O HOSEA 3 - MA JOU AI BUKU O ABARI MA OA

O Hosea de ngoi hekata mo sosatiaua

¹ Ma Jou wohi temo ngohino, ”Noikoli deʼ nomï dora moma tengo o ngoheka moigo mo howo-howono. Nomï dora munanga hokä Ngohi ö Tä dora o Israel manyawa ngaroko önanga ihi mal̄aika Ngohi deʼ ya huba hagala o gikiri ma homoa inoli yö igo ihi huba o kue kismis o gomangika.”

² Done ngohi to fangu ngimoi de motoa o tiwi haaka deʼ o gandum o kilo ratuhu moi de moritoa la tomä make o ngoheka gënanga.

³ Done ngohi tomi temo munangika münanga kokiani mohi damä ngohi mangale öraha kahä dekanino. Oraha ma dekanino gënanga münanga yakunua ami roehe ma hukunu ekola mo howono, deʼ ngohi ö ma aha toma hitigiua munangika.

⁴ Hoko gënanga la ma hali deo Israel manyawa; duru ma dekanino duru kokiani önanga yo wango koiwa manga koano ekola o tutuda, koiwa o huhuba ekola o tugu-tugu i kokaramati, koiwa hagala o gomanga ekola hagala o roehe ma pareta ihi ngö ngahu-ngahu o rahasia o oraha ma himangika.

⁵ Mä aha i boa maöraha o Israel manyawa ima kilioro ma Jou toönanga manga Jou Madutu ika, deʼ toönanga manga koano ika o Daud aidifauku. Daha önanga aha iwï modongo deʼ iwi horomati ma Jouika, inoli ya tarima hagala Ai barakati.