O HOSEA 9 - MA JOU AI BUKU O ABARI MA OA

O Israel ma hukumanga ihingahu

¹ Hei Israel manyawa, uha nihiamo-amokoli nia wange ma ago-agomo hokaʼ o hoana deo berera ma homoa. Ngini niwi mala ka nia Jou Madutu deʼ ni satiaua Unangika. O gandum yo hido-hidoroka yö getongo, ngini nia hukunu nia diri hokä o manga roehe ya huku-hukunu o Baal ma gikirika, deʼ ni sanangi nia tarima o gandum kiaka ngini nia pulono hokä hewa o gikiri gënanga ini hewa ngini ika!

² Mä itedekanokaua ngini aha ni kuranga o gandum inoli o zaitun ma minya, deʼ o anggur ma aha i mata.

³ Ngini hei Israel manyawa, aha ni tatapuua ni gogere o bereraka wini hidoa-doakoka ma Jou ngini ika. Ngini kokiani nima kilioro o Mesir ika, deʼ kokiani nia olomo o inomo ihoharamu o Asyur ma tonakoka.

⁴ Hagala o bereraka gënanga ngini aha koniakunua nihi huba o anggur deʼ o huhuba o aiwani la nia sanangi ma Jou Ai hininga. Nia inomo aha ya diai moi-moi o nyawa ya ol̄o-ol̄omo yo dadi yo peseke, hokä o inomo ya ol̄o-ol̄omo yo jere ma upacara ka. O inomo gënanga ma baraguna duga-duga mangale ya punuhu nia mamata; kama huhutulö mä aha yaoua ma Jou Ai Tau ika la ihi huba dokengoka.

⁵ O agama mawange ma ago-agomoka mangale iwi horomati ma Jou, ngini aha kö kia-kiaua niakunu nia diai la nihiamoko.

⁶ Nako o huha deo bodito ima hiadono, deʼ ngini inï ao o berera ma homoa ika, done yogö gogere nia hidogoronaka aha o Mesir manyawa ya toomu layä toma deʼ yä lungunu o Memfis mabereraka! O momo deʼ o hihika aha i wango ya tamunuku nia tau rio mangï deʼ nia bara-baranga o haaka dema ija-ija ka.

⁷ I ma hiadonoka o hukumanga maöraha, o oraha mangale ya tarima hagala mabalahi toönanga manga manarama ma balahi. O Israeloka aha ya mao! Ngini ni temo, ”O nabi iwi kokuaha o womaha nënanga wo fuma! Unanga iwi togohanga!” Ngini ni temo hoko gënanga karana ngini duru nihï dohata ngohino deʼ nia baradoha duru i amoko wöe.

⁸ Ma Jou Madutu wohi huloko ngohi hokä o nabi mangale tini hidoaka o hohininga ngini ika Ai umati, mä kiaika dika ngohi toiki, ngini nihidailako nihi modoi ngohi hokä o totaleo o beberaka. Toma Jou Madutu ma hirete ai bereraka ngomi o nabi-nabi o kawaha imï haturü.

⁹ Duru i torou nia manarama hokaʼ ya dodiai oka o nyawa o Gibea mabereraka. Ma Jou Madutu aha wö hininga nia howono, deʼ winï hukumu ngini karana nia baradoha.

O Israel manga baradoha deʼ to ënanga akibata ma hasili

¹⁰ Ma Jou wotemo, ”Maöraha madodihiraka ngohi tä make o Israeloka, ngohi to morene hokä o nyawa imä make o angguru ma hohoko o tonaka i kokakaha ka. Maöraha madodihiraka ngohi ta make nia ete de nia tohora, ngohi to sanangi hokä o nyawa ya make o ara ma hohoko ma hasili madodihiraka. Mä, maöraha önanga yoiki o Peor mal̄oku ika, önanga yo mulaenge ya huba o Baal hiadono önanga yo dadi yo peseke hokä o gikiri önanga yö hohininga gënanga.

¹¹ O Israel ma kabaharanga aha i hoho i hihanga hokä o totaleo, aha koiwa naga o ngohaka ihi ao, deʼ aha koiwa naga o ngohaka ima kil̄au.

¹² Mä ngaroko naga o ngoha-ngohaka ima kil̄au deʼ yo hero, önanga aha Ngohi ta l̄ë; ka ima tengö ma aha Ta higumalaua yo wango. Ni bodito ngini, hei Israel manyawa, nako Ngohi nihimal̄a ngini!”

¹³ Jou, ngohi tamake toönanga manga ngoha-ngohaka yä goginïki deʼ ya toma.

¹⁴ Boteka kokiani to gahoko nginika mangale hagala o nyawa ge önanga? Nihi oa oli hagala ma ngongoheka koyo faatua! Nadiai önanga koyakunua yahuhu toönanga manga ngohaka ma gilau!

Ma Jou wä hukumu o Israeloka

¹⁵ Ma Jou wotemo, ”Mata-mata o dorou önanga ya mulaenge o Gilgaloka. Genangokadau Ngohi tomulaenge ta dohata önanga. Karana toönanga manga manarama i torou, Ngohi aha tä duhu önanga Ahi bereraka nënanga. Ngohi aha tä doraokaua önanga oli, mata-mata toönanga manga tutuda ihi lawanoka Ngohi.

¹⁶ O Israel manyawa aha Ta hukumu. Onanga aha yo dadi hokä yadö dato-datomo koihohokua, deʼ hagala ma ngutu-ngutuku i toolengoka. Onanga koiwa aha koiwa manga ngohaka; mä ngaroko önanga de manga ngohaka, aha Ta toma o ngoha-ngohaka önanga yä dora-dora gënanga.”

Ma nabi wo temo-temo ya korona o Israeloka

¹⁷ Ma Jou Madutu tilö leleani gënanga aha wä umo Ai umati, karana önanga yoluku iwi higihene Unanga. Onanga aha yo dadagi o hoana deo berera manga hidogoronaka.