O KISAH RASUL-RASUL 4 - MA JOU AI BUKU O ABARI MA OA

O Petrus deʼ o Yohanis o Agama ma Juru Hakimi mahimangoka

¹ Maöraha o Petrus deʼ o Yohanis kayo temo-temohi de o nyawa yowöe-wöe gënanga o imam-imam manga häeke deʼ ma Jou ai Tau magogöana manga balu-baluhu de o Saduki manyawa yoböa o Petrus deʼ o Yohanisika.

² Onanga yongamo hababu o Petrus deʼ o Yohanis ihingahu o nyawa yowöe-wöeika o Yesus wohonengoka de wowangookali. Deʼ genanga inyata igoungu o nyawa yohone-honengoka aha yowangokali.

³ Onanga yätagoko o rasul yahinoto gënanga daha yahingohama o bui magoronaika gënanga. Deʼ karana yohutuoka, o Petrus deʼ o Yohanis yätumunguku genangoka hiädono yarehino.

⁴ Mä o nyawa yowöe-wöe yoihe-ihenoka o rasul-rasul manga dodötoko gënanga, manga ngöe yongaku. Manga gegëtongo i dogo-dogo hiädono imadadi done ho yaribuhu motoa manyawa.

⁵ Iyarehino o Agama majö Juru Hakimi, o Yahudioka manga tutuda, deʼ o agamaka maguru-guru imatoömu o Yerusalemino.

⁶ Onanga imakamäke de o Imam womo Mulia o Hanas, de o Kayafas, o Yohanis, o Aleksander, deʼ mata-mata iwohama ma imam womomulia aiahaluku.

⁷ O Petrus deʼ o Yohanis yaao yahihimanga onangika, daha önanga yäleha, ”Sarakia madodagi ngini niwihi togumu o nyawa wolugu-lugu gënanga? De o kuata okia de o kuaha o nagonaino ngini niadiaioka gënanga?”

⁸ O Petrus, iwikuaha ma Jou Madutu ai Womaha, wäbaluhu, ”Tua-tuanga o hoana iago-agomo matutuda deʼ Tua-tuanga Juru Hakimi!

⁹ Ngomi nimitailako o wange nënanga karana midiai o oa-oa mangale miwiriwo o nyawa womatëngo wolugu-lugu, deʼ karana Tua-tuanga nimau nihiöriki sarakia o nyawa gënanga miwihi togumoka.

¹⁰ Aa, Tua-tuanga nima mata-mata kiani nihiöriki deʼ mata-mata o hoana o Israelokaö kiani nihiöriki o nyawa nënanga womaokoino örahanënanga de airöehe itotumuloa niahimangoka Tua-tuanga, karana o kuata deʼ o kuaha o Yesus Kristusoka o Nazaret manyawa gënanga. Tua-tuanga niwisaliboka o Yesus gënanga, mä ma Jou Madutu wihiwangookali Unanga.

¹¹ O Yesus nenangala ihingahu o ayat nënanga Ma Jou Ai Demo ma Buku magoronaka, ’O helewo niapäke-päkeua ngini o tau nidodiai, ma inyata idadi o helewo hairi-irikino.’

¹² De o Yesus dika o nyawa yohalamati. Hababu o dunia magilolitino o nyawa manga hidogoronaka koiwa moi o nyawa mahomoa yamäkeoka o kuaha ma Jou Madutuino mangale inahihalamati ngone.”

¹³ O Döomu ya Totailako gënanga yohëranga yamäke manga barani o Petrus deʼ o Yohanis, hongoli önanga ihiöriki o rasul yahinoto gënanga naga o nyawa biaha koiwa manga hakola. Daha önanga yänako o rasul yahinoto gënanga nagalä o nyawa iwinöninïki o Yesus.

¹⁴ Mä onanga okia-kiaua yakunu yotemo, hababu o nyawa iwihitogu-togumoka gënanga, naga womaokoino genangoka o Petrus deʼ o Yohanis toönanga manga himangoka.

¹⁵ Onanga yahuloko o rasul yahinoto gënanga yohupu yatotailako mangïoka gënanga, ahao önanga imaki tibanga.

¹⁶ Onanga yato, ”Ngone kiani okia hodiai o nyawaika nënanga? O nyawa mata-mata yogogogere o Yerusalemoka ihikokiorikoka ihohëra-hëranga kabiahaua nënanga, yadiaioka önanga yahinoto. Ngone hakunua hohipongono gënanga.

¹⁷ Mä hupaya o hali nënanga uha yodogerewoto iholoi i kurutikali o nyawa manga hidogoronaka, niaino ngone hataaere önanga yahinoto, önanga hakali-kali yakunokaua yätemo o nyawa ima tëngoikaö de yapäke o romanga o Yesus.”

¹⁸ Onanga yä ahoko o rasul yahinoto gënanga yowohamoli, deʼ yahingahu önanga hakali-kali iyakunokaua yahetongo ekola yodotoko de o Yesus airomanga.

