O KOLOSE 3 - MA JOU AI BUKU O ABARI MA OA

¹ Ngini inihi wangokali nima kinïki de o Kristus. Hababu gënanga ngini kiani nihidailako mangale nia mäke o hali-o hali o horogaka, kiaka o Kristus wopareta imanïki de ma Jou Madutu.

² Nia dibanga nihimeta o hali-o hali genangika, uha o hali-o hali o duniaka.

³ Hababu ngini nihonengoka deʼ nia ngango i iunika de o Kristus ma Jou Madutuoka.

⁴ Aa, nia ngango madutu matiti ganga o Kristus deʼ damä nako Unanga winimäke, nginiö aha nimahiwalimi mahimangiha nimakinïki dede Unanga Ai mulia magoronaka!

O ngango i hira-hira deʼ o ngango mahungi

⁵ Hababu gënanga, nia hohonengoka o dunia manahihu ihihü huha nia diri, hokä o hudali, o hali-o hali i patu-patutua yamoteke manga hininga ma nahihu, o nahihu i to torou, deʼ o kal̄il̄u (karana o kal̄il̄u ganga kaima däene de yahuba o gomanga).

⁶ O hali-o hali marupa hokogënanga yamomiki maJou Madutu ai murukä o nyawa iwihi ngou-ngounikaua.

⁷ Ma hira nginiö mahirete nia moteke o nahihu-o nahihu gënanga, maöraha ngini ini kuaha ënanga.

⁸ Mä oraha nënanga kiani ngini nia umo o hali-o hali itotorou nia dirino; i bötohi ningamo, ekola nitodohata, ekola niä igoua nia hiningaka o nyawa mahomoaika. Uha hakali-kali i hupu nia uruiha o doa-doana mademo ekola o demo ipese-peseke.

⁹ Uha nima kokeluku moi de moi, hababu nia ngango i hira-hira de hagala mabiaha ngini nia mal̄aka.

¹⁰ Oraha nënanga ngini inihi döakoka o ngango mahungi. Ngini ganga o nyawa mahungi, magogiria de madodogumu koiwa wahungi mangale wohidö dadadi, enagënanga ma Jou Madutu, i moteke Ai rupa mahirete. Madungutu enagënanga la ngini niwi näko de madiai ma Jou Madutu.

¹¹ Hokä mahasili genangino yahihanga hagala i tingaka de fara o Yahudi okaua nyawa deʼ o Yahudioka ua manga hidogoronaka, o nyawa ima huna-huna de o nyawa ima huna-hunaua, koiwaka naga itingaka deʼ ifara o nyawa mahomoaino de o adati yanäko-näkoua manga hidogoronaka, o gilaongo deʼ o nyawa yololapahioka manga hidogoronaka, hababu o Kristus ganga halaga okia dika deʼ unanga worimoi de önanga mata-mata!

¹² Riadodoto ganga ma Jou Madutu ai umati. Ma Jou Madutu winihininga ngini deʼ wini iriki ngini mangale nidadi to Unanga womadinga-dingakoka. Hababu gënanga ngini kiani nihimatoko nia dora de nia hayanga, ngini kiani nia hininga yaoa, nia hininga i tipokouku, nia hininga i bole-bole, deʼ nitäna o hangihara.

¹³ Ngini kiani nisabari moi de moika, deʼ nimahika apongo nako naga o hininga nia gogono mahomoaika. O Jou de Ai hininga i sosanangi winihi apongo ngini, ho nginiö kiani nimau nimahika apongo moi de moi.

¹⁴ Deʼ duru mal̄okuoka, enagënanga: Ngini kiani nimakodora hababu o dora gënanga inihidadi moioka Roriadodoto mata-mata hiädono nidadi itiai.

¹⁵ Kokiani nia putuhu-putuhu ihi tatapu o dame o Kristus winihi döa-döakoka nia hininga magoronaka. Hababu ma Jou Madutu wini ahoko ngini mangale nidadi o röehe moi mahidoku, hupaya ngini niwango o dame magoronaka o Kristusino gënanga. Kokiani ngini nitarima kasi.

¹⁶ Kokiani o Kristus ai dodötoko i omanga o barakati yawomo nia hininga magoronaka. De kiani duru nimasosawaro nima kodotoko deʼ nima hikodöaka mangale. Ni hi nyanyi o mazmur deʼ nipuji de o rohani manyanyi, ninyanyi mangale ma Jou Madutu de nia mamäo o sukur nia hininga magoronaka.

¹⁷ Hagala okia ngini niadiai ekola nihi demo, kiani niadiai deʼ nihi demo gënanga de ma Jou Yesus ai romanga. Ni sukur o Ama ma Jou Madutuika mangale o Yesus okia wadiai nginika.

O nyawa manga diri i madohanga o ngango mahungi magoronaka

¹⁸ Roriadodoto nidadi o hekata! Nia hingounu nia rokatika, hababu kokiani hoko gënanga nia manarama hokä o Haranioka manyawa.

¹⁹ Roriadodoto nidadi o rokata! Nia dora nia hekatika. Uha nia dodobuturungu onangika.

²⁰ Ngoha-ngohaka! Ganga tingini nia momoteke hokä o Haranioka manyawa mangale hoko genangika nia hingounu nia ayo de nia amaika, karana genangala yasosanangi ma Jou Madutu ai hininga.

²¹ Roriadodoto nidadi o ama! Nia ngoha-ngohaka uha manga hininga niahiri hiädono to önanga manga ngonganono itoaka.

²² Roriadodoto nidadi o gilaongo! Hagala o hali magoronaka, kiani ngini nia hingounu nia tuangika o duniaka nënanga. Uha nia hingounu onangika duga-duga maöraha önanga magogiria ini lega-lega ngini, karana ngini nioigo ini higiriri. Nia hingounu önanga de nia hininga mariko-rikoto, karana ngini niwi horomati ma Jou.

²³ O manarama okia dika inihi döaka nginika, kiani ngini nia manarama de nia hininga magahumu, matero-tero ngini niwi leleani ma Jou, de duga-duga ko o nyawa ikaua.

²⁴ Nio hininga tingini nia hewa aha nia tarima ma Jouino. Okia ma Jou watiaioka mangale Ai umati, gënanga aha inihi döaka nginika. Hababu nia baluhu madiai magogiria niwi leleani ngini ganga o Kristus mahirete.

²⁵ Deʼ o nagonaö yodiai o howono, aha yatagongo manga howo-howono gënanga; karana ma Jou wapulonua o biono.