O HOSEA 2 - MA JOU AI BUKU O ABARI MA OA

¹ Karana gënanga nima ka ahoko nima hikokingini deo romanga ”Ma Jou Madutu Ai umati” deʼ ”Ma Jou Wädora”

Ongo Gomer mo satiaua ihi nonako o Israel

² Ma Jou wätemo, ”Hei Ahi ngoha-ngohaka, nia ayo ko Ngohi hekatokaua oli, deʼ Ngohi ko ami rokatua. Hababu gënanga nasihati münanga hupaya münanga uha mo howono deʼ uha ami roehe ma huku-hukunoli.

³ Nako münanga kahirahi ami roehe ma huku-hukunu, Ngohi aha ta huputu ami pakeanga hupaya münanga mo talajanga hokä mawange munanga imi kilauino. Aha ta diai münanga hokä o tonaka madü dudungu deʼ ma kokakaha, done münanga aha o kiriti ma dudungu mohi honenge.

⁴ Ngini ami ngoha-ngohaka aha Ko tinï dora ua; ngini nima kil̄au de manga roehe ima huku-hukunino.

⁵ Nia ayo ami roehe ma huku-hukunu manakoua ami maleke. Münanga mo temo, ’Ngohi aha toiki ahi mamane-mamaneika ihi hidoa-doaka o inomo deʼ o akere, o wol deʼ o ngoere o lenan, o zaitun ma minya deʼ o anggur.’

⁶ Hababu gënanga, Ngohi aha tomi kurumu deo momo ihohihika, deʼ ta tamunu ami ngekomo deo pagara o mehele.

⁷ Münanga aha mä ginïki hagala ami mamane mä aha komä daenua önangiika. Münanga aha mä lingiri önanga mä aha komä makeua önanga. Done münanga aha mo temo, ’Ngohi aha to lio ahi rokata ma hiraika; kahuruono ahi wowango i holoi yaoa deo oraha nënanga.’

⁸ Ngoni ayo komaiwahi mohi goungu Ngohi tomi hidoa-doaka munanga o gandum, o angguru, o zaitun ma minya, deʼ hagala o gurasi deo haaka mapö pake-pake mangale ma huba o Baal gënanga.

⁹ Karana gënanga, o gugütuku ma orahoka Ngohi aha tauru Ahi ngongike, enagënanga o gandum deʼ o angguru, inoli o wol deʼ o ngoere o lenan tomi hidoa-doaka munangika mangale ami pakeanga.

¹⁰ Aha tomi hekono münanga ami mamane mata-mata manga himangoka. Moiua ö onangino yakunu imi lapahi Ahi kuaha ino.

¹¹ Hagala ami rame-rame aha To totogumu higumal̄aokaua, kayaoa o rame-rame o taongo moi ma moi kayaoa o rame-rame o mede moi ma moi deʼ o sabat mawange; ma dipoko, hagala o agama ma rameanga.

¹² Ngohi aha tabinaha hagala o angguru ma gota ma utu deʼ ara ma gota ma utu i moteke münanga, ma ganga ami leleani ami mamane-mamaneika ma hewa ino. Aha Ta ngali ami angguru ma dumule deʼ ami ara ma dumule idadi o hongana, o aiwani madorou aha ya kilianga.

¹³ Ngohi aha tomi hukumu münanga karana hagala o wange ma pake la o dupa ma tuhuku o Baal ika, inoli moma pake de moma poromu la mä kiniki ami mamane-mamane, da hakali-kali mohi wohanga Ngohi. Ngohi, ma Jou, to temoka.”

Ma Jou wä dora Ai umati

¹⁴ Ma Jou wato, ”Hababu gënanga Ngohi aha tomi ao münanga o tonaka ma kokakaha ika; doke ngoka aha Tomi baja münanga deo dora ma demo-demo.

¹⁵ Ami anggur ma dumule aha To higilio munangika, deʼ o Huha ma Wai aha ta diai o ngonganono ma ngorana. Doke ngoka münanga aha mohï buhuku Ngohi hokä moma moholehikahi, maöraha münanga gënanga dahao o Mesir mabereraka demo hupu.

¹⁶ Daha münanga aha mohi hetongo Ngohi ami rokata, deʼ ko ami Baal okaua.

¹⁷ Ngohi aha tomi higumal̄aokaua ma hetongo o Baal ma romanga, hiädono o nyawa aha ya wohanga o romanga gënanga.

¹⁸ Oraha gënanga Ngohi aha to diai o jaji de hagala i rupa o aiwani hupaya ënanga uha yä ruae Ahi umati. Ngohi aha tohigumalaua hagala o parangi Ahi umati manga bereraka gënanga, deʼ ta diai önanga yo wango yori ridi deʼ yo sanangi.

¹⁹ Israel, ngona aha Ta diai Ngohi hekata, Ngohi hekata ma dutu kahiado-adonika. Ngona aha Tonï dora de salalu Tonï hohininga; Ngohi aha Ahi hininga i tebini deʼ to satia.

²⁰ Ima moteke de Ahi jaji, ngona aha Toni kawingi. Ngona aha nohigoungu Ngohi hokä ani Jou ma hirete.

^21-22 O oraha gënanga, nako Ahi umati o Israeloka imä niata, Ngohi tahi gihe-gihene ünanga. O dihanguku aha Ta diai o awana i uti hiädono o dunia ihi hasili o gandum, o angguru deʼ o zaitun ma minya.

²³ Ngohi aha ta diai Ahi umati yo wango yo sanangi deʼ yo gogere i tiai toönanga manga bereraka. De onangika ya hiahoko ’Koyä dora ua’ aha To hidumutu önanga Tä dora deʼ onangika ya hiahoko ’Ko Ahi umatua’ aha Ta hetongo, ’Ngini Ahi Umati’. Onanga aha yo haluhu hoko nënanga, ’Ngona tongomi mia Jou Madutu.’ ”