O HOSEA 7 - MA JOU AI BUKU O ABARI MA OA

¹ Ma Jou wotemo, ”Tohi geto-getongo Ngohi to mau tahitogumu Ahi umati o Israeloka, deʼ tohigilio hoi hira-hira oli hagala idä dadi onangoka, ma Ngohi ta make duga-duga o dorou deʼ toönanga manga baradoha. Onanga ima ki tipu, önanga yö ngohama o nyawa manga tau layo tohiki, deʼ önanga yo ora o ngeko-ngekomika.

² Koma iwa toönanga manga dibanga yö dagi Ngohi aha tö hohininga hagala o dorou gënanga. Mä toönanga manga baradoha yä hawoino önanga hiadono de ma dodiai Ngohi ta make ngohi.”

O doomu ma dorou o kadatoka

³ Ma Jou wotemo, ”De hagala manga tipu deʼ hagala manga manarama i totorou, o kawaha ihidailako ya sanangi ma koano ai hininga deʼ o popareta ma pegawe-pegawe.

⁴ Onanga mata-mata yo penghianati deʼ o nyawa yo satiaokaua. Toönanga manga dohata hokä o uku o ho magoronaka ya wangoua o roti wododiai i hira deo tarigu ya ojo-ojoukuoka ibötoka la iharongo.

⁵ Ma koano ai rameanga mawange oka, önanga ya diai ma koano deʼ ai popegawe o angguru yokere hiadono yä daluku deʼ yodiai hagala o hali i bodo-bodo. Ma baha ma koano wo mahi sosanangi deʼ yokokianati genanga.

⁶ Hokä o uku o rikana magoronaka hoko genangoli manga nekati ma dorou deʼ toönanga manga dohata! O uku ma ngaboho manga hininga magoronaka o hutu ya haiwatiki, deʼ o ngoru-ngorumino i heru-heru idadi o uku ma doka-dokara ihohatera.

⁷ Manga nahihu ma gogiriaka, magoronaka, yätoma önanga toönanga manga tutuda-tutuda. Mata-mata toönanga manga koano yä tomaka kaima kokinikika. Ma ngaroko hagala idä dadi hoko gënanga ma modorou, moiua o nyawa imä niata Ngohi ino mangale yo gahoko o roriwo.”

O Israel deʼ hagala o hoana

⁸ Ma Jou wotemo, ”O Israel manyawa ima teke rimoi de hagala o hoana deo berera toönanga manga higilolitino, hiadono önanga yo dadi hokä o roti i ohaka kama hononga.

⁹ Onanga ya maoua i moteke ma diai karana ima teke rimoi de hagala o hoana gënanga daha i hihanga toönanga manga kuata. Manga jarita ma bobaha ima hitigi-tigi inoka, mä önanga koihiorikua.

¹⁰ O Israel manga hininga ma gurutil̄e ha make ma dodiai deʼ idadi i nyata mabukiti toönanga manga howono. Ngaroko mata-mata gënanga i dadioka, önanga koihilingirua Ngohi ekola ima kilioro Ngohi ino, manga Jou toönanga manga Jou Madutu.

¹¹ O Israeloka ya kaika ya kaino hokä o namodara i bodo-bodo. Madodihiraka manga nyawa yo gahoko o bobatumu o Mesirika, deipaha önanga yo piringana o Asyur ika.

¹² Mä önanga ya kaino ihi geto-getongo, Ngohi aha tataurika o homa deʼ Tä tagoko önanga hokä o nyawa yo tagoko o totaleo. Ngohi aha tä hukumu önanga karana hagala toönanga manga dorou tohiori-orikoka.

¹³ Onanga yo bodito, hababu önanga ihi mala ka Ngohi. Onanga aha yo wedere hababu ihi lawanoka Ngohi. Ngohi tö igo tahihalamati önanga, mä toönanga manga puji Ngohi ino kayo elu-eluku.

¹⁴ Onanga koya kaigoungua imä niata Ngohi ino. Nako önanga imä niata, önanga ima hipaka-paka manga ngidu-ngidu mangï uku, deʼ yo dodora hokä ya dodiai hagala o nyawa ihi ngaku-ngakuua Ngohi ino. Nako önanga imä niata yo gahoko o gandum ekola o angguru, önanga ima lui-luiti hokä yadodiai hagala o nyawa ya huba-huba o gikiri. Onanga i gou-goungu ihi lawani Ngohi!

¹⁵ Ngaroko Ngohi tahi lamokil̄e deʼ tahikuata önanga, mä önanga yo diai o doomu ma dorou ihi lawani Ngohi.

¹⁶ Onanga kahokogenangika dika ya niki hagala o gikiri hakali-kali o kia-kiaua ma kuaha. Onanga yakunua yö nganono hokä o toimi ma l̄eha kai bebe uku. Toönanga manga tutuda yo temo-temo de manga edenge, hababu gënanga önanga aha deo oworo yahi toma, deʼ yayogiete o Mesir manyawa yä gogiete.”