O IBRANI 7 - MA JOU AI BUKU O ABARI MA OA

Ma Imam Melkisedek

¹ O Melkisedek nënanga ganga o koano o Salem mabereraino deʼ ma Jou Madutu aiimam Duru wokö Kurutil̄e. Maöraha o Abraham o parangiino de womakilioro wahohïhanga o kokoano, o Melkisedek woböa wïbühuku ünanga deʼ wihibarakati.

² Ho o Abraham wihidöaka o Melkisedekika maregu ngimoi de hagala okia una waora-oraino. (O romanga Melkisedek mamangarati, madodihiraka, ”O Adili ma Koano”; deʼ karana ünanga o koano o Salem mabereraino, ho airomanga mamangaratioli ”O Lolä ma Koano”.)

³ Yakorona o Melkisedek nënanga kiakadika makoiwa naga ihitararono ünanga de aiamaoka ekola ngoiayo ekola aiete de aitohora; koiwali naga ihitararono mangale womakil̄au ekola aihonenge. Unanga imatero hokä ma Jou Madutu ai Ngohaka; ünanga ganga o imam wokokakali.

⁴ Hoʼ, ngone hamäke nenangokadau hokokia ailamoko o Melkisedek nënanga; ünanga hokogënanga ailamoko hiädono o Abraham, nangaete de nangatohora manga ama, wihidöaka unangika maregu ngimoi de hagala moi-moi wamömäke-mäke o parangioka gënanga.

⁵ O agama Yahudi matita magoronaka hamäke hagala o imam o Lewi aidifauku kokiani yatoomu maregu ngimoi o Israeloka manga hasilino, enagënanga toönanga manga riadodoto mahirete, ngarokö önanga imakoketero o Abraham aidifauku.

⁶ O Melkisedek o Lewi aidifaukua, mä unanga watarimali maregu ngimoi de hagala o Abraham waora-oraino, deʼ wihibarakatioli o Abraham imateke korona watarimaka hagala o jaji ma Jou Madutuino.

⁷ Itiai yakunua hohipongono, o nyawa iwihiböbarakati ganga iholoi wopoluluku de o nyawa wohiböbarakati.

⁸ O imam-imam yatotarima maregu ngimoi ganga o nyawa kayohonenge. Mäimoteke Ma Jou Ai Demo ma Buku, o Melkisedek wototarima o ngongike maregu ngimoi gënanga ganga o nyawa itatapu wowango.

⁹ Yakunu hotemo, o Lewi – aidifauku yal̄ë maregu ngimoi o Israel manyawaino – yofanguoli o hidoku gënanga madodagi de o Abraham, maöraha o Abraham wofangu o Melkisedekika.

¹⁰ Ngarokä o Lewi womakil̄auowahi, mä yakunu hotemo ünanga naga wögogeroka o Abraham aiete de aitohora ai röehe magoronaka, maöraha o Melkisedek imamäke de o Abraham.

¹¹ O imam-imam Lewi manga tutuda matimiuku, agama Yahudi matita ihidöaka o Israel manyawaika. Karana o imam-imam Lewi mahiraino gënanga yakunua yadiai itötotomo okia kokiani yamomanarama, ho kokiani naga o imam mahomoa, enagënanga hokä ma Imam Melkisedek, deʼ koigoungua ma Imam Harun aidoomu inoli!

¹² Aa, nako o imam-imam manga gogere ingali, o agama Yahudi matita makokiani ingalioli.

¹³ Madungutu nengokadau ganga tongone nanga Jou: Unanga o ahali mahomoaino, deʼ kao nyawa moiö de komaiwahi aiahalino yomanarama hokä o imam.

¹⁴ O nyawa mata-mata ihiöriki tongone nanga Jou aiahali o Yehuda ma ahalino; deʼ o Musa komaiwa wahëtongo o ahali gënanga maöraha ünanga woade-ade mangale o imam-imam.

Womatëngo o imam mahomoa hokä o Melkisedek

¹⁵ O hali hohio ade-ade nënanga idadi iholoioli itararono, de aiböa womatëngo ma imam mahomoa hokä o Melkisedek.

¹⁶ Unanga iwigöraka wodadi o imam, koigoungua imahihol̄e de o nyawa mangadatoro, duga-duga imahihol̄e de ai wowango ikokuaha deʼ koiwa mabobaha.

¹⁷ Hababu ma Jou ai Buku i Tebi-tebini magoronaka yahetongo, ”Ngona ganga o imam kahiado-adonika, hokä ma Imam Melkisedek.”

¹⁸ Hoʼ, örahananga o datoro ihira-hira yatingakoka, hababu ikuatokaua deʼ ibaragunaokaua.

¹⁹ O agama Yahudi matita okianaga moi mayakunua yadiai idadi itotomo. Mahababu gënanga ngone örahananga inahidöaka o nganono moi iholoi yaoa; de gënanga ngone hakunu homahitigi ma Jou Madutuika.

²⁰ Inoli, mata-mata gënanga ihidomoteke de o koboto ma Jou Madutuino. Maöraha o imam-imam mahomoa yägöraka koiwa naga o koboto hokogënanga.

²¹ Mä o Yesus iwigöraka wodadi o imam wapäke o koboto, maöraha ma Jou Madutu wïtemo Unangika, ”Ma Jou wokobotoka, deʼ Unanga aha wangaliua Ai damäke, ’Ngona ganga o imam kahiado-adonika.’ ”

²² De nenangoli o Yesus womahitagongo mangale moi o jaji iholoi yaoa.

²³ Nagali moi o hali: o imam-imam mahomoa gënanga naga mangangöe, hababu önanga moi-moi yohonenge hiädono önanga yakunua ihigila-gila manga manarama.

²⁴ Mä o Yesus wowango kahiado-adonika, ho aimanarama hokä imam imatagaliua mahomoaika.

²⁵ Mangale karana gënanga kahiado-adonika o Yesus wakunu wahihalamati hagala o nyawa yaino-ino ma Jou Madutuika de madodagi Unanga, hababu Unanga wowango kahi ado-adonika la wohiädono hagala o nyawa manga gogahoko gënanga ma Jou Madutuika.

²⁶ Hoʼ, o Yesus ganga ma Imam womo Mulia ngone hipöparalu. Unanga wotebini; Unangoka hamäkeua o howono ekola o baradoha okianaga. Unanga iwihitingaka de o nyawa yoböbaradoha, deʼ iwihidöa hiädono iholoi ikurutil̄e de hagala o dihanga.

²⁷ Unanga hokä o imam womoMulia mahomoaua, o wange higëtongo kokiani wohihuba o huhuba karana hagala aibaradoha mahirete ihira, dahaö karana o umati manga baradoha. O Yesus wohihuba o huhuba kamamoi dika mangale kahiado-adonika, maöraha Unanga wohihuba Ai diri mahirete hokä o huhuba.

²⁸ O agama Yahudi matita yägöraka o nyawa yotötotomua yodadi o imam womomulia. Mä ipaha de o tita gënanga, ma Jou Madutu wodiai o jaji de makoboto Unanga wïgöraka hokä o Imam womo Mulia, ai Ngohaka wodädadioka Wohihohalamati itötotomo mangale kahiado-adonika.