O KOLOSE 4 - MA JOU AI BUKU O ABARI MA OA

¹ Roriadodoto nidadi o tuanga! Kiani ngini nidiai nia gogilaongika de madiai deʼ iadili. Nio hininga tinginiö womatëngo nia baluhu o horogaka.

O hidumutu-hidumutu

² Kiani ngini nima niata de nia hininga magou-goungu deʼ nima göa-göana, de nitemo sukur ma Jou Madutuika.

³ Nima niatö mangale ngomi la ma Jou Madutu womihi döaka ngomino öraha maoa mangale mihigerewoto o abari mangale o Kristus ai rahasia. Karana o hali gënanga öraha nënanga ngohi naga o bui magoronaka.

⁴ Nima niata la ngohi takunu tohitararono o rahasia gënanga duru itararono hoka sarakia i goungu.

⁵ Ngini nia dodohanga magoronaka de o nyawa yongaku-ngakuua, kiani ngini niwango nisawaro de nia päke öraha mahigetongo nihidodiai.

⁶ Kiani ngini o hali-o hali nihi demo salalu yasanangi deʼ yätauru manga hininga. Kiani ngini nihi öriki sarakia ngini kiani nio baluhu o nyawa manga loleha-lo leha.

O hurata mabobaha deʼ o tabea

⁷ O Tikhikus, tongone nanga riadodoto hihohininga, aha winihi ngahu nginika hagala moi-moi mangale ngohi. Unanga womanarama wosetia mima kinïki de ngomi mangale ma Jou.

⁸ Ngohi tihuloko ünanga nginika de matiti, hupaya ngini nihi öriki tongomi mia wowango deʼ ngini nia mäke o lolaru.

⁹ O Onesimus aha woiki imanïki de o Tikhikus; ünanga o nyawa womatëngo nginino. Unanga o nyawa wososetia, deʼ ngomi miwi hohininga. Unanga deʼ o Tikhikus aha inihingahu nginika hagala okia honanga idadi tongohi ahi ngïoka nënanga.

¹⁰ O Aristarkhus, naga o bui magoronaka dede ngohi, mihidingoto mia tabea nginika. Hoko genangö o Markus, riadodoto o ahali moi de o Barnabas. (Ngini nihi dingotoka o abari mangale niwi buhuku ünanga nako ünanga woböa nginika.)

¹¹ Ai tabeali o Yesusino ai romangö o Yustus. O Yahudioka manyawaino yongakuoka ma Jou Yesusika, duga-duga önanga yaruange dika öraha nënanga yomanarama mima kinïki dede ngohi mangale mihidagi mia manarama ma Jou Madutuino. Onanga duru yagou-goungu ihi riwo ngohi.

¹² Ai tabea o Epafrasoka. Unangö nginino. Unanga o Kristus Yesus ai gilaongo, hoko genangika woma niati wagou-goungu mangale ngini. Unanga duru wogahoko ma Jou Madutuika la ngini nia ngongaku idadi ikuata deʼ ngini i gou-goungu nibaluhu, hupaya ngini de madiai nihi ngounu ma Jou Madutu ai mauika.

¹³ Ngohi mahirete tahakihi ünanga womanaramoka kohagiria mangale ngini deʼ mangale o Laodikia manyawa deʼ o Hierapolis.

¹⁴ Madotere o Lukas, ngone hihohininga, deʼ o Demas i hi dingoto manga tabea nginika.

¹⁵ Nihi adonikahi tongomi mia tabea o roriadodotoika o Haranioka o Laodikiaka; o Nimfaikaö, deʼ o jemaatika yopo puji-puji ai tauoka.

¹⁶ O hurata nënanga nima teke dabasa i böto nginika, nihidailako la gënanga nia basaö o Laodikia ma jemaatika. Hoko genangoli ngini mahirete kiani o hurata nia basa aha ihi dingoto o Laodikia de yaino nginika.

¹⁷ Deʼ niwihi ngahu o Arkhipus, ”Nohitiai ani manarama inihi döakoka ngonaika mangale nileleani ma Jou.”

¹⁸ Ahi tabea ngohioka, o Paulus. Ngohi mahirete totulihi o hidoku nënanga. Uha nia wohanga ngohi kanagahi o bui magoronaka! Tanu ma Jou winihi barakati ngini! Tongomi mia horomati, o Paulus