¹⁹ Mä o Petrus deʼ o Yohanis yohaluhu, ”Niapikiri mahirete, okia itiai ma Jou Madutu aihimangoka: mia moteke Tua-tuanga niapareta ekola miamoteke ma Jou Madutu aipareta.

²⁰ Hababu ngomi miyakunua mima togumu mihi demo mangale okia ngomi mia mäkeoka deʼ mihenoka mahirete.”

²¹ Yatotailako gënanga matiti moiö de koiwa yamäke yakunu yähukumu o Petrus deʼ o Yohanis. Hoʼ onanga yähangihara o rasul yahinoto gënanga, aha yapidili yahinotö hababu mata-mata o nyawa iwi higiriri ma Jou Madutu, hababu okia idadioka gënanga.

²² O nyawa wamäke o hitogumu i hëra-hëranga gënanga ai umuru o taongo moruata i holoioka.

O nyawa yongaku-ngaku imagahoko o barani ma Jouino

²³ O Petrus deʼ o Yohanis yapidilioka, önanga yoiki manga dodiawoika deʼ yoade-ade onangika mata-mata manga demo o imam-imam manga häeke deʼ o Yahudioka manga tutuda-tutuda gënanga.

²⁴ Kadeyoihene mangadodiawo önanga gënanga, önanga imakomoteke de o hininga moi yohubayanga ma Jou Madutuika. Onanga yato, ”Jou, Ngonala nohidadioka o dihanga deʼ o dunia deʼ o ngöto de madol̄a mata-mata.

²⁵ De ani Womaha Ngona notemoka miaete de miatohoraika, o Daud, enagënanga Ani gilaongo; Ngona notemo, ’Yadodoa hagala o nyawa iwinäko-näkoua ma Jou, yongamo; yadodoa o hoana de o berera yodiai o datoro ibobaraguna ua?

²⁶ O dunia ma kokoano imahidiai mangale yoparangi, deʼ o tutuda-tutuda yorimoi inilawani Jou deʼ o Koano Wohi hohalamati.’

²⁷ Hababu igoungu o Herodes deʼ o Pontius Pilatus yodiaioka o döomu de hagala o nyawa ininäko-näkoua ma Jou de hagala o Israeloka manyawa o kotaka nënanga. Onanga imakamäke mangale iwilawani o Yesus Anigilaongo wotebi-tebini gënanga, Ngona nigorakoka wodadi o Koano Wohihohalamati.

²⁸ Onanga yorimoi mangale yodiai hagala moi-moi, Ngona nohitatapuoka iholoi ihira aha idadi gënanga. Deʼ Ngona nohitatapu gënanga imoteke Anikuaha deʼ Animau mahirete.

²⁹ Orahanënanga, Jou, namäke sarakia önanga imihangihara ngomi. Deʼ nomihigumal̄a ngomi, Anigogilaongo nënanga, mihingahu-ngahu Anidemo de mihawanua.

³⁰ Nomihi döaka Aniroriwo hupaya o nyawa yopopanyake miahitogumu deʼ ihëra-hëranga de o hali-o hali kabiahaua idadi imoteke makuaha deʼ makuata o Yesus airomangino, Ani Gilaongo Ai dödebi-debini gënanga.”

³¹ Iböto önanga yohubayanga, o ngï önanga imatotoömu gënanga igiwi. De önanga mata-mata yäkuaha ma Jou Madutu ai Womaha, deʼ muläenge yotemo-temo de manga baranioka duru, mangale o abari ma Jou Madutuino.

Mata-mata yodadi kamoi

³² Mata-mata o nyawa yongaku-ngakuoka gënanga yowango o hininga moi deʼ o jiwa moi. O nyawa moiö de koiwa onangino yatibanga okia yapäkeino gänga toönanga mahirete. Hagala moi-moi naga onangoka, önanga yapäke imamata-mata.

³³ De o kuaha ilamoko, o rasul-rasul gënanga ihidöaka o hakïhi, o Yesus wowangokali. Ma Jou Madutu duru wahibarakati önanga.

³⁴ Okia-kiaua manga kuranga o nyawa moiö de önanga manga hidogoronaka. Hababu toönanga manga tonaka ekola manga tau, yahukunu manga tonaka ekola toönanga manga tau gënanga; daha matiwi maijaino gënanga önanga yao

³⁵ deʼ onanga ihilapahi o rasul-rasulika. Ahao o tiwi gënanga yahikodoku o nyawa moi-nyawa moika yopo paralu ënanga.

^36-37 Hoko genangö de o Yusuf. Unangö wahukunoka aitonaka, daha matiwi maijaino gënanga ünanga wao deʼ wohilapahi o rasul-rasulika. O Yusuf nënanga gänga o Lewi aiahaluku o Siprusino; o rasul-rasul iwihetongo unangö o Barnabas (mamangarati o Lolaru).