O IBRANI 12 - MA JOU AI BUKU O ABARI MA OA

Ma Jou Madutu tongone nanga Ama

¹ Aa, yakorona ngone mahirete, inäkilolitino ngone naga duru kamangangöe o hakihi! Hababu gënanga, niaino ngone haumo mata-mata inahitotubuho ngone deʼ o baradoha kahoko genangika imahi totataulu ngoneoka. Deʼ niaino ngone hakaigoungu hanïki o rorebe naga tongone nanga himangoka.

² Kokiani tongone nanga lolega madumutu o Yesusika, hababu Unanga dika wamomomiki tongone nanga ngongaku deʼ wapaliara madodihirakahi hiädono mabobaha. O Yesus wotongohono watagongo o huha de o hangihara o salib magotaka! Unanga wohaduliua wohonenge o salib magotaka gënanga ganga o hali moi iwihi mal̄eke. Unanga duga-duga wohininga mangale o mörene kiaka Unanga aha wamäo maduruino. Orahananga Unanga wogogeruku o kuruhi imomulia ma Jou Madutu ainirakoka deʼ wopareta dede Unanga.

³ Abeika niapikiri sarakia o Yesus aihangihara wähimanga o nyawa yoböbaradoha iwilawani hokogënanga mamogiria! Hababu gënanga uhali niahininga iëteke deʼ nianganono itöaka.

⁴ Hababu niaparangi magoronaka nialawani o baradoha, ngini komaiwahi niparangi hiädono nia awunu ikopoa.

⁵ Deʼ uhali niawohanga ma Jou Madutu ainasihati nënanga inihidöaka nginika hokä Ai ngoha-ngohaka: ”Ahi ngohaka, nohininga nohidodiai ma Jou ai dodötoko, deʼ uhali ani hininga i ëteke nako Unanga woningamo.

⁶ Hababu ma Jou wädötoko moi-moi o nyawa wädora-dora, deʼ Unanga wägohara moi-moi o nyawa womoma ngaku hokä Ai ngoha-ngohaka.”

⁷ Kokiani ngini niatarima o gogohara ma Jou Madutuino hokä o dodötoko moi o amaino. Hababu boteka o ngohaka womatëngo aiama kowïhukumua?

⁸ Nako ngini inïhukumua hokä mata-mata Ai ngohaka mahomoa nënanga mamangarati ngini koigoungua ngohaka madutu, mä o ngohaka madutuua.

⁹ Ngone de nanga ama o duniaka. Unanga wonädötoko ngone, deʼ ngone hïhoromati. Aa, okia hongoli tongone nanga Ama rohaniika o horogaka, marai kokiani ngone yömoholoi homaponu Unangika hupaya ngone howango.

¹⁰ Tongone nanga dimono o duniaka inädotoko ngone duga-duga maöraha madodipoko, imöteke okia önanga yamäo yaoa. Mä ma Jou Madutu wonädotoko ngone mangale tongone nanga oa mahirete, hupaya ngone yakunu idadi hotebini homa kokomöteke dede Unanga.

¹¹ Itiai maöraha ngone inädotoko, o hukumanga gënanga nanga hininga yasanangiua, duga-duga kayahuha dika. Mä duruino de gënanga, ngone inädoto-dotokoka, o hukumanga gënanga idadi o hababu ngone howango imöteke ma Jou Madutu aimau, deʼ mahasili o lolä mamamäo ngoneino.

O hidumutu deʼ o hohininga

¹² Hababu gënanga, nakuata anigiama yaböbole-bole deʼ anibuku ihähahara gënanga!

¹³ Salalu nomädagi o ngëkomo irata-rataika, hupaya anil̄ou isuga-suga gënanga ipaakorua, makaidogo i tögumu.

¹⁴ Nohidailako la nowango nimahitekehi dodiai de o nyawa mata-mata. Nohidailakoli la nowango itebini, maboboloi mangale ma Jou. Hababu kamoiö de iwimäkeua ma Jou nako ünanga wowangoua hokä hokogënanga.

¹⁵ Niogöana uha hiädono naga womatëngoani wohupu de ma Jou Madutu aihininga maoa, hupaya uha naga tingini niahidogoronaka imadadi hokä hadato-datomo de marasongoka hiädono ihipuda o huha deʼ yabodito o nyawa mangangöe de manga rasongo.

¹⁶ Nio göana hupaya uha naga yowango isafarune ekola yölegaikaua o rohani mahali, hokä o Esau wadodiai. Unanga wahukunu aihaku hokä o ngohaka o riaka, duga-duga mangale o inomo o udo-udomo moi.

¹⁷ Ngini nihiöriki de ipahaika o Esau wönahihu wamäke o barakati gënanga aiamaino, mä unanga iwitila. Hababu ngarokö de aigari ünanga wolingiri o ngëkomo la watiaioli aihowono, ma o ngëkomo mangale gënanga koiwaka.

¹⁸ Roriadodoto niainoua niohimanga okia naga moi hokä o Israel manyawa yöhimanga mahiraino. Onanga yöhimanga okianaga moi yakunu hapal̄anga, enagënanga o Sinai ma L̄oku dema uku i toka-tokara; önanga yöhimanga o huhutu, ikuranga itararono, deʼ o rato;

¹⁹ önanga yöhimanga o trompet mailingi, de o ilingi mailingi duru kohakua-kuatil̄e. Maöraha o Israel manyawa yoihene o ilingi gënanga, önanga duruhë yogahoko hupaya o ilingi gënanga bötohi yätemo-temo onangika.

²⁰ Hababu önanga yatänua yoihene o pareta o ilingi ihiado-adono gënanga. Karana o ilingi gënanga itemo, ”Mata-mata yatötigi-tigi o l̄oku nënanga, haduliua gënanga o aiwani ekola o nagona dika, kokiani yäkaweli de o helewo hiädono yohonenge.”

²¹ Okia yamömake-make o Israel manyawa gënanga hokogënanga magiria hiädono o Musa wotemo, ”Ngohi tohawana deʼ tohahara!”

²² Iidulu yaino, ngini niböaka o Sion ma Doporono deʼ ma Jou Madutu aikota iwango-wangoino, enagënanga o Yerusalem o horogaka de toëna mamalaekat dema ribu-ribuhu.

²³ Ngini nianïkoka moi o gamäke irame-rame – ma Jou Madutu aingoha-ngohaka yorö ria-riaka manga gamäke, manga roma-romanga yatuli-tulihoka o horoga magoronaka. Ngini niböa niwïhimanga ma Jou Madutu, o nyawa de o umati mata-mata manga Hakimi. Ngini nio himanga o nyawa maoa manga womaha yahidadioka yototomo.

²⁴ Ngini niböa niwïhimanga o Yesus, o Dodohanga mangale o jaji mahungi gënanga; ngini niohimanga o awunu yodödohurero imahi tago-tagongo hagala o hali ihoholoi yaoa, de o Habel aiawunu imahi tago-tagongo.

²⁵ Hababu gënanga nimahidodiai uha hiädono ngini nioluku niwihigihene Unanga wotötemo-temo gënanga. Onanga yolu-oluku iwihigihene Unanga woböboa-boa o duniaino deʼ wohiado-adono o abari ma Jou Madutuino, yakunua mangadiriihioara. Okiali ngone nënanga hohigihe-gihene Unanga wotemo-temo o horogaino! Nako ngone holuku hihigihene, kiaka la yakunu ngone ho otana!

²⁶ O öraha gënanga Ai ilingi yaburakiti o dunia. Mä oraha nanga ünanga wojaji, ”Mamoiohi, ngohi aha taburakiti kaoduniaua dika mä de o dihangö.”

²⁷ Mademo ”ma moiohi” ihi matoko o dunia mata-mataika wohidädadioka aha igiwi deʼ ihirehene, hupaya yamal̄a-mal̄aika duga-duga iyaku-akunua igiwi.

²⁸ Hababu gënanga, kokiani ngone hotemo tarima kasi ma Jou Madutuika, karana ngone hatarima Unangino o koano mapopareta moi iyaku-akunua igiwi. Kokiani ngone hotarima kasi deʼ hopuji-puji ma Jou Madutuika de mahoromati deʼ mamodongo, imoteke madodagi Una mahirete wöigo-igo.

²⁹ Hababu tongone nanga Jou Madutu hokä o uku ihitö tuhu-tuhuku hiädono yöuku.