼ midiringi, hababu itorou o nabi womatëngo iwitoma o Yerusalem maporetoka.

³⁴ Yerusalem, Yerusalem! O nabi-nabi nätoma! Ma Jou Madutu ai huhuloko-huhuloko ngona näkaweli de o helewo hiädono yohonenge. Ma muruono iböto Ngohi tomau tätoomu mata-mata ani nyawa hokä o kuru-kuru ma ayo yagogono mangohaka magahuhu matimioka, mä ngona noluku!

³⁵ Karana gënanga ma Jou Madutu dede ngonaokaua. La nohi öriki, muläenge o öraha nënanga ngona aha nohimäke okaua Ngohi, hiädono Ngohi totemo, ’Niwihi barakati Unanga woböa-böa de ma Jou airomanga.’ ”