O KISAH RASUL-RASUL 1 - MA JOU AI BUKU O ABARI MA OA

¹ Teofilus nobobarija, Tongohi ahibuku madodihiraka magoronaka ngohi tohitararonoka mata-mata wadiaioka deʼ wodotökoka o Yesus ka de Unanga womuläenge wadiai Ai manarama,

² hiädono mawange Unanga iwigoraka o horogail̄e. Unanga wodoauahi o horogail̄e, de ma Jou Madutu ai Womaha makuaha Unanga wohidöaka o himatoko-o himatoko o rasul-rasulika waö iri-irikoka.

³ Wowango ipahaino, o wange moruata madekana Unanga mamoi-mamoi womahimatoko de madodagi i iunua Ai rasul-rasulika gënanga Unanga igou-goungu wowango. Onanga iwimäke Unanga, deʼ Unanga watemo dede önanga yadäene sarakia ma Jou Madutu wopareta hokä o Koano.

⁴ Deʼ maöraha Unanga imatoomu dede önanga, Unanga wohidöaka o pareta nënanga onangika, ”Uha niamal̄a o Yerusalem. Niodamä genangoka hiädono o Ama wohidöaka okia wohijo jäjajioka, enagënanga kahuruono Ngohi tinihingahuoka nginika.

⁵ Hababu o Yohanis wo ohiki de o akere, mä o wange muruono nagahi ngini aha iniohiki de ma Jou Madutu ai Womaha.”

O Yesus iwigöraka o horogail̄e

⁶ Maöraha o rasul-rasul gënanga imatoomu de o Yesus, önanga iwileha Unangika, ”Jou, boteka örahanënanga Jou nomau nohi gokokali o Israeloka manyawa manga Pareta?”

⁷ O Yesus wohaluhu, ”Ahi Ama mahirete wohitatapu mawange deʼ maöraha. Borotaua gënanga ngini nihiöriki, hababu gënanga o Ama aihaku.

⁸ Mä ngini aha niamäke o kuaha, nako ma Jou Madutu ai Womaha iböaka nginika. Deʼ ngini aha nidadi o hakihi-hakihi mangale Ngohi o Yerusalemoka, o Yudea ingodumu, o Samariaka, deʼ hiädono o dunia mabatingika.”

⁹ O Yesus wotemo iböto hokogënanga, Unanga iwigöraka o horogail̄e önanga manga lako mahimangoka, deʼ o lobi iwitamunu Unanga önanga manga lolegaka.

¹⁰ Onanga kaima lega-legahi o dihangil̄e, maöraha o Yesus iwigöraka itodokanino o nyawa yahinoto manga pakeanga magare-garehe imaokoino toönanga manga datekoka.

¹¹ ”Hei, Galilea manyawa,” o nyawa yahinoto gënanga yätemo, ”yadodoa ngini nima okoil̄edika genangoka nio lega-lega o dihangil̄e? O Yesus ngini niwimäke iwigöraka o horogail̄e gënanga ngini nia himangoka, aha woböaoli de kahoko gënangoli hokä ngini niamäke kangano.”

O Yudas aidagali

¹² Ipaha o rasul-rasul gënanga yolio o Zaitun ma Doporonoka o Yerusalemika. O Doporonoka gënanga hiädono o Yerusalemika done hokilo moi magurutika.

¹³ O Yerusalemoka önanga yoiki o tau o ngï önanga imahidodogumu, daha yodoa o kamari il̄oku-l̄okuil̄e. O rasul-rasul gënanga, enagënanga o Petrus deʼ o Yohanis, o Yakobus deʼ o Andreas, o Filipus deʼ o Tomas, o Bartolomeus deʼ o Matius, o Yakobus o Alfeus aingohaka, o Simon o berera ma Gogöana deʼ o Yudas o Yakobus aingohaka;

¹⁴ hokogenangika mata-mata kao hininga moi imatoomu mangale yohubayanga. Onanga yohubayanga de o ngongoheka yamuruono naga de o ngo Maria o Yesus ngoi ayo, deʼ o Yesus airoriadodoto.

¹⁵ O wange moiuku, maöraha önanga imatoömuino – naga done ho yaratuhu moi de yamonaoko manyawa yoböaino – o Petrus womaoko mangale wotemo. Unanga wato,

¹⁶ ”Roriadodoto! Okia itulihoka Ma Jou Ai Demo ma Buku magoronaka, gënanga kiani idadi. Mahira de o Daud, ma Jou Madutu ai Womaha ihidödemoka mangale o Yudas, o nyawa iwitotago-tagoko o Yesus gënanga manga tutuda.

¹⁷ O Yudas ganga tongomi miadodiawo, deʼ unangö iwiirikoka mangale mimanarama mima kinïki dede ngomi.” (

¹⁸ O Yudas nënanga womamäkeoka ailungunu matonaka aimanarama itotorou mahewaino. Unanga iwiotaka deʼ wohonengoka de aimämata irepaika hiädono aiwariki ihupu mata-mataino.

¹⁹ Mata-mata o nyawa yogogogere o Yerusalemoka yanako mangale o hali gënanga. Hababu gënanga, önanga manga bahasa magoronaka, önanga ihiromanga o tonaka gënanga o Akeldama, mamangarati ’o Awunu ma Tonaka’.)

²⁰ ”Karana o Mazmur ma Buku magoronaka itulihi hokonënanga, ’Mal̄aika o ngï wogogogere idadi kairïdika; uha o nyawa moiö yogogere magoronaka.’ Naga i tulihö hokonënanga, ’Mal̄aika aimanarama makuruhi yal̄ë o nyawa mahomoa.’

^21-22 Hababu gënanga, kiani naga womatëngo womidogo ngomino midadi o hakihi mangale o Yesus wowangokali o honengino. O nyawa gënanga kiani o nyawa womatëngo o nyawa yowöe-wöe manga hidogoronaka mimakokinïki dede ngomi hoko genangika maöraha o Yesus woiki okiaika dede ngomi, ka o Yohanis muläenge woohiki hiädono maöraha o Yesus iwigöraka o horogail̄e ngomi mia hidogoronaka.”

²³ O nyawa yoböa-böaino genangoka yogahoko o nyawa yahinoto, enagënanga o Yusuf iwihetongö o Barsabas (ünanga iwi hetongo o Yustus), deʼ o Matias.

^24-25 Daha önanga yohubayanga. Onanga yato, ”Jou, ngona nohiöriki o nyawa mata-mata mangahininga. O Yudas hokä rasul aimanarama itifaka deʼ wohonengoka. Hoʼ nohimatoko ngomino, o nyawa yahinoto nënanga o nagona Jou nairiki laʼ nahidöaka o manarama gënanga iwitagali o Yudas.”

²⁶ Iböto gënanga mangaromanga yahinoto gënanga yodiai o undi, daha o undi iotaka o Matiasuku. Hoʼ unanga iwigoraka wodadi o rasul imakinïki de o rasul yangimoi de moi mahomoa